1, 2. Se a te auala e fesokotaki ei a Ieova mo ana tavini?

I TALA fakasolopito o te Tusi Tapu, ne maua ne tino taki tokotasi te takitakiga a Ieova i auala kese‵kese. Ki nisi tino, ne faipati atu te Atua ki a latou e auala i se agelu io me e auala i se fakaasiga io me se moemiti, e fakaasi atu ei ki a latou a mea ka ‵tupu i te taimi mai mua. Ne tuku atu foki ne Ieova ki a latou ne galuega fakapito ke fai. (Nume. 7:89; Eseki. 1:1; Tani. 2:19) Ne maua ne nisi tino a fakatakitakiga e auala i sui o Ieova kolā e ga‵lue i te vaega faka-te-lalolagi o tena fakapotopotoga saukātoa. Faitalia me se a te auala ne maua ei ne tino o Ieova a tena Muna, ne fakamanuiagina eiloa latou kolā ne tau‵tali i ana fakatonuga.

² E takitaki ne Ieova ana tino i aso nei e auala i te Tusi Tapu, tena agaga tapu, mo te fakapotopotoga. (Galu. 9: 31; 15:28; 2 Timo. 3: 16, 17) E manino ‵lei a te takitakiga telā e maua ne tatou mai i a ia, e pelā eiloa me e ‘lagona ne tatou ki ‵tou taliga a te leo mai ‵tou tua e fai penei: “Tenei te auala. Tautali i ei.”’ (Isa. 30:21) A te tonuga loa, e fakaoko mai foki ne Iesu a te leo o Ieova ki a tatou i te takitakiga o te fakapotopotoga e auala i “te tavini fakamaoni kae poto.” (Mata. 24:45) E tāua ‵ki ke ‵saga tonu tatou ki te takitakiga mo te fakatonuga tenei, me i te mauaga ne tatou a te ola se-gata-mai e fakalagolago ki ‵tou faka‵logo ki ei.—Epe. 5:9.

3. Se a te mea e mafai o fakalavelave mai ki te ‵saga tonu atu o tatou ki te fakatonuga a Ieova? (Ke onoono ki te ata i te kamataga.)

 ³ E fakamoemoe a Satani te Tiapolo o fakaseaoga a te fesoasoani e maua ne tatou mai i a Ieova. E se gata i ei, e mafai o fakalavelave mai a ‵tou ‘loto faka‵se tino’ ki te ‵saga tonu atu o tatou ki fakatonuga a Ieova. (Iele. 17:9) Tela la, ke mafaufau tatou ki auala e mafai ei o manumalo tatou i fakalavelave kolā e fakafaigata i ei a te faka‵logo o tatou ki te leo o te Atua. Ke sautala foki tatou ki te auala e puipui ei ‵tou fesokotakiga mo Ieova ne te ‵pili o tatou ki a ia faitalia me ne a ‵tou fakanofonofoga.

4. Se a te auala e taumafai ei a Satani o faka‵se a mafaufauga o tino?

⁴ E taumafai a Satani o faka‵se a mafaufauga o tino mai te tukuatuga o fakamatalaga mo tala ‵loi. (Faitau te 1 Ioa. 5:19.) I tafa o nusipepa, e salalau a tala i te lalolagi kātoa e auala i te letio, TV, mo te Itaneti. Faitalia me e mafai o ‵sae mai i ei ne mea ‵lei, e masani o fakamalosi aka ne latou amioga mo tulaga kolā e ‵kese mo tulaga o Ieova. (Iele. 2:13) Pelā me se fakaakoakoga, e fai‵pati a kamupane fakasalalau tala mo fakafiafiaga ki te avaga o te tagata ki te tagata mo te fafine ki te fafine e pelā me se faifaiga masani, kae mafau‵fau a tino e tokouke i pati a te Tusi Tapu e uiga ki te faifaiga tenā e pelā me ko tō ma‵sei.—1 Koli. 6:9, 10.

