A GUY HOLLIS PIERCE telā se tokotasi o sui o te Potukau Pule o Molimau a Ieova, ne fatoā palele atu tena taviniga i te lalolagi nei i te Aso Lua i a Mati po 18, 2014. Ko ‵tusa mo te 79 ana tausaga i te taimi ne fakamautinoa ei tena fakamoemoega ke fai pelā me se tokotasi o taina o Keliso telā ko oti ne toe fakatu aka.—Epe. 2:10-12; 1 Pe. 3:18.

Ne fanau eiloa a Guy Pierce i Auburn, California i Amelika i a Novema po 6 i te 1934, kae ne papatiso a ia i te 1955. Ne avaga a ia ki tena pele ko Penny i te 1977 kae puti aka tena kāiga. A tena atamai e pelā me se ulu o te kāiga ne fesoasoani atu ke fai a ia pelā me se tamana ‵lei. I te 1982, ne fakalave‵lave eiloa lāua mo Penny i te galuega faka-paenia, kae i te 1986, ne kamata ei te 11 tausaga o tena taviniga e pelā me se ovasia o te fenua i Amelika.

I te 1997, ne kamata o tavini atu a te taina ko Guy Pierce mo tena avaga ko Penny e pelā me ne sui o te kāiga Peteli i Amelika. Ne galue te taina ko Guy Pierce i te Matagaluega mō te Galuega Talai, kae ne filifili a ia i te 1998 ke fesoasoani atu ki te Komiti mō Tino Ga‵lue i te Ofisa o te Potukau Pule. I a Oketopa po 2 i te 1999, ne fai te faka‵pulaga i te fono tausaga o te Watch Tower Bible and Tract Society of Pennsylvania me ko oti ne filifili aka te taina ko Guy Pierce ke fai mo sui o te Potukau Pule. I tausaga fakamuli nei, ne ga‵lue fakatasi a ia mo matagaluega o Tino Ga‵lue i te Ofisa, Tusitusi, ‵Lomi Tusi mo Komiti o Kouotineita.

A tino mai telega mo tuu kese‵kese ne ‵pili ‵ki ki te taina ko Guy Pierce ona ko tena uiga mata katakata kae sē faigata. Kae ne lauiloa a ia ki nisi tino i ana uiga e pelā mo te alofa, loto maulalo, mo te āva ki tulafono amio‵tonu mo fakatakitakiga, mo tena fakatuanaki katoatoa ki a Ieova. E pelā mo te mata o te lā telā e tumau o sae aka faeloa, e talitonu a Guy Pierce me i tautoga a Ieova ka taunu eiloa, kae ne manako a ia o fakailoa atu a te munatonu tenā ki te lalolagi kātoa.

Ne seki ‵fiu te taina ko Guy Pierce i te tavini atu ki a Ieova, mai te ala ‵malu i te taeao o galue ke oko eiloa ki te valuapo. Ne mafai o oko atu a ia ki kogā koga o te lalolagi ona ko ana malaga ke fakamalosi a taina mo tuagane Kelisiano, kae fakamāumāu ne ia a taimi fakatasi mo tino takitokotasi i te kāiga Peteli mo nisi taugasoa ke fesoasoani kae tuku atu a pati fakatonutonu. E fakamasaua faeloa ne nisi taina tali‵tonu a tena uiga talimālō, fai taugasoa, mo ana fakamalosiga mai te Tusi Tapu.

E aofia i tino o te kāiga o te taina mo te taugasoa pele tenei ko tena avaga mo ana tamaliki e tokoono, e pelā foki mo ana mokopuna mo mokopū. Kae e tokouke foki ana tamaliki faka-te-agaga. Ne fai te lāuga o te mate o te taina ko Guy Pierce i te Peteli i Brooklyn i te Aso Ono i a Mati po 22, 2014 ne te taina ko Mark Sanderson, se sui tokotasi o te Potukau Pule. Ne faipati a tou tagata e uiga ki te fakamoemoega faka-te-lagi o te taina ko Guy Pierce kae faitau atu a pati a Iesu: “E uke a koga e ‵nofo ei koutou i te fale o toku Tamana . . . Kafai foki e fano au o fakatoka se koga mō koutou, ka toe foki mai au o puke koutou, ko te mea ke ‵nofo foki koutou i te koga telā e nofo au i ei. Kae ko te koga e fano au ki ei e iloa ne koutou te auala ki ei.”—Ioane 14:2-4.

E tonu, e se sō‵loga tatou i te galo atu o te taina ko Guy Pierce. Kae e fia‵fia eiloa tatou me e ‘iloa ne ia te auala’ ki tena ‘koga nofo’ tumau.