1. Kaia ne tupu aka ei a te alofa tonu i te va o te Atua mo tena Tama?

NE FOLAFOLA mai te Tama a Ieova, ko Iesu Keliso: “Au e alofa ki te Tamana.” (Ioa. 14:31) Ne fai mai foki a Iesu: “E alofa te Tamana ki te Tama.” (Ioa. 5:20) E se ‵tau o ‵poi tatou i te mea tenā. Tela la, ne fai a Iesu mo fai te “tagata poto i te fakatutu” a te Atua i te fia tausaga a koi tuai o ‵liu tagata a ia. (Faata. 8:30) I te ga‵lue tasi o Ieova mo Iesu, ne tauloto ne te Tama a mea e uke mai i uiga o tena Tamana kae maua ne ia a pogai e se lausia ke alofa atu ki a ia. A te tonuga loa, ne fai ne te ‵pili o te fesokotakiga ke tupu aka a te alofa tonu i a lāua.

2. (a) Se a te mea e aofia i te alofa? (e) Ne a fesili ka sau‵tala tatou ki ei?

² E aofia i te alofa a lagonaga ‵poko o te alofa atafai ki te suā tino. Ne usu mai a te faisalamo ko Tavita: “Te Aliki [Ieova], ko oko eiloa toku alofa ki a koe.” (Sala. 18:1) Tenā te lagonaga e ‵tau o maua ne tatou e uiga ki te Atua, me ne alofa atafai mai a ia ki a tatou. Kafai e faka‵logo tatou ki a Ieova, ka fakaasi mai tena alofa ki a tatou. (Faitau te Teutelonome 7:12, 13.) Kae mafai eiloa o a‵lofa tatou ki te Atua māfai e se lavea ne tatou a ia? Se a te uiga ke a‵lofa tatou ki a Ieova? Kaia e ‵tau ei mo tatou o a‵lofa ki a ia? Kae e mafai pefea o fakaasi atu ne tatou a ‵tou a‵lofa ki te Atua?

3, 4. Kaia e mafai ei tatou o a‵lofa ki a Ieova?

³ “A te Atua se Agaga”; tela la, e se mafai o lavea ne tatou a ia. (Ioa. 4:24) E ui i ei, a te alofa ki a Ieova se mea e mafai o fai, kae ne fakatonu mai i te Tusi Tapu ke fakaasi atu ne tatou te alofa tenā. Pelā me se fakaakoakoga, ne fai atu a Mose ki te kau Isalaelu: “A‵lofa ki te Aliki [Ieova] te otou Atua mo otou loto kātoa, mo otou agaga kātoa, mo otou malosi kātoa.”—Teu. 6:5.

⁴ Kaia e mafai ei o ‵poko ‵tou a‵lofa ki te Atua? Me ne faite ne ia tatou fakatasi mo se manakoga ki mea faka-te-agaga kae tuku mai te malosi ki a tatou ke fakaasi atu te alofa. Kafai e ma‵kona ‵lei tatou i te feitu faka-te-agaga, ka tupu aka ‵tou a‵lofa ki a Ieova kae maua i ei ne tatou a te fiafia tonu. “E fia‵fia a latou kolā e iloa ‵lei ne latou olotou manakoga faka-te-agaga,” ko pati a Iesu, “me ka fai mō latou te Malo o te lagi.” (Mata. 5:3) Ne fai mai penei e uiga ki te mea telā e taku ne nisi tino me se manakoga i loto i tino ke tapuaki atu: “E ‵tau mo tatou o tumau i te ma‵taku kae āva malosi ke lavea ne tatou a te salasalaga a te tagata, mo te talitonu, ki se tino tafasili i te maluga.”—Man Does Not Stand Alone, by A. C. Morrison.