5. E mafai pefea o ‵kalo tatou kea‵tea mai i aofaga fakaloiloi a Satani?

⁵ Se a te auala e mafai ei o ‵kalo kea‵tea a latou kolā e a‵lofa ki te amiotonu o te Atua mai i aofaga fakaloiloi a Satani i aso nei? E mafai pefea o ‵vae ne latou a te ‵lei mai te masei? “I te faka‵logo ki au tulafono”! (Sala. 119:9) E maua i te Muna tusia a te Atua a fakatakitakiga ‵lei kolā e mafai ei ne tatou o faka‵kese a fakamatalaga ‵tonu mai i fakamatalaga ‵loi. (Faata. 23:23) I te sikimaiga o pati i te Tusi Tapu, ne fai mai a Iesu me i te tagata e ‵tau o ola i “pati katoa kolā e ‵to mai i te gutu o Ieova.” (Mata. 4:4) E ‵tau mo tatou o tauloto ki te auala e fakagalue aka ei a fakatakitakiga fakavae mai te Tusi Tapu i ‵tou olaga. Pelā me se fakaakoakoga, i se taimi leva mai mua o tusi ne Mose a te tulafono a Ieova e ‵teke atu ei ki te mulilua, ne malamalama a te tamataene ko Iosefa me i te amio penā se agasala ki te Atua. Ne seki mafaufau lele tou tagata ke sē fakalogo a ia ki a Ieova i te taimi ne taumafai ei te avaga a Potifala o fakakolekole a ia ke fai a te agasala. (Faitau te Kenese 39:7-9.) E ui eiloa ne fakamalosi atu tou fafine ki a ia mō se vaitaimi, ne seki talia ne Iosefa a te leo o tou fafine ke faka‵tuli ana taliga ki te leo o te Atua. A te faka‵logo ki te leo o Ieova kae ‵pono ‵tou taliga mai fakamatalaga fakaloiloi a Satani e mafai ei ne tatou o faka‵kese a te mea tonu mai te mea ‵se.

6, 7. Se a te mea e ‵tau o fai ne tatou ke ‵kalo kea‵tea mai fakamalosiga ma‵sei a Satani?

⁶ Ko ‵fonu te lalolagi i akoakoga mo talitonuga kese‵kese fakalotu kolā e mafau‵fau a te tokoukega o tino me ko sē aoga ke ‵sala atu ki te tapuakiga tonu. E ui i ei, ne fai ne Ieova ke manino ‵lei a tena takitakiga ki a latou kolā e fia‵fia o fakaaoga. E ‵tau o fakaiku aka ne tatou me ko oi ka faka‵logo tatou ki ei. Ona ko te mea e se mafai te tino o fakalogo ki leo e lua i te taimi e tasi, e manakogina ke iloa ne tatou ‘te leo’ o Iesu kae  faka‵logo ki a ia. Ko ia telā ne filifili ne Ieova ke pule atu ki Ana mamoe.—Faitau te Ioane 10:3-5.

⁷ “‵Saga tonu ki mea kolā e lagona nei ne koutou,” ko pati a Iesu. (Male. 4:24) E manino kae ‵tonu a pati fakatonutonu mai i a Ieova, kae e ‵tau mo tatou o ‵saga tonu kae faka‵logo ki ei mai te fakatokatoka o ‵tou loto ke talia a mea konā. Kafai e se fakaeteete tatou, e mafai o faka‵logo ‵tou taliga ki fakamalosiga ma‵sei a Satani i lō te faka‵logo ki pati fakatonutonu a‵lofa a te Atua. Ke mo a eiloa e talia ne koe a pese o te lalolagi, vitio, ata i TV, tusi, taugasoa, faiakoga, io me ko tino ‵poto ke pule atu ki tou olaga.—Ko. 2:8.

8. (a) E faka‵se pefea tatou ne ‵tou loto ke tuku faka‵sau atu ki togafiti a Satani? (e) Se a te mea e mafai o tupu ki a tatou māfai e fakata‵mala tatou o faka‵logo ki faka‵pulaga?

⁸ E iloa ne Satani me e isi ne ‵tou manakoga agasala, kae taumafai a ia o fakamalosi tatou ke ‵saga tonu ki ei. Kafai e taumafai a Satani o takitaki ‵se tatou i te auala tenei, ka gasolo o faigata ke fakatumau ‵tou fakamaoni. (Ioa. 8:44-47) E mafai pefea o manumalo tatou i te fakafesagai atu ki ei? Ke mafaufau ki se tino telā ne fiafia malosi o fai a mea mō se taimi toetoe kae iku atu ki te faiga o se mea ‵se telā ne manatu aka tou tagata me ka sē mafai lele eiloa o fai ne ia. (Loma 7:15) Se a te pogai ne oko atu ei ki te tulaga fakafanoanoa tenei? E se taumate, ne gasolo malielie eiloa o sē lagona ne tou tagata a te leo o Ieova. Kāti ne fakatamala a ia o fakalogo ki te faka‵pulaga e uiga ki te mea ko tupu ki tena loto io me ne filifili eiloa tou tagata ke ‵teke atu ki ei. Pelā me se fakaakoakoga, kāti ne fakagata ne ia a te talo sāle, sē kau sāle ki te galuega talai, io me ko kamata o galo sāle i fakatasiga. I te fakaotiga, ne talia ne tou tagata a tena manakoga kae fai a te mea telā e iloa ne ia me e ‵se. E mafai o puipui tatou mai i se mea ‵se fakamataku penā māfai e tumau tatou i te matapula‵pula ki so se faka‵pulaga kae gasue fakavave o faka‵tonu a mea ‵se. Kae kafai e faka‵logo tatou ki te leo o Ieova, ka sē fia‵fia lele tatou ki so se manatu fakaaposetate.—Faata. 11:9.

