Ne tusi mai a Tavita me ne “seki iloa eiloa ne [ia] se tino amio lei ke tiakina ne te Aliki [Ieova], io me ko ana tamaliki foki ke akai meakai.” Ne fai ne ia se faipatiga telā e fakavae loa ki tena tulaga totino. Ne iloa ‵lei ne ia a te tausiga atafai a te Atua. (Sala. 37:25) Ne seki fakauiga a pati a Tavita me e seai se tino tapuaki e pokotia io me ka sē pokotia eiloa i te sē lava o mea e manakogina.

E isi ne taimi ne fepaki a Tavita mo tulaga faiga‵ta. E tasi te taimi penā ko te taimi ne tele ei a ia kea‵tea mai i a Saulo. Ko sē lava a mea e ola ei a ia, kae ne fakamolemole atu ke maua ne falaoa ma ia mo ana tino. (1 Samu. 21:1-6) I te taimi tenā, a Tavita ne “salasala ki falaoa.” E ui i ei, ne iloa ne Tavita i te tulaga faigata tenā me ne seki tiakina a ia ne Ieova. A te tonuga loa, e seai se koga e faitau ne tatou i ei i a Tavita ne akai mea‵kai ko te mea ke maua a mea e ola ei a ia.

E maua ne tatou a te fakatalitonuga a Iesu i te Mataio 6:33 me ka fakataunu ne te Atua a manakoga o ana tavini fakamaoni kolā e fakamuamua ne latou a mea o te Malo i olotou olaga. “Ke ‵sala muamua faeloa ne koutou te Malo mo tena amiotonu,” ko pati a Iesu, “kae ka fakaopoopo atu a mea katoa konei [e aofia i ei a mea‵kai, meainu, mo gatu] ki a koutou.” Ne fakaasi mai foki ne Iesu me e mafai o fia‵kai ana “taina” ona ko fakasauaga. (Mata. 25:35, 37, 40) Ne tupu a te mea tenā ki te apositolo ko Paulo. Ne oko ki a ia te fiakai kae fiainu i nisi taimi.—2 Koli. 11:27.

E fai mai a Ieova me ka fakasauagina tatou i auala kese‵kese. E mafai o talia ne ia ke sē maua ne tatou se fesoasoani i te fakafesagai atu ki ‵tekemaiga kolā e tuku mai ne te Tiapolo. (Iopu 2:3-5) Pelā me se fakaakoakoga, a nisi taina mo tuagane Kelisiano o tatou kolā ne ave ki falepuipui fakasaua a te kau Nazi, ne ‵tu olotou ola i se tulaga fakamataku ona ko fakasauaga. A te sē fagai faka‵lei o Molimau se auala fakatiapolo e tasi ne fakaaoga i te taumafai ke sē fakamaoni latou. Ne tumau a Molimau fakamaoni o faka‵logo ki a Ieova; ne seki tuku tiaki ne ia latou. Ne talia ne ia ke oko latou ki te tofotofoga tenei, e pelā mo te talia ne ia ke fakafesagai a Kelisiano katoa ki vaegā tofotofoga kese‵kese. E seai se fakalotolotolua me e ‵lago atu a Ieova ki a latou katoa kolā e logo‵mae ona ko tena igoa. (1 Koli. 10:13) E mafai o masaua ne tatou a pati i te Filipi 1:29: “Ko oti ne tuku atu ki a koutou a te tauliaga ke sui ne koutou a Keliso, e se gata fua i te fakatuanaki ki a ia, kae ke logo‵mae foki koutou mō ia.”

E tauto mai a Ieova me ka fakatasi a ia mo ana tavini. E fai mai te Isaia 54:17, penei: “Ka seai eiloa se meatau e mafai o fakapakia ne ia a koe.” E fakatalitonu mai i te tautoga tenei mo nisi tautoga a te saogalēmū o tino o te Atua e pelā me se fakapotopotoga. E pelā me ne tino taki tokotasi, e mafai o oko se Kelisiano ki tofotofoga kolā e mafai o iku atu ki te mate.