I NĀI tausaga ko ‵teka, ne ola a Cesar mo tena avaga ko Rocio, i se olaga fiafia kae faigofie i California, me ne galue tumau a Cesar i mea tau masini fakavelavela kae fakamokomoko, a ko Rocio ne galue sē tumau i te fa‵kaimasaki. E ‵nofo loa lāua i te lā fale, kae e seai ne lā tamaliki. Kae e isi se mea ne tupu telā ne ‵fuli ei lā olaga. Se a te mea tenā?

I a Oketopa 2009, ne lafo atu ne te ofisa lagolago i Amelika se tusi ki fakapotopotoga katoa, ke ‵kami ei a taina kolā e isi ne olotou atamai ke ga‵lue faka-volenitia ke tusi atu olotou tusi ke ga‵lue sē tumau i te Peteli o fesoasoani atu ki te fakalasiga o nisi ofisa lagolago i Wallkill, i Niu Ioki. Ke oko foki ki a latou kolā ko silia olotou tausaga mo tausaga e manakogina ke galue se tino i te Peteli, ne ‵kami ke tusi atu olotou tusi. “Ona ko te tulaga o mā tausaga, ne iloa aka ei ne māua me se avanoaga gali i te mā olaga ke tavini atu i te Peteli,” ko pati a Cesar mo Rocio. “E se ma‵nako eiloa māua ke fakaseaoga te avanoaga tenā!” Tela la, ne faka‵fonu fakavave ei a lā pepa.

Ko teka atu te tausaga e tasi, kae seki maua eiloa ne Cesar mo Rocio se ‵kamiga ke olo atu ki te Peteli. E ui i ei, ne fai ne lāua a taumafaiga ke kausaki atu ki te lā fakamoemoega mai te fakafaigofie lā olaga. “Ne ‵fuli ne māua te mā koga faka‵tu motoka ki se tamā potu ko te mea ke mafai o ‵togi atu te mā fale ki se tino. Ne ga‵sue māua ki tua mo te mā fale telā e nofo ki te (200sq m) kae ne faite ne māua i nāi tausaga ko ‵teka, ki se potu telā e nofo ki te (25 sq m) te lasi. Ne fai mai a Cesar, “A te faiga o ‵fuliga konei ne fai ei ke toka māua māfai ko talia te ‵kamiga ki te Peteli.” Se a te mea ne tupu mai tua ifo? “Mai tua o se masina e tasi ne ga‵sue ei māua ki te mā tamā potu,” ko pati a Rocio, “ne maua ei ne māua se ‵kamiga ke ga‵lue faka-volenitia i te Peteli i Wallkill. Ne manino ‵lei ki a māua me mai te fakafaigofiega o te mā olaga e fai pelā me ne tuku atu ne māua ki a Ieova se mea ke fakamanuia mai ne ia.”

E pelā mo Cesar mo Rocio, e lau i te fia selau o taina mo tuagane e loto fia‵fia ke aofia i te galuega  fakatu‵tu telā e fai i Niu Ioki. E tokouke a taina e ‵lago atu ki te fakalasiga o Wallkill, a ko te tokoukega ne maua foki ne latou te tauliaga ke fesoasoani atu ki te faitega o te laumua fou i Warwick. * Ko oti ne tiakina ne taki tauavaga e tokouke a olotou fale ‵gali, galuega ‵togi ‵lei, ke oko foki ki manu fagai a kāiga ko te mea ke tavini katoatoa atu ki a Ieova. E mata, ko oti ne fakamanuia ne Ieova te vaegā uiga loto fiafia tenā? Ao, ko oti ne fakamanuia ne ia!

E pelā me se fakaakoakoga, a Way telā e atamai i mea tau iti, mo tena avaga ko Debra, kolā ko taki 50 tupu lā tausaga, ne ‵togi atu te lā fale mo te ukega o lā kope i Kansas kae olo atu ki Wallkill o ga‵lue pelā me ne tino sē ga‵lue tumau i te Peteli. * E tiga eiloa ne manakogina ke fai a ‵fuliga i lā olaga, ne lavea ne lāua te aoga o taumafaiga konā. E uiga ki tena galuega i te Peteli, e fai mai a Debra, penei: “E mafaufau au i nisi taimi me e pelā loa me e aofia au i se galuega fakatu‵tu i te palataiso telā e lavea atu i ata i ‵tou tusi!”

Ne ‵togi atu ki tua ne Melvin mo Sharon a te lā fale mo lā kope i South Carolina ko te mea ke mafai o fesoasoani atu lāua i Warwick. E tiga eiloa e se faigofie ke ‵togi atu ki tua lā kope, kae ne loto fakafetai lāua ki te tauliaga ke aofia lāua i se galuega tāua ‵ki. E fai mai lāua: “A te fiafia telā e maua mai te iloa aka me ko fai ne koe se mea telā ka aoga ki te fakapotopotoga i te lalolagi kātoa, se lagonaga fakafiafia loto.”