5. E iloa pefea ne tatou me e aoga ke salasala ki te Atua?

⁵ E mata, e se aoga ke salasala ki te Atua? E aoga, me e manako a ia ke ‵sala atu tatou ki a ia. Ne fakaasi manino mai ne te apositolo ko Paulo a te mea tenā i te taimi ne talai atu ei a ia ki se potukau o tino e maopoopo i te Aleopako. Ne lavea ‵lei a te mea tenā ne tupu mai i te Parthenon—te faletapu o Atena, te atua fafine o te kau Atenai. Fakaataata i tou mafaufau i a koe e nofo atu i konā i te faipatiga a Paulo e uiga ki te Atua telā “ne faite ne ia mai i te tagata e tokotasi a itukāiga o tino i fenua katoa ke ‵nofo i luga i te lalolagi kātoa, kae ko oti ne fakatapulā ne ia a taimi ‵tonu mo koga ke ‵nofo ei a tino, ko te mea ke ‵sala atu latou ki te Atua, me kafai e ‵sala malosi latou ki a ia kae ka maua eiloa ne latou a ia, me i a ia e se ‵mao mai i a tatou taki tokotasi.” (Galu. 17:24-27) Ao, e mafai ne tino o maua te Atua. E silia atu i te fitu mo te āfa miliona Molimau a Ieova ‘ko oti ne maua ne latou a ia’—kae a‵lofa tonu ki a ia.

6. Se a te mea ne taku mai ne Iesu me ko “te ‵toe fakatonuga sili kae tu muamua”?

⁶ A ‵tou a‵lofa ki a Ieova e ‵tau o vau mai te loto. Ne fakamanino mai ne Iesu a te mea tenā i te taimi ne fesili atu ei se Falesaio: “Te Faiakoga, se a te ‵toe fakatonuga sili i te Tulafono?” Ne fai atu a Iesu ki tou tagata: “ ‘E ‵tau mo koe o alofa ki a Ieova tou Atua mo tou loto kātoa mo tou foitino kātoa mo tou mafaufau kātoa.’ Tenei te ‵toe fakatonuga sili kae tu muamua.”—Mata. 22:34-38.

7. Se a te uiga ke alofa ki te Atua mo (a) ‵tou “loto kātoa”? (e) ‵tou “foitino kātoa”? (i) ‵tou “mafaufau kātoa”?

⁷ Se a te mea ne fakauiga a Iesu ki ei i tena faimaiga ke a‵lofa tatou ki te Atua mo ‵tou “loto kātoa”? Ne fakauiga a ia me e ‵tau mo tatou o a‵lofa ki a Ieova mo ‵tou loto kātoa, telā e fakamalosi aka i ei a ‵tou manakoga, faifaiga, mo lagonaga. E ‵tau foki mo tatou o a‵lofa atu ki a ia mo ‵tou “foitino kātoa,” io me ko ‵tou ola mo te olaga kātoa. E se gata i ei, e ‵tau mo tatou o a‵lofa ki te Atua mo ‵tou “mafaufau kātoa,” io me ko ‵tou iloa katoatoa. Ko tena uiga, e ‵tau o katoatoa ‵tou a‵lofa ki a Ieova, e aunoa mo te fakalotolotolua.

8. Se a te mea ka fakamalosi aka ei tatou ke fai ona ko te katoatoa o te alofa ki te Atua?

⁸ Kafai e a‵lofa tatou ki te Atua mo ‵tou loto, foitino, mafaufau kātoa, ka fai tatou mo tino a‵koga fakamaoni o tena Muna, tavini atu mo te loto kātoa e ‵tusa mo tena fuafuaga, kae talai atu mo te loto finafinau a te tala ‵lei o te Malo. (Mata. 24:14; Loma 12:1, 2) A te alofa tonu ki a Ieova ka fai ei ke ‵pili malosi atu tatou ki a ia. (Iako. 4:8) E tonu, e se mafai ne tatou o tusi ki lalo a pogai katoa e ‵tau ei o a‵lofa tatou ki te Atua. E ui i ei, ke mafau‵fau tatou ki nāi pogai konā.

