Ne usu atu ne te tupu mua o Isalaelu ko Tavita se pese e tavae atu ei ki te Mafuaga: “Toku Atua, e fiafia au o fai tou loto! E tausi ne au au akoakoga i toku loto.” (Sala. 40:8) Ne fiafia tonu a Tavita o fai te loto o te Atua faitalia a tulaga faiga‵ta mo fakalavelave ne fepaki mo ia i tena olaga. E tonu, e se ko Tavita fua te tino tapuaki o Ieova ne fiafia i te taviniga ki te Atua tonu.

I te fakaaogaga o pati i te Salamo 40:8 ki te Mesia, io me ko te Keliso, ne tusi mai a te apositolo ko Paulo: “I tena vauga [Iesu] ki te lalolagi ne fai mai ei tou tagata penei: ‘Ne seki manako koe ki taulaga mo meaalofa, kae ne fakatoka ne koe se foitino mō oku. Ne seki talia ne koe a taulaga ‵sunu kātoa mo taulaga mō agasala.’ Kae ne fai atu au, ‘Kiloke! Tenei au ko vau (e ‵tusa mo te mea telā e tusi i te pelugā tusi e uiga ki a au) o fai tou loto, e toku Atua.’”—Epe. 10:5-7.

I tena nofoga i te lalolagi, ne fiafia a Iesu o kilokilo ki mea ne faite, ‵nofo fakatasi mo taugasoa, kae ‵kai fakatasi mo nisi tino. (Mata. 6:26-29; Ioa. 2:1, 2; 12:1, 2) Kae ko te ‵toe mea telā ne fiafia malosi a ia ki ei ko te faiga te loto o tena Tamana faka-te-lagi. A te ‵tonuga loa, ne fai mai a Iesu: “A taku meakai ko te faiga o te loto o ia telā ne uga mai ne ia au kae ke fakapalele foki tena galuega.” (Ioa. 4:34; 6:38) Ne tauloto ne soko o Iesu a te mea ‵funa ki te mauaga o te fiafia tonu mai te lotou Matai. Ona ko te fiafia lasi, ne talai atu ei ne latou te fekau o te Malo mo te loto finafinau ki nisi tino.—Luka 10:1, 8,9, 17.

Ne fakatonu atu a Iesu ki ana soko: “Olo atu koutou ki fenua katoa o fai a tino i ei mo fai a soko, kae papatiso atu latou i te igoa o te Tamana mo te Tama mo te agaga tapu, akoako atu latou ke faka‵logo ki mea katoa ne fakatonu atu ne au ki a koutou. Kae kiloke! Au e fakatasi faeloa mo koutou i aso katoa ke oko eiloa ki te gataga o te olaga tenei.” (Mata. 28:19, 20) E aofia i te fakataunuga o te fakatonuga tenei a te talai atu ki tino i so se koga e maua ei latou, fai a  toe āsiga ki tino fia‵fia, kae fai akoga faka-te-Tusi Tapu mo tino taki tokotasi penā. A te faiga o te galuega tenei e mafai o maua i ei a te fiafia lasi.

Faitalia me fia‵fia io me sē fia‵fia mai a tino ki ‵tou fekau, e tāua ‵ki a ‵tou kilokiloga ki te mauaga ne tatou a te fiafia i te galuega talai. Kaia e tumau ei tatou i te folafola atu o te tala ‵lei faitalia te sē fia‵fia io me ko te sē fia ‵saga mai o tino ki a tatou? Me e iloa ne tatou me i te ‵kau ki te galuega talai o te Malo mo te faiga o soko se fakaasiga o ‵tou a‵lofa ki te Atua mo ‵tou tuakoi. E tonu, ko ‵tu ‵tou ola mo ola o ‵tou tuakoi i se tulaga fakamataku. (Eseki. 3:17-21; 1 Timo. 4:16) Ke mafau‵fau tatou ki nisi manatu kolā ne fesoasoani atu ki te tokoukega o ‵tou taina mo tuagane ke tumau io me faka‵fou te lotou loto finafinau ki te galuega talai i kogā koga faiga‵ta.