9. Kaia e tāua ‵ki ei ke iloa fakavave a ‵tou manakoga agasala?

⁹ A te vave o iloa te masaki e sao i ei te ola o te tino. I se auala e tai ‵pau, e mafai o ‵kalo tatou kea‵tea mai i se fakalavelave māfai e vave o iloa ne tatou a manakoga kolā e ‵taki atu ei tatou ki tofotofoga. I te taimi eiloa e iloa ei ne tatou a manakoga penā, se mea poto ke gasue‵sue fakavave tatou o fai se faiga —koi tuai tatou o ‘‵po ne Satani ke fai tena loto.’ (2 Timo. 2:26) Se a te mea e ‵tau o fai ne tatou māfai ne talia ne tatou a ‵tou mafaufauga mo manakoga ke tapea‵pea kea‵tea mai te mea telā e manako a Ieova ke fai ne tatou? E aunoa mo te fakatalave, e ‵tau o toe ‵foki atu tatou ki a ia mo te loto maulalo, talia ana pati  fakatonutonu, kae faka‵logo ki a ia mo ‵tou loto kātoa. (Isa. 44:22) E ‵tau o malamalama tatou me i te faiga o se fakaikuga ‵se e mafai o pa‵kia malosi tatou i ei kae logo‵mae i ikuga matagā i te olaga tenei. Se mea tafasili i te ‵lei ke gasue‵sue fakavave tatou o puipui tatou mai te faiga o se agasala matagā ko te mea ke sē ‵sipa tatou kea‵tea!

10, 11. (a) E mafai pefea o lavea a te uiga fakamatamata? (e) Se a te akoakoga e tauloto ne tatou mai te auala masei o Kola, Tatano, mo Apilamo?

¹⁰ E ‵tau o iloa ne tatou me e mafai ne ‵tou loto o takitaki ‵se tatou. E ma‵losi a manakoga agasala i luga i a tatou! Pelā me se fakaakoakoga, ke mafaufau ki te fakamatamata mo te kaimanako. Mafaufau ki te auala e mafai ei ne uiga takitasi konei o fakalavelave mai ki te faka‵logo o tatou ki te leo o Ieova kae iku atu ei tatou ki se auala fakamataku. A te tino fakamatamata e fakamaluga ne ia a ia eiloa. Kāti e manatu aka tou tagata me e saoloto a ia o fai so se mea e manako a ia ki ei kae seai se tino e ‵tau o fakatonu atu ki a ia. Tela la, e mafai o manatu aka a ia me e sili atu a ia i fakatonuga mo pati fakatonutonu a taina Kelisiano, toeaina, ke oko foki ki te fakapotopotoga saukātoa a te Atua. Ki se tino penā, a te leo o Ieova e gasolo ifo eiloa o sē lagona ne ia.

¹¹ I te taimi ne olo ei a te kau Isalaelu i loto i te koga lavaki, ne ‵teke atu a Kola, Tatano, mo Apilamo ki te pulega a Mose mo Alona. Ona ko te fakamata‵mata, ne fai ei ne tino ‵teke ne fakatokaga ‵kese ke tapuaki atu ki a Ieova. Ne tali atu pefea a Ieova ki ei? Ne fakasala ne ia latou ki te mate. (Nume. 26:8-10) Ko oko eiloa i te tāua o te akoakoga e tauloto ne tatou mai te tala tenei! A te ‵teke ki a Ieova e iku atu ki fakalavelave. Ke masaua foki ne tatou i “te fakamatamata e iku ki te malaia.”—Faata. 16:18; Isa. 13:11.

12, 13. (a) Tuku mai se fakaakoakoga e fakaasi mai i ei a te auala e mafai o iku atu a te kaimanako ki se fakalavelave. (e) Fakamatala mai te auala e mafai ei o tupu fakavave aka a te kaimanako māfai e se pule faka‵lei ki ei.