9. Kaia e alofa ei koe ki a Ieova e pelā me ko ‵tou Mafuaga mo te Tino telā e tuku mai ne ia ‵tou mea?

⁹ A Ieova ko ‵tou Mafuaga mo te Tino telā e tuku mai ne ia ‵tou mea. “E auala i a ia ko maua ei ne tatou a te ola, e gasue‵sue, kae e iai foki tatou.” (Galu. 17:28) Ko oti ne tuku mai ne Ieova ki a tatou a ‵tou lalolagi gali mo ‵nofo. (Sala. 115:16) E tuku mai foki ne ia a mea‵kai mo nisi mea aka e manakogina ne tatou ko te mea ke ola tatou. Tela la, ne fai atu a Paulo ki tino ifo ki tupua i Lusa i “te Atua ola . . . ne tuku mai ne ia se molimau e auala i mea ‵lei ne fai ne ia, mai te tuku atu ki a koutou a vaiua mai te lagi mo tau o aso aoga, e faka‵fonu ei otou loto ki meakai mo te fiafia.” (Galu. 14:15-17) E mata, e se fai a te mea tenā mo pogai ke a‵lofa tatou ki ‵tou Mafuaga Sili mo te Tino telā e tuku mai ne ia ‵tou mea?—Fai. 12:1.

10. E ‵tau o ‵saga atu pefea tatou ki te fakatokaga a te Atua i te tapalega o te agasala mo te mate?

¹⁰ Ne fai ne te Atua ke mafai o tapale kea‵tea a te agasala mo te mate telā ne maua ne tatou mai i a Atamu. (Loma 5:12) E tonu, “ne fakaasi mai ne te Atua tena alofa ki a tatou i te taimi koi agasala ei tatou, me ne mate a Keliso mō tatou.” (Loma 5:8) E seai se fakalotolotolua, me ko ‵fonu ‵tou loto i te alofa ki a Ieova me ne fai ne ia ke mafai o fakamagalo ‵tou agasala māfai e sala‵mo tatou kae fakatuanaki ki te taulaga togiola a Iesu.—Ioa. 3:16.

11, 12. I auala fea ne tuku mai ei ne Ieova ki a tatou a te fakamoemoega?

¹¹ Ko Ieova ‘e tuku mai ne ia te fakamoemoega telā e faka‵fonu ei tatou ki te fiafia mo te filemu.’ (Loma 15:13) E fai ne te fakamoemoega mai te Atua ke mafai ne tatou o kufaki i tofotofoga o te fakatuanaki. A tino fakaekegina kolā e tumau i te ‘fakamaoni ke oko ki te mate ka tuku atu ki ei te foualiki o te ola i te lagi.’ (Faka. 2:10) A tino fakamaoni kolā e fakamoe‵moe ke ola i te lalolagi nei ka maua ne latou a fakamanuiaga se-gata-mai i te lalolagi Palataiso telā ne folafola mai. (Luka 23:43) Se a te tali masani a tatou ki fakamoemoega penā? E mata, e se ‵fonu tatou i te fiafia mo te filemu, e pelā foki mo te alofa ki te Tino telā e tuku mai ne ia a “meaalofa ‵lei katoatoa”?—Iako. 1:17.

¹² Ko oti ne tuku mai ne te Atua ki a tatou a te fakamoemoega fakamalosi loto o te toe‵tuga. (Galu. 24:15) E tonu, e fanoa‵noa malosi tatou māfai e mate se tino pele, kae ona ko te fakamoemoega o te toe‵tuga, ‘e se fanoa‵noa tatou pelā mo latou kolā e seai se fakamoemoega.’ (1 Tesa. 4:13) Ona ko te alofa, e manako a Ieova te Atua o toe faka‵tu aka a tino ‵mate, kae maise eiloa a tino fakamaoni pelā mo te tino amiotonu ko Iopu. (Iopu 14:15) Mafaufau ki te lasi o te fiafia ke toe fetaui mo tino kolā ka toe faka‵tu mai ki te ola i te lalolagi nei. Ka ‵fonu maligiligi ‵tou loto i te a‵lofa ki ‵tou Tamana faka-te-lagi telā ne tuku mai ne ia ki a tatou a te fakamoemoega fakaofoofogia o te toe‵tuga!

