E tāua ‵ki te fesili kae maise eiloa ki a latou kolā ne galo atu se lotou tino pele. Kāti e ma‵nako malosi a tino penā ke toe ‵nofo fakatasi latou mo olotou avaga kolā ka toe faka‵tu aka i te lalolagi fou. Ne fai mai se tagata e tokotasi telā ko oti ne mate atu tena avaga: “Ne seki filifili ne au mo taku avaga ke fakagata te mā olaga avaga. Ne ma‵nako malosi māua ke tumau i te tapuaki fakatasi e pelā me se tauavaga ke oko loa ki te se-gata-mai. Ne seki ‵fuli eiloa a lagonaga konei i luga i a au.” E mata, e isi se pogai ‵lei ke fakamoemoe me i tino kolā ka toe faka‵tu mai ka mafai o toe a‵vaga? A te tali faigofie ki ei, e se iloa ne tatou.

I tausaga e uke, ne fai mai i ‵tou lōmiga me i pati a Iesu e uiga ki te toe‵tuga kae avaga kāti ne fakasino atu ki te toe‵tuga i te lalolagi, kae ko latou kolā e faka‵tu aka ki te ola i te lalolagi fou ka sē a‵vaga eiloa. * (Mata. 22:29, 30; Male. 12:24, 25; Luka 20:34-36) E ui eiloa e se iloa tonu ne tatou, e mata, e mafai o fakasino atu a pati a Iesu ki te toe‵tuga i te lagi? Ke suke‵suke tatou ki pati a Iesu.

Mafaufau ki te fakanofonofoga. (Faitau te Luka 20:27-33.) Ne taumafai a te kau Satukaio, kolā e se tali‵tonu ki te toe‵tuga, o faka‵se a Iesu ki se fesili e uiga ki te toe‵tuga mo te a‵vaga o te tautaina. * Ne tali atu a Iesu: “E a‵vaga a tama‵liki o te olaga masani tenei kae tuku atu foki ke a‵vaga, kae ko tino kolā e ‵tau o maua ne latou te olaga i aso mai mua mo te toe‵tuga mai te mate e se a‵vaga io me e se tuku atu ke a‵vaga. E tonu, ka se toe ‵mate foki latou, me ka fai latou e pelā mo agelu, kae ko latou ko tama a te Atua me ne toe faka‵tu mai latou.”—Luka 20:34-36.

Kaia ne fai mai ei ‵tou lōmiga me kāti ne faipati a Iesu e uiga ki te toe‵tuga i te lalolagi? Ne fakavae eiloa te fakaikuga tenā ki pogai e lua. Te mea muamua, ne fai mai me kāti ne mafau‵fau te kau Satukaio ki te toe‵tuga i te lalolagi, tela la, a Iesu ne tali ‵tonu atu eiloa ki a latou. Te lua o mea, ne fakaoti ne Iesu a tena tali mai te fakasino atu ki a Apelaamo, Isaako, mo Iakopo—ko toeaina fakamaoni kolā e ‵tau o toe faka‵tu aka ki te ola i te lalolagi.—Luka 20:37, 38.

E ui i ei, e foliga mai me kāti ne mafaufau a Iesu ki te toe‵tuga i te lagi. Se a te fakavae e mafai ei o fakaiku aka ne tatou penā? Ke mafau‵fau tatou ki tugāpati fakavae e lua.

“Telā e iku atu ki te mauaga ne koutou . . . te otou kalagaga.” E ‵tau eiloa o maua ne te kau fakaekegina a “te Malo o te Atua.” (2 Tesa. 1:5, 11) Ko oti ne taku amiotonugina latou mō te ola e fakavae ki te togiola, tela la, e se ‵mate latou e pelā me ne tino agasala. (Loma 5: 1, 18; 8:1) E taku a tino konā e pelā me “e fia‵fia kae tapu” kae e ‵tau eiloa o toe faka‵tu ki te lagi. (Faka. 20:5, 6) E ‵kese mai i ei, a latou kolā e toe faka‵tu ki te ola i te lalolagi ka aofia i ei a “tino amio sē ‵tonu.” (Galu. 24:15) E mata, e mafai o fai atu me e “iku atu ki te mauaga” ne latou o te toe‵tuga?

