1, 2. (a) Se a te mea e fakaasi mai ne Iesu e uiga ki aso fakaoti? (e) Ne a fesili ka sau‵tala tatou ki ei?

KE FAKAATAATA ne koe a Iesu e sagasaga i te Mauga o Olive e kilo atu ki te faletapu i Ielusalema—kae fakamatala atu ne ia se tasi o ana valoaga ‵gali. Ne fakalogo‵logo faka‵lei eiloa a Petelu, Anitelea, Iakopo, mo Ioane i te taimi ne fai atu ne Iesu se valoaga fakafiafia e uiga ki aso mai mua. Ne fai atu ne ia ki a latou se mea e uiga ki aso fakaoti o te olaga masei tenei, te taimi telā ka pule ei a ia i te Malo o te Atua. Ne fai atu a ia me i te vaitaimi tāua tenā, ka sui ne te “tavini fakamaoni kae poto” a ia i te lalolagi nei, kae tuku atu ki ana tavini a mea‵kai faka-te-agaga kolā e manakogina ne latou i te taimi tonu.—Mata. 24:45-47.

² E se gata i ei, i te valoaga foki loa tenā, ne fai atu ne Iesu a te tala fakatusa e uiga ki tamafine e tokosefulu. (Faitau te Mataio 25:1-13.) Ke na ‵saga atu nei tatou ki fesili konei: (1) Se a te fekau tāua i te tala fakatusa? (2) Ne fakagalue pefea ne te kau fakaekegina a fakatakitakiga i te tala fakatusa, kae ne a ikuga ne maua mai i ei? (3) Ne a mea aoga e mafai o maua ne tatou i aso nei mai te tala fakatusa a Iesu?

3. I taimi ko ‵teka, ne fakamatala mai pefea i ‵tou tusi a te tala fakatusa e uiga ki tamafine e tokosefulu, kae se a te mea ne iku mai i ei?

³ Ne iloa ne tatou i te mataupu mai mua me i tausaga fakamuli nei, ne fakamafulifuli ne te tavini fakamaoni a te auala e fakamatala ei a tala i te Tusi Tapu. Ko se faka‵mafa mai ne latou a uiga o ata fakavaloaga, kae ko ‵saga tonu atu ki akoakoga aoga kolā e maua mai i ei. I taimi ko ‵teka, ne fakamatala mai i ‵tou tusi a uiga fakatusa o mea liki‵liki i te tala fakatusa a Iesu e uiga ki tamafine e tokosefulu, e pelā mo moli, sinu, fagu kele, mo nisi mea aka. Kae e mata, a te talia ne tatou a fakamatalaga liki‵liki i te tala fakatusa e fai ei ke galo atu te akoakoga faigofie kae tāua e maua i ei? E pelā mo te mea ka lavea ne tatou, e tāua ‵ki ke iloa a te tali e uiga ki ei.

4. I te tala fakatusa, e mafai pefea o iloa ne tatou (a) a te tamataene ka fakaipoipo? (e) a tamafine?

⁴ Ke na onoono nei tatou ki se fekau tāua i te tala fakatusa tenei a Iesu. Te mea muamua, ke mafau‵fau ki tino ‵tonu kolā e aofia i ei. Ko oi a te tamataene ka fakaipoipo i te tala fakatusa tenei? E manino ‵lei, me ne faipati a Iesu ki a ia eiloa. E iloa ne tatou me mai mua malie, ne fakasino atu a Iesu ki a ia eiloa e pelā me ko te tamataene telā ka fakaipoipo! (Luka 5:34, 35) Kae ko oi la a tamafine? I te tala fakatusa, ne fai mai a Iesu me e ‵tau mo tamafine o toka mo olotou moli māfai ko vau te tamataene ka fakaipoipo. Mafaufau la ki te fakatakitakiga tai ‵pau ne tuku atu ne Iesu ki tena “lafu foliki” o soko fakaekegina: “Pei otou gatu kae ke toka koutou kae ke ‵ka otou moli. Ke fai koutou e pelā mo tino kolā e fakatali‵tali ki te foki mai o te lotou matai mai i te fakaipoipoga.” (Luka 12:32, 35, 36) E se gata i ei, ne fakaosofia eiloa a apositolo ko Paulo mo Ioane ke fakatusa ne lāua a soko fakaekegina o Keliso ki tamafine ‵mā konei. (2 Koli. 11:2; Faka. 14:4) Tela la, a te tala fakatusa ne tuku mai ne Iesu i te Mataio 25:1-13, se fakatakitakiga mo se fakailoaga ki ana soko fakaekegina.