13. Se a te mea e fakatalitonu mai i ei i te Atua e atafai tonu mai ki a tatou?

¹³ E atafai ‵tonu mai a Ieova ki a tatou. (Faitau te Salamo 34:6, 18, 19; 1 Petelu 5:6, 7.) Ona ko te iloa ne tatou i ‵tou Atua alofa e toka faeloa o fesoasoani atu ki a latou kolā e fakamaoni ki a ia, e lagona eiloa ne tatou a te tokagamalie e pelā me ne vaega ‘o tena lafu mamoe.’ (Sala. 79:13) E se gata i ei, ka fakatalitonu mai te alofa o te Atua mō tatou i mea kolā ka fakataunu ne ia mō tatou e auala i te Malo faka-Mesia. Kafai ko oti ne fakaseai ne tena Tupu filifilia, ko Iesu Keliso, a amioga fakasauā, pulega sauā, mo amioga matagā mai te lalolagi, ka maua ne tino faka‵logo a te filemu se-gata-mai mo te manuia. (Sala. 72:7, 12-14, 16) E a, e lotomalie koe me e tuku mai i fakamoemoega penā a te pogai e ‵tau ei o a‵lofa atu tatou ki ‵tou Atua alofa atafai mo ‵tou loto, foitino, malosi, mo ‵tou mafaufau kātoa?—Luka 10:27.

14. Se a te tauliaga sē ‵togi ne tuku mai ne te Atua ki a tatou?

¹⁴ Ko oti ne tuku mai ne Ieova ki a tatou a te tauliaga sē ‵togi ke tavini atu ki a ia e pelā me ne ana Molimau. (Isa. 43:10-12) E a‵lofa tatou ki te Atua mō te tukumaiga o te avanoaga tenei ke ‵lago atu tatou ki tena pulega kae tuku atu te fakamoemoega  tonu ki tino i te lalolagi o fakalavelave tenei. I tafa i ei, e mafai ne tatou o fai‵pati atu i te fakatuanaki mo te loto talitonu me e talai atu ne tatou a te tala ‵lei mai te Muna a te Atua tonu, telā e se mafai o sē taunu ana tautoga. (Faitau te Iosua 21:45; 23:14.) Ao, a te fakasologa o fakamanuiaga mo pogai e ‵tau ei o a‵lofa tatou ki a Ieova e fano eiloa, e seai se gataga. Kae e mafai pefea o fakaasi atu ne tatou a ‵tou a‵lofa ki a ia?

15. E mafai pefea o fesoasoani mai te sukesuke mo te fakagaluegaga o te Muna a te Atua ki a tatou?

¹⁵ Sukesuke kae fakagalue faka‵lei te Muna a te Atua. I te faiga penā e fakaasi atu ei i a tatou e a‵lofa ki a Ieova kae ma‵nako tonu ki tena muna ke fai mo ‘mainaga ki ‵tou auala.’ (Sala. 119:105) Kafai e fe‵paki tatou mo fakalavelave, e maua ne tatou a fakamafanafanaga mai i fakatalitonuga a‵lofa penei: “E se ‵teke eiloa ne koe te tino loto maulalo kae loto salamo.” “Ko tou alofa tumau ne taofi ake ne ia au ki luga. I taimi e manavase kae sē toka ei au, ko koe e fakamafanafana kae fakafiafia mai ki a au.” (Sala. 51:17; 94:18, 19) E fakaasi atu ne Ieova te alofa fakamagalo ki a latou kolā e puapuagā, kae penā foki a lagonaga alofa o Iesu ki tino. (Isa. 49:13; Mata. 15:32) E mafai ne te sukesukega ki te Tusi Tapu o fai ke iloa ‵lei ne tatou a te manavase tonu o Ieova ki a tatou kae fai ei ke fakaasi atu te ‵poko o ‵tou a‵lofa ki a ia.