“E tonu, ka se toe ‵mate foki latou.” Ne seki fai mai a Iesu: “A latou ka sē toe ‵mate eiloa.” I lō  te fai penā, ne fai mai a ia: “E tonu, ka se toe ‵mate foki latou.” E fai penei a nisi ‵fuliga ki ei: “E se oko latou ki te mate” kae “ka fakaseai atu te mate ki te se-gata-mai.” A tino fakaekegina kolā ne oti te lotou olaga faka-te-lalolagi i te fakamaoni e toe faka‵tu ki te lagi kae tuku atu ki ei te ola e se mafai o toe mate—e se-gata-mai kae sē mafai o toe fakamasei. (1 Koli. 15:53, 54) Ko se toe ai se malosi o te mate i luga i a latou kolā e toe‵tu ki te lagi. *

E ‵tusa mo mea ne fatoa fai‵pati ki ei, se a te mea e ‵tau o fakaiku aka ne tatou? E mafai eiloa o fakasino atu a pati a Iesu e uiga ki te toe‵tuga mo te avaga ki te toe‵tuga i te lagi. Kafai e penā, ko tena uiga, e fakaasi mai i ana pati ki a tatou a nisi mea e uiga ki a latou kolā e toe‵tu ki te ola i te lagi: A latou e se a‵vaga, e se mafai latou o ‵mate, e fai latou pelā mo agelu i nisi feitu—ko tino faka-te-agaga kolā e ‵nofo i te lagi. E faka‵sae aka ne se fakaikuga penā a nāi fesili.

A te mea muamua, kaia ne mafaufau ei a Iesu ki te toe‵tuga ki te lagi i te taimi ne tali atu ei ki te kau Satukaio kolā e se taumate e mafau‵fau ki se toe‵tuga i te lalolagi? Ne seki tali atu faeloa a Iesu ki ana tino ‵teke i te auala telā e mafau‵fau latou ki ei. Pelā me se fakaakoakoga, i tena tali ki te kau Iutaia kolā ne ma‵nako ki se fakailoga mai i a ia, ne fai atu a ia: “Lepe ki lalo te faletapu tenei, kae ka toe fakatu aka ne au i aso e tolu.” E se taumate ne iloa ne Iesu me ne mafau‵fau latou e uiga ki te faletapu, “kae ne faipati eiloa a ia ki te faletapu telā ko tena foitino.” (Ioa. 2:18-21) Kāti ne manatu aka a Iesu me e se ‵tau o tali atu ki te kau Satukaio sē fakamaoni kolā e se tali‵tonu ki te toe‵tuga io me ko te kau agelu. (Faata. 23:9; Mata. 7:6; Galu. 23:8) E ui i ei, kāti ne manako a ia o fakaasi atu a muna‵tonu e uiga ki te toe‵tuga ki te lagi ke aoga ki ana soko a‵lofa fakamaoni, kolā ka maua ne latou se toe‵tuga penā i se aso.

A te lua o mea, kaia ne fakaoti ei ne Iesu a tena sautalaga mai te fakasino ki a Apelaamo, Isaako, mo Iakopo, kolā ka toe faka‵tu aka ki te ola i te lalolagi? (Faitau te Mataio 22:31, 32.) Onoono la me ne kamata ne Iesu a tena faipatiga e uiga ki toeaina ma‵tua konā ki pati “kae e pelā mo te toe‵tuakaga o tino ‵mate.” Kāti e fakaavanoa mai i te fakamafuliga o te tugapati tenā se vaitaimi ke ‵fuli ‵tou kilokiloga. Tela la, mai i tusitusiga a Mose kolā ne talia ne te kau Satukaio, ne fakaaoga ne Iesu a pati a Ieova ki a Mose i te lakau telā ne ‵ka, ke tuku mai i ei fakatalitonuga fakaopoopo me i te toe‵tuga—se toe‵tuga ki te lalolagi—ko te fuafuaga eiloa a te Atua.—Eso. 3:1-6.

A te tolu o mea, kafai e fakasino atu a pati a Iesu e uiga ki te toe‵tuga mo te avaga ki te toe‵tuga ki te lagi, e mata, e fakauiga i ei me i a latou kolā e toe‵tu ki te ola i te lalolagi ka mafai o a‵vaga? E seai se tali tonu e tuku mai i te Muna a te Atua ki te fesili fakapito tenā. Kafai ne faipati a Iesu e uiga ki te toe‵tuga ki te lagi, e se tuku mai i ana pati se mainaga me ka mafai ne tino kolā e toe‵tu mai ki te lalolagi o a‵vaga i te lalolagi fou.

I te vaitaimi nei, e iloa ne tatou me e fakaasi tonu mai i te Muna a te Atua i te avaga e matala i te mate. Tela la, a te tagata io me se fafine telā ko mate tena avaga e se ‵tau o ma‵sei ana lagonaga māfai e fakaiku aka ne ia ke toe avaga a ia. A te mea tenā se fakaikuga totino, kae e se ‵tau o fakatauemu atu ki ei māfai e ‵sala ne ia se avaga telā e fetaui ‵lei.—Loma 7:2, 3; 1 Koli. 7:39.

E manino ‵lei, me kāti e uke ‵tou fesili e uiga ki te olaga i te lalolagi fou. I lō te tukutaumate fua o tali ki fesili konā, e ‵tau fua o fakatali tatou kae onoono aka. Kae e mafai o mautinoa i a tatou a te mea tenei: A tino faka‵logo ka fia‵fia, me ka fakamalie ne Ieova olotou manakoga katoa i te ‵toe auala ‵lei.—Sala. 145:16.