A Kenneth, se taina fakatutu fale telā ko litaea, mo tena avaga ko Maureen, kolā ko taki 50 tupu lā tausaga, ne ga‵sue mai California ke olo atu o ga‵lue i te galuega fakatūtū i Warwick. Ko te mea ke mafai lāua o olo, ne fai ne lāua a fakatokaga mo se tuagane tokotasi i te lā fakapotopotoga ke tausi atu ki te lā fale kae fakamolemole atu ki lā kāiga ke fesoasoani atu i te tausiga o te tamana o Ken telā ko matua ‵ki. E mata, ne fakatalave lāua i te faiga o mea konā ke mafai o tavini atu i te Peteli? Ikai! “E uke ‵ki a mea aoga ne maua ne māua,” ko muna a Ken. “E mata, e fakauiga i ei me ko seai ne fakalavelave? Ikai e se penā loa, kae ko ola nei māua i se olaga fiafia, kae e fia‵fia foki māua o fakamalosi atu ki nisi tino ke fai ne latou te taviniga tenā.”

A te tokoukega kolā ne fakaavanoa ne latou a latou eiloa ne manumalo i fakalavelave faiga‵ta kese‵kese. E pelā me se fakaakoakoga, a William mo Sandra, kolā ko taki 60 tupu lā tausaga ne ola i se olaga tokagamalie kae fiafia i Pennsylvania. E isi se lā pisinisi faite vaega kese‵kese o masini kae e toko 17 tino e ga‵lue i ei. Ne tavini fakatasi lāua i te fakapotopotoga telā ne aofia lāua i ei talu mai te lā fo‵likiga,  kae e tokouke lā kāiga e ‵nofo atu i konā. Tela la, i te taimi ne māua ei ne lāua te avanoaga ke ga‵lue sē tumau i Wallkill, ne iloa ‵lei ne lāua me ka māvae lāua mo te tokoukega kolā e masani mo lāua. “E mautinoa eiloa me i te ‵toe tofotofoga faigata ki a māua ko te tiakina ne māua te mā koga gali,” ko pati a William. Kae mai tua o te faiga o ‵talo e uke, ne ga‵sue lāua o fai te lā fakaikuga e aunoa mo te sala‵mo. E fai mai a William, “E se mafai ne au o fakatusa a te fiafia telā e maua mai te aofia tonu kae tavini fakatasi atu mo te kāiga Peteli. Ko sili fakafia atu nei te fia‵fia o māua mo Sandra!”

A Ricky, telā se menetia o polotieki fakatu‵tu i Hawaii, ne ‵kami foki ke fai pelā me se tino sē galue tumau i te Peteli ke fesoasoani atu ki te galuega i Warwick. Ne manako eiloa a tena avaga ko Kendra ke talia ne ia te ‵kamiga tenā. Kae ne manavase malosi eiloa lāua ki te tausiga o te lā tamaliki tagata ko Jacob, telā ko 11 ana tausaga. Ne mafaufau lāua me kāti se faiga poto ke ga‵sue te lotou kāiga ki Niu Ioki ko te mea ke mafai ne te lā tama o fakamasani ki se koga fou.

“A te ‵toe mea tāua ki a māua ko te ‵salaga o se fakapotopotoga telā e isi ne talavou i ei kolā e malosi faka-te-agaga,” ko muna a Ricky. “Ne ma‵nako eiloa māua ke maua ne Jacob a taugasoa ‵lei e tokouke.” A ko te ikuga, ne ‵nofo atu latou i se fakapotopotoga telā e se tokouke a tama‵liki kae ne nāi tino fua i ei e ga‵lue i te Peteli. Ne fai mai a Ricky penei, “Mai tua o te fakatasiga muamua a matou, ne ‵sili atu au ki a Jacob me ne a ana lagonaga e uiga ki te fakapotopotoga fou, maise loa me seai ne ana kautama, kae ne fai mai a ia, ‘Sa manavase, e Papa. Ka fai taugasoa loa au mo taina talavou i te Peteli.’”

E mautinoa eiloa, me ne fai taugasoa a Jacob mo talavou i te Peteli. Kae se a te mea ne iku mai i ei? “I te po e tasi, ne sasale atu au mai tua o te potu o taku tama kae ne lavea ne au me koi ka loa te moli o te potu,” munā Ricky. “Ne fakamoemoe au me ka ‵poa ne au a ia e tafao i tafaoga vitio, kae tela la e faitau tena Tusi Tapu! I te taimi ne ‵sili atu au me ne a ana mea e fai, ne tali mai a Jacob, ‘Au ko fai pelā me se talavou i te Peteli, kae ka faitau ne au te Tusi Tapu i se tausaga e tasi.’” E manino ‵lei me ne fia‵fia eiloa a Ricky mo Kendra, e se ona fua ko Ricky ko aofia i te galuega fakatu‵tu i Warwick, kae ona me ne fesoasoani atu lā fakaikuga ke gasolo ki mua te lā tamaliki tagata i te feitu faka-te-agaga.—Faata. 22:6.