¹² Ke mafaufau foki ki te kaimanako. A te tino kaimanako e masani o fakaaoga ne ia a tena saolotoga kae soli i ei a tapulā o te faiga o amioga ‵lei. I te otiga ne faka‵lei a te lepela o te takitaki kautau o Sulia ko Namanu, ne tuku atu ne ia a meaalofa ki te pelofeta ko Elisaia kae ne ita ma puke ki ei. Kae ko Keasi, te tino fesoasoani ki a Elisaia, ne manako malosi ki meaalofa konā. Ne fai ifo a Keasi ki a ia eiloa: “I te igoa o te Aliki ola, au ka tele atu i ona tua ke maua mai se mea mai i a ia.” Ne tele atu tou tagata mai tua o Namanu kae fakaaoga a loi e uke ke maua ne ia se “tolu afe siliva kae lua gatu ‵fou.” Se a te mea ne tupu ona ko te fai ne Keasi a te mea tenei kae loi ki te pelofeta a Ieova? Ne ‵pisi atu te lepela o Namanu ki te tino kaimanako ko Keasi!—2 Tupu 5:20-27.

¹³ Kāti e mafai o sae malie aka a te uiga kaimanako i te kamataga, kae kafai e se pule faka‵lei ki ei, e mafai o tupu fakavave aka kae pule atu ki luga i te tino. E fakaasi mai i te tala o Akana i te Tusi Tapu a te malosi o te kaimanako. Onoono la ki te vave o tupu aka a te kaimanako o Akana. Ne fai mai tou tagata: “Mai mea kolā ne puke ne matou, ne matea ne au se gatu Papelonia ko oko eiloa i te gali, e lua kilokalame o siliva mo te potu aulo e silia atu i te āfa kilokalame i te ‵mafa. Ne manako malosi ki ei toku loto telā ne puke ei ne au.” I lō te ‵teke atu ki te manakoga masei, ne kaisoa eiloa ne Akana a mea ona ko te kaimanako kae ‵funa i loto i tena faleie. I te taimi ne iloa aka ei a te agasala a Akana, ne fai atu a Iosua ki tou tagata me ka aumai ne Ieova a fakalavelave ki luga i a ia. Ne peipei a Akana mo tena kāiga ki fatu ke ‵mate i te aso eiloa tenā. (Iosu. 7:11, 21, 24, 25) A te kaimanako se mea fakamataku telā e mafai faeloa o tupu ki a tatou. Tela la, e ‵tau mo tatou o “fakaeteete i vaega katoa o te kaimanako.” (Luka 12:15) E ui eiloa e oko mai ki a tatou se mafaufauga sē ‵lei i nisi taimi io me mafau‵fau ki mea matagā, e tāua ‵ki ke pule faka‵lei tatou ki ‵tou mafaufau kae ke sē talia ne tatou a ‵tou manakoga ke oko ki te tulaga telā ko fai ei ne tatou se agasala.—Faitau te Iakopo 1:14, 15.

14. Se a te mea e ‵tau o fai ne tatou māfai e fakamalosigina a manakoga i loto i a tatou ne te fakamatamata mo te kaimanako?

 ¹⁴ A te fakamatamata mo te kaimanako e iku atu ki fakalavelave. A te mafaufau ki te ikuga o te kausaki atu i se auala ‵se ka fesoasoani mai ke sē talia ne tatou a manakoga penā ke fakagalo aka ei a te leo o Ieova. (Teu. 32:29) I loto i te Tusi Tapu, e se fakaasi mai fua ne te Atua tonu a te auala tonu ki a tatou, kae e fakamatala mai foki i ei a te aoga o te sasale i ei e pelā foki mo ikuga o te fano i te auala ‵se. Kafai e fakagasue‵sue tatou ne ‵tou loto ke fai se mea telā e fakamalosi aka ne te fakamatamata io me ko te kaimanako, se mea ‵lei ke mafaufau ki ikuga kolā ka maua mai i ei! E ‵tau mo tatou o mafau‵fau ki te auala ka pokotia ei tatou, ‵tou tino pele, kae maise eiloa a ‵tou fesokotakiga mo Ieova.