16. E mafai pefea ne te ‵talo faeloa o fai ke gasolo aka te ‵tou a‵lofa ki te Atua?

¹⁶ Ke ‵talo faeloa ki te Atua. E fai ne ‵tou ‵talo ke ‵pili malosi atu tatou ki te “Tino telā e fakalogologo ki ‵talo.” (Sala. 65:2, NW) Kafai e iloa ne tatou i te Atua e tali mai ki ‵tou ‵talo, e gasolo aka eiloa o ‵poko ‵tou a‵lofa ki a ia. Pelā me se fakaakoakoga, kāti ko oti ne lavea ne tatou me e se talia ne ia ke tofotofogina tatou ke silia atu i te mea e mafai ne tatou o fa‵ki i ei. (1 Koli. 10:13) Kafai e manava‵se tatou kae ‵talo atu ki a Ieova mo te loto talitonu, kāti ka maua eiloa ne tatou a te “filemu o te Atua.” (Fili. 4:6, 7) I nisi taimi, kāti e fai lēmū fua ne tatou se ‵talo—e pelā mo te mea ne fai ne Neemia—kae iloa aka me ko tali mai ki ei. (Nee. 2:1-6) I te “‵talo faeloa” o tatou kae iloa aka i a Ieova e tali mai ki ‵tou fakatagi, e tupu aka eiloa ‵tou a‵lofa ki a ia, kae penā foki mo ‵tou loto tali‵tonu me ka fesoasoani mai a ia ke mafai ne tatou o fa‵ki i tofotofoga e uke atu o te fakatuanaki.—Loma 12:12.

17. Kafai e a‵lofa tatou ki te Atua, ka ‵kilo atu pefea tatou ki te ‵kau ki fakatasiga?

 ¹⁷ Fai a te kau ki fakatasiga faka-Kelisiano, fono o fenua, mo fono o te atufenua mo fai se mea masani ki a koe. (Epe. 10:24, 25) Ne maopoopo te kau Isalaelu o fakalogo‵logo kae tauloto e uiga ki a Ieova ko te mea ke fakaaloalo atu latou ki a ia kae fakataunu a tena Tulafono. (Teu. 31:12) A te fai o te loto o te Atua e sē se amoga ‵mafa mafai e a‵lofa tonu tatou ki a ia. (Faitau te 1 Ioane 5:3.) Tela la, ke mo a e talia ne tatou so se mea ke fai ei tatou ke manatu ma‵ma ki te ‵kau ki fakatasiga. E mautinoa me e se ma‵nako tatou ke galo a te alofa ki a Ieova telā ne maua muamua ne tatou.—Faka. 2:4.

18. Se a te mea e fakamalosi aka ei tatou ne te alofa ki te Atua ke fai i te ‵soko tasi mo te tala ‵lei?

¹⁸ Fakaasi atu mo te loto finafinau “a te munatonu e uiga ki te tala ‵lei” ki nisi tino. (Kala. 2:5) E fakamalosi tatou ne ‵tou a‵lofa ki te Atua ke fai‵pati atu e uiga ki te Malo faka-Mesia o tena Tama pele, telā ka “tele atu i te auala o te munatonu” i Amaketo. (Sala. 45:4, NW; Faka. 16:14, 16) Mafāga o mea fakafiafia ke aofia tatou i te faiga o soko mai te fesoasoani atu ki tino ke tauloto e uiga ki te alofa o te Atua mo te lalolagi fou telā ne folafola mai ne ia!—Mata. 28:19, 20.