A te fakaaogaga o fesili kolā e fetaui ‵lei e masani o iku atu ki ikuga ‵lei. I te taeao e tasi, ne matea ne Amalia se tagata e faitau ki te nusipepa i se koga e tafao‵fao sāle ei a tino. Ne fanatu tou fafine ki a ia kae fesili atu me e isi ne tala ‵lei ne faitau ne ia. I te faimaiga tou tagata me seai, ne fai atu Amalia, “Ko aumai ne au ki a koe a te tala ‵lei e uiga ki te Malo o te Atua.” Ne fakamalosi aka ne te mea tenei a te fiafia o te tagata, kae ne talia ne ia se akoga faka-te-Tusi Tapu. A te tonuga loa, ne kamata ne Amalia akoga faka-te-Tusi Tapu e tolu i te koga tenā.

Ne fai ne Janice a tena koga galue mo fai tena koga talai. I te taimi ne fakaasi mai ei ne se tino leoleo mo tena tino galue te fiafia ki se mataupu i loto i Te Faleleoleo Maluga, ne fai atu a Janice me ka aumai faeloa ne ia a mekesini ki a lāua. Ne fai foki penā tou fafine ki te suā tagata galue telā ne fiafia malosi ki mataupu kese‵kese i loto i Te Faleleoleo Maluga mo te Alamai! Ne iku atu a te mea tenei ki te fakamolemole mai o te suā fafine galue ke maua aka ne ana mekesini. “Ma‵faga o fakamanuiaga mai i a Ieova!” ko pati a Janice. I te fakaotiga, ne ave sāle ne ia a mekesini ki tino e 11.

Ne fakaasi mai ne se ovasia faimalaga me e se ‵tau o fakaoti ne tino talai olotou sau‵talaga mo se tino i te fale mai te fai atu fua me ka toe ‵foki mai latou i te suā aso. I lō te fai penā, e mafai ne latou o fesili atu ki te tino: “E a, e manako koe ke toe foki mai au o fakaasi atu ki a koe te auala e fai ei te akoga faka-te-Tusi Tapu?” io me “Se a te aso mo te itula e manako koe ke toe foki mai au o faka‵soko ta sau‵talaga?” Ne li‵poti mai ne te ovasia faimalaga me ne kamata ne taina mo tuagane akoga faka-te-Tusi Tapu e 44 i te vaiaso e tasi, mai te fakaaogaga o te fakatomuaga tenei.

E mafai o aoga tonu a te ‵toe āsi fakavave atu i nāi aso fua mai tua o te āsiga muamua. Kaia? Me e fakaasi atu i ei a te fia‵fia tonu o tatou o fesoasoani ki tino taki tokotasi loto fakamaoni ke malama‵lama i te Tusi Tapu. I te taimi ne fesili atu ei ki se fafine me se a te pogai ne talia ei ne ia se akoga faka-te-Tusi Tapu mo Molimau a Ieova, ana muna, “Ne kamata au o sukesuke ona ko te fiafia mo te alofa tonu ne fakaasi mai ne latou ki a au.”

 I se taimi toetoe mai tua o te kauatuga ki Te Akoga mō Paenia, ne kamata ne Madai ne akoga faka-te-Tusi Tapu e 15 kae ko oti ne tuku atu ne ia akoga e 5 ki nisi tino talai. E isi ne ana tino a‵koga ko kamata o ‵kau mai faeloa ki ‵tou fakatasiga. Se a te mea ne fesoasoani atu ki a Madai ke kamata ne ia ne akoga faka-te-Tusi Tapu e uke? Ne faka‵mafa atu ne te akoga ki tou fafine a te tāua ke fokifoki faeloa o āsi ke oko ki te taimi ko maua ei ne ia a tino kolā ne fakaasi mai te fiafia i te taimi muamua. E fai mai a te suā Molimau telā ne fesoasoani atu ki tino e tokouke ke tauloto ki muna‵tonu i te Tusi Tapu, “Ne tauloto ne au me i te tumau i te faiga o toe āsiga ko te kī ke fesoasoani atu ki tino kolā e fia iloa ne latou a Ieova.”

A te faiga o toe āsiga mo akoga faka-te-Tusi Tapu e manakogina i ei taumafaiga e uke. E ui i ei, a taui kolā e maua e sili ‵mao atu i taumafaiga e manakogina. E auala i te ‵kau o tatou ki te galuega talai o te Malo, e mafai ei ne tatou o fesoasoani atu ki nisi tino ke “iloa tonu ne latou a te munatonu,” kae ka mafai latou o ‵sao i ei. (1 Timo. 2:3, 4) Kae mō tatou, e mafai o iku atu ki te lotomalie mo te fiafia sē fuafuagina.