15. Se a te mea e mafai o tauloto ne tatou mai te fakaakoakoga a Iesu e uiga ki tena fesokotakiga mo Ieova?

¹⁵ E manako a Ieova ke maua ne tatou a te ‵toe mea ‵lei. (Sala. 1:1-3) E tuku mai ne ia a fakatakitakiga e lava māfai e ma‵nako tatou ki ei. (Faitau te Epelu 4:16.) E tigā eiloa e ‵lei katoatoa a ia, ne fakalagolago a Iesu ki te fesokotakiga tumau mo Ieova, kae ne ‵talo faeloa a ia. Ne fakamalosi kae takitaki ne Ieova a Iesu i auala fakaofoofogia. Ne uga mai ne ia agelu ke tavini atu ki a ia, tuku mai Tena agaga tapu o fesoasoani ki a ia, kae fakatonutonu a ia i te filifiliga o apositolo e toko 12. Ne lagona te leo o Ieova mai te lagi, e fakaasi mai i ei a Tena ‵lago kae talia ne ia a Iesu. (Mata. 3:17; 17:5; Male. 1:12, 13; Luka 6:12, 13; Ioa. 12:28) E pelā mo Iesu, e ma‵nako tatou o fakaasi atu a mea i ‵tou loto ki te Atua e auala i te ‵talo. (Sala. 62:7, 8; Epe. 5:7) E auala i te ‵talo, e mafai eiloa o ‵pili ‵tou fesokotakiga mo Ieova kae tau‵tali mo te manuia i se auala telā e tavae atu ei ki a ia i ‵tou olaga.

16. E mafai pefea o maua ne tatou te fesoasoani o Ieova ke mafai o lagona ne tatou a tena leo?

¹⁶ Faitalia me e fai ne Ieova ke maua ne tatou ana pati fakatonutonu, e se faimālō ne ia so se tino ke tautali i ei. E ‵tau o fakamolemole atu tatou ki tena agaga tapu, kae ka tuku mai ne ia ki a tatou mo te kaimalie. (Faitau te Luka 11:10-13.) E ‵tau mo tatou o ‘‵saga tonu ki te auala e fakalogo‵logo ei tatou.’ (Luka 8:18) Pelā me se fakaakoakoga, kafai e fakamolemole koe ki a Ieova ke fesoasoani mai ke manumalo koe i se manakoga ke fai te amioga masei kae tumau eiloa koe i te kilokilo ki ata ma‵sei, a te mea tenā se amioga fakaloiloi. E manakogina ke ‵nofo tonu tatou i koga mo fakanofonofoga kolā e maua i ei te agaga o Ieova. E iloa ‵lei ne tatou me e fakatasi a tena agaga ki fakatasiga a te fakapotopotoga. E tokouke a tavini a Ieova ko oti ne ‵kalo kea‵tea mai i fakalavelave ona ko te faka‵logo ki a Ieova i taimi o fakatasiga. Ne iloa aka ne latou i ei a manakoga ma‵sei kolā ne ‵tupu aka i olotou loto kae faka‵tonu ne latou olotou auala.—Sala. 73:12-17; 143:10.

17. Kaia e fakamataku ei a te fakalagolago ki a tatou eiloa?

¹⁷ Ke mafaufau ki te tupu o Isalaelu ko Tavita. A koi tamataene a ia, ne manumalo tou tagata i te toa o Filisitia ko Koliata. Ne fai a Tavita e pelā me se sotia, se tupu, se tino puipui, mo se tino e fai fakaikuga mō te fenua. Kae i te taimi ne fakalagolago ei a Tavita ki a ia eiloa, ne fakaloiloi a ia ne tena loto kae ne fai ne ia mo Patisepa se agasala matagā, ke oko foki ki te faiga o aofaga ke tamate te avaga o tou fafine, ko Ulia. I te taimi ne polopoloki ei, ne loto maulalo a Tavita o fakaasi tonu a tena mea ‵se kae toe ati aka i ei a tena fesokotakiga mo Ieova.—Sala. 51:4, 6, 10, 11.

18. Se a te mea e mafai o fesoasoani mai ke tumau tatou i te faka‵logo ki te leo o Ieova?

¹⁸ Ke faka‵logo tatou ki te fakatakitakiga telā e maua i te 1 Kolinito 10:12 kae ke mo a e tō tali‵tonu ki a tatou eiloa. Me e se mafai ne tatou o ‘fakatonu ‵tou ala,’ ka mafai o faka‵logo tatou ki te leo o Ieova io me ko te leo o tena Fili. (Iele. 10:23) Ke ‵talo faeloa tatou, tau‵tali i te takitakiga a te agaga tapu, kae faka‵logo faeloa ki te leo o Ieova.