Kai faitau faka‵lei koe ki lōmiga fakamuli nei o Te Faleleoleo Maluga? Ko ‵lei la, onoono aka me e mafai ne koe o tali mai a fesili kola e ‵soko mai:

Ko te taimi e ‵tau ei o ta a te tamā mamoe o te Paseka i a Nisani 14?

E fai mai a nisi ‵fuliga o te Tusi Tapu me e ‵tau o ta i te “va o afiafi e lua,” ko tena uiga ko te taimi koi maina ei mai tua o te ‵toga o te lā mo te taimi mai mua o pouli. (Eso. 12:6)—12/15, itulau e 18-19.

Ne a fakatakitakiga fakavae mai te Tusi Tapu e mafai o fakaaoga ne talavou i te faiga o filifiliga ‵poto?

A fakatakitakiga fakavae e tolu ko te (1) ‵Sala muamua ki te Malo o te Atua mo tena amiotonu. (Mata. 6:19-34) (2) Ke maua te fiafia i te tavini atu ki nisi tino. (Galu. 20:35) (3) Ke fiafia o tavini atu ki te Atua a koi talavou koe. (Fai. 12:1)—1/15, itulau e 19-20.

Ne a tāgata e tokofa kolā ko leva ne ‵tele mai luga i solofanua talu mai te 1914?

E pelā me ko te tino telā e tele i luga i te solofanua ‵kena, ko oti ne gasuesue a Iesu o faka‵ma a lagi mai te tapalega o Satani mo ana temoni mai i ei. E fakaata mai i te tino telā e tele i luga i te solofanua ‵kula a taua kolā ne logo‵mae i ei a tino. A te tino telā e tele i te solofanua uli e fakaata mai i ei a te oge mea‵kai. Kae ko te tino telā e tele i luga i te solofanua lanu kenakena e aumai ne ia te mate e auala i mala mo masaki kolā ne ‵mate i ei te fia miliona o tino. (Faka. 6:2-8)—2/1, itulau e 6-7.

E fai māfea “te fakaipoipoga a te Tamā Mamoe”? (Faka. 19:7)

“Te fakaipoipoga a te Tamā Mamoe” e fai māfai ko oti ne manumalo katoatoa a te Tupu, ko Iesu Keliso, ko tena uiga, mai tua o te fakaseaiga o Papelonia te Sili mo te taua o Amaketo.—2/15, itulau e 10.

Kaia ne “‵nofo fakatali‵tali” ei a tino Iutaia i aso Iesu ki te Mesia? (Luka 3:15)

E se mafai o fakaiku aka ne tatou me ne malamalama a tino Iutaia i te senitenali muamua i te valoaga a Tanielu e uiga ki te Mesia e pelā mo tatou. (Tani. 9:24-27) Kāti ne lagona ne latou me e isi se fakapulaga ne fai atu ne agelu ki nisi leoleo mamoe io me ko pati a te pelofeta fafine ko Ana i te laveaga ne ia a te pepe ko Iesu i te faletapu. E penā foki a tino iloilo fetu kolā ne ‵mai o salasala ki “te tupu o Iutaia telā ko oti ne fanau mai.” (Mata. 2:1, 2) Fakamuli ifo, ne fai mai a Ioane te Papatiso me ko pili o sae mai te Keliso.—2/15, itulau e 26-27.

Se a te auala e mafai ei o sē fai ‵tou Ao mo fai te Ikai? (2 Koli. 1:18)

E mautinoa me e isi se mea telā e se mafai o pule tatou ki ei kae fai ei ke faigata o tausi tatou ki ‵tou pati i nisi taimi. Kae kafai e fai ne tatou se tautoga io me se feagaiga, e ‵tau o fai ne tatou a te ‵toe mea e mafai ke tausi ki ei.—3/15, itulau e 32.

E mafai pefea o ‵teke atu tatou ki te fakaosoosoga ke kilo‵kilo ki se ata masei?

A auala fesoasoani e tolu ko te (1) ‵Fuli fakavave a ‵tou kilokiloga māfai ko ‵sae aka a mafaufauga mo lagonaga ma‵sei. (2) Puipui ‵tou mafaufauga mai te ‵saga atu fua ki mea ‵tonu kae ‵talo ki te Atua. (3) Puipui ‵tou auala mai ‵kalo kea‵tea mai i ata mo Web sites kolā e maua i ei ata ma‵sei.—4/1, itulau e 10-12.

Ne a ikuga seki fakamoemoegina e mafai o maua māfai e tiakina ne se Kelisiano a tena kāiga kae fano o galue i te suā fenua ke maua a tupe?

Kafai e filifili a mātua ke sē ola fakatasi latou e pelā me se kāiga, e mafai o pokotia i ei a lagonaga mo amioga ‵lei a tamaliki. E mafai loa o ita fakamoemoe latou ki mātua. Kae kāti e mafai o fakaosoosogina a tino ma‵tua kolā e nofo ‵mao mai i olotou avaga ki faifaiga fakatauavaga.—4/15, itulau e 19-20.

Kaia e fatifati ei a vae o pagota kolā e fakasala i luga i te lakau fakasauā?

Ne fakasala ne te kau Loma a nisi pagota i luga i se lakau fakasaua. Ne fakamolemole atu ki tino Iutaia ke fatifati a vae o pagota kolā i tafa o Iesu. Ka fai ne te mea ke faigata malosi atu a te manava o te pagota kae mate vave i ei. Tela la, e se ‵tau o fakatautau i luga i se lakau fakasaua i te po kātoa. (Teu. 21:22, 23)—5/1, itula e 11.

Ne a fesili e fa e ‵tau o masaua ne tatou māfai e olo tatou ki tino i ‵tou galuega talai?

Ko oi latou? Tefea te koga e fano ei au ki a latou? Ko te taimi fea e fano ei au ki a latou? Se a te auala e ‵tau ei au o fanatu ki a latou?—5/15, itulau e 12-15.

E pefea te masei o te ‵pusi?

I te senitenali ko teka, e ‵tusa mo te 100,000,000 tino ko oti ne ‵mate i te ‵pusi. Fakamuli nei, e nofo ki 6,000,000 tino i te tausaga e ‵mate i ‵pusi.—6/1, itulau e 3.