19. Kaia e ‵tau ei mo tatou o loto fakafetai ki te fakatokaga a te Atua mō te tausiga o tena lafu mamoe?

¹⁹ Ke fakaasi atu te loto fakafetai ki te fakatokaga a te Atua mō te tausiga a tena lafu mamoe. (Galu. 20:28) A toeaina Kelisiano se fakatokaga mai i a Ieova, telā e galue faeloa mō te ‵lei o tatou. E fai a toeaina “pelā me ne fale e ‵malu ei a tino mai i te matagi, pelā me ne koga e ‵lafi ei a tino mai i se afā. Ka pelā latou me ne vaitafe fo‵liki kolā e ‵tafe i loto i se toafa, pelā me se malūga o se kaupapa maluga i se fenua seai ne lakau i ei.” (Isa. 32:1, 2) Ko oko eiloa i te ma‵nako o tatou ki se koga ke ‵lafi ki ei mai i se matagi malosi io me mai i te fakamataku o se vaiua ‵to ‵lotu! Kafai ko ‵vela malosi mai te la ki a tatou, e fia‵fia malosi tatou ki te malūga o se kaupapa. E fesoasoani mai a tugāpati konei ke lavea ne tatou me e tuku mai ne toeaina a te fesoasoani faka-te-agaga telā e manakogina mo fakamalosiga. Mai te faka‵logo ki a latou kolā e fai ne latou te takitakiga i a tatou, e fakaasi atu ei ne tatou a te lasi o ‵tou loto fakafetai ki “tāgata e pelā me ne meaalofa” kae fakatalitonu atu foki i ei a ‵tou a‵lofa ki te Atua mo Keliso, te Ulu o te fakapotopotoga.—Efe. 4:8; 5:23; Epe. 13:17.

20. Kafai koe e alofa ki te Atua, ka saga atu pefea koe ki te Iakopo 1:22-25?

²⁰ Kafai e maua ne koe se fesokotakiga alofa mō Ieova, ka fai koe mo ‘tino telā e fakagalue te muna, kae e se ko te fakalogologo fua.’ (Faitau te Iakopo 1:22-25.) E maua ne te ‘tino telā e fakagalue’ te muna a te fakatuanaki telā e fakamalosi aka i ei a galuega pelā mo te talai atu mo te loto finafinau kae kau ki fakatasiga faka-Kelisiano. Ona ko koe e alofa tonu ki te Atua, ka fakalogo eiloa koe ki te “tulafono” ‵lei katoatoa a Ieova, telā e ufi ei a mea katoa kolā e manako a ia ke fai ne koe.—Sala. 19:7-11.

21. E mafai o faka‵tusa ki te a au ‵talo kolā e fai atu mo te loto kātoa?

²¹ Ka fai ne te alofa ki a Ieova te Atua ke ‵talo atu faeloa koe ki a ia mo te loto kātoa. I te fakasino atu mo te loto talitonu ki te ‵sunuga o mea ma‵nogi i aso takitasi mai lalo i te feagaiga o te Tulafono, ne usu atu te faisalamo ko Tavita: “Talia mai taku ‵talo, e pelā me se taulaga manogi ‵lei, mo oku lima e sisi ki luga pelā mo se taulaga i te afiafi.” (Sala. 141:2; Eso. 30:7, 8) Ke fai au fakatagi kolā e fai atu mo te loto maulalo, au fakamolemole, mo au pati tavae kae fakafetai ki te Atua e pelā me se taulaga manogi gali kae suamalie telā e fakauiga ki ‵talo kolā e taliagina.—Faka. 5:8.

22. Se a te vaegā alofa ka sautala tatou ki ei i te suā mataupu?

²² Ne fai mai a Iesu me e ‵tau mo tatou o a‵lofa ki te Atua mo ‵tou tuakoi foki. (Mata. 22:37-39) E pelā mo te mea ka lavea ne tatou i ‵tou sautalaga ki te uiga tenei, ka fesoasoani mai ‵tou a‵lofa ki a Ieova mo ana fakatakitakiga fakavae ke ‵lei ‵tou fesokotakiga mo tino kae fakaasi atu te alofa ki ‵tou tuakoi.