Ko pili o oti atu a galuega fakatū‵tu i Wallkill mo Warwick, tela la e iloa ne latou kolā ne ‵kami ke fesoasoani ki ei me ko pili o oti latou mai te Peteli. E mata, e manava‵se a taina mo tuagane konei e uiga ki koga ka olo latou ki ei io me ko mea ka fai ne latou? Ikai! E ‵pau eiloa a lagonaga o te tokoukega mo te  tauavaga kolā koi malosi‵losi mai Florida. E fai mai a John, se menetia o te kamupane fakatū‵tu, mo tena avaga ko Carmen, kolā e ga‵lue faka-volenitia i Warwick: “Ne lavea ne māua te auala ne tausi mai a Ieova ki manakoga ‵tonu o māua i te feitu tenei. E malamalama māua me e se aumai fua ne Ieova māua ki konei i te taimi nei kae oti ko tiakina ei ne ia māua.” (Sala. 119:116) Ne ga‵lue a Luis telā e faite ne ia a mea tā afi fakatasi mo tena avaga ko Quenia i Wallkill. E fai mai lāua: “Ko oti ne lavea ne māua te auala e tausi mai ei a Ieova mo te kaimalie ki a māua i te feitu faka-te-foitino. Faitalia me seiloa ne māua a te auala, te taimi mo te koga, e tali‵tonu māua me  ka tumau eiloa a ia i te tausi mai ki a māua.”—Sala. 34:10; 37:25.

A te tokoukega o latou kolā ne fesoasoani i te galuega fakatū‵tu i Niu Ioki ne mafai o isi ne olotou fakamasakoga ke se ga‵lue volenitia latou. E ui i ei, ne tofotofo ne latou a Ieova, e pelā mo te mea e ‵kami ne ia ke fai ne tatou katoa: “Tofotofo mai a au, kae ka lavea ne koutou me ka ‵tala ne au a fakamalama o te lagi kae ‵ligi ifo a vaegā mea ‵lei katoa.”—Mala. 3:10.

E mata, ka tofotofo ne koe a Ieova kae ke maua ne koe ana fakamanuiaga e uke? Ke ‵talo kae sukesuke ki mea e mafai ne koe o fai ke aofia i te galuega fakafiafia tenā, faitalia me i Niu Ioki io me i nisi galuega fakatū‵tu o te Malo, kae ke lavea ne koe te auala ka taui atu ne Ieova a koe.—Male. 10:29, 30.

A Dale, se initinia i mea fakatū‵tu mo tena avaga ko Cathy mai Alabama, ne fakatāua malosi ne lāua te vaegā galuega tenei. E fai mai lāua i te lā galuega faka-volenitia i Wallkill: “Kafai e loto malosi koe o tiaki tou koga gali kae tokagamalie, ka maua eiloa ne koe se avanoaga ke lavea atu te agaga o Ieova i te galuega.” Kae se a te mea e ‵tau o fai ne koe ke mafai koe o avanoa? E fai mai a Dale: “Fakafaigofie, fakafaigofie, kae fakafaigofie te kilokiloga ki nisi mea e uke. Ka se salamō lele eiloa koe!” A Gary, mai Carolina ki mātū, ne galue pelā me se tino fakateletele ne ia te galuega mō se 30 tausaga. Ne fai mai lāua mo tena avaga ko Maureen, me i te fakamanuiaga e tasi telā e maua ne latou i Warwick ko te “‵kau fakatasi mo te ga‵lue mo taina mo tuagane e tokouke kolā ne fakaaoga olotou olaga ke tavini atu ki a Ieova i te Peteli.” Ne toe fakaopoopo mai a Gary: “Ke tavini atu i te Peteli, e ‵tau o fakafaigofie tou olaga, telā ko te ‵toe auala ‵lei ke ola i ei i te fakanofonofoga tenei o mea.” E fai mai a Jason, telā ne galue i se pisinisi fakatūtū, mo Jennifer mai Illinois, me i te ga‵lue i Wallkill e “pelā loa me ko pilipili ki galuega kolā ka fai i te lalolagi fou.” Ne toe fai mai a Jennifer: “Se mea fakafiafia ke iloa atu me i mea katoa e fai ne tatou e fakatāua ne Ieova kae fai pelā me se koloa aoga ki a tatou mō aso mai mua. E tāua ‵ki eiloa a te galuega e fai ne tatou i te kilokiloga a Ieova.”