5. E fakaasi mai pefea ne Iesu a te vaitaimi e fakataunu ei tena tala fakatusa?

⁵ Mafaufau ki te lua o mea, ko te vaitaimi. Se a te vaitaimi e fakasino atu ki ei te fakatakitakiga tenei a Iesu? E fakaasi mai ne Iesu te taimi tonu i te fakaotiotiga o te tala fakatusa: “Kae oko mai te tamataene ka fakaipoipo.” (Mata. 25:10) E pelā mo te mea ne fakamatala mai i te Faleleoleo Maluga i a Iulai 15, 2013, ne aofia eiloa i te valoaga a Iesu i te Mataio mataupu e 24 mo te 25 a taimi e valu e uiga ki tena “oko mai”; ne fakaaoga eiloa i fakamatalaga takitasi konā se vaega o te pati Eleni. I fakamatalaga katoa konā, ne fakasino atu eiloa a Iesu ki te vaitaimi o te fakalavelave lasi māfai ko vau a ia o fai te fakamasinoga mo te fakaseaiga o te fakanofonofoga o te lalolagi masei tenei. Tela la, e mautinoa eiloa me e fakauiga te tala fakatusa tenei ki aso fakaoti, a ko tena fakataunuga katoatoa e oko mai i te taimi o te fakalavelave lasi.

6. I te fakamatalaga kātoa o te tala fakatusa, se a te fekau tāua e maua mai i ei?

⁶ Se a te fekau tāua i te tala fakatusa? Ke masaua te fakamatalaga kātoa o te tala. Ne fatoa fakamatala mai ne Iesu a tena “tavini fakamaoni kae poto.” Ko oti ne fakatalitonu aka me i te tavini tenā se potukau foliki fua o tāgata fakaekegina kolā e fai ne latou te takitakiga o soko o Keliso i aso fakaoti. Ne fakailoa atu ne Iesu ki tāgata konei me e ‵tau mo latou o tumau i te fakamaoni. E se gata i ei, ne faka‵mafa kae tuku atu ne ia te tala fakatusa tenei ke fakamalosi ei ana soko fakaekegina katoa i aso fakaoti konei ke “tumau i te matapula‵pula” ke mo a ma galo i a latou te lotou taui tāua. (Mata. 25:13) Nei la, ke na suke‵suke tatou ki te tala fakatusa kae ke onoono ki te auala ne fakagalue ei ne te kau fakaekegina te fakatakitakiga tenei.

7, 8. (a) Ne a uiga e lua kolā ne fakatalitonu mai ei a te ‵toka ‵lei o tamafine ‵poto? (e) I te auala fea e fakatalitonu mai ei ne te kau fakaekegina a te ‵toka ‵lei o latou?

⁷ I te tala fakatusa, e faka‵mafa mai ne Iesu me i lō te fai pelā mo tamafine va‵lea, ne toka eiloa a tamafine ‵poto i te taimi ne oko mai ei te tamataene ka fakaipoipo. Kaia? Ona ko uiga konei e lua: te toka ‵lei mo te matapulapula. Ne ‵tau eiloa mo tamafine konei o faka‵ka olotou moli kae tumau i te matapula‵pula i te valuapo ki te oko mai o te tamataene ka fakaipoipo. E se pelā mo tamafine va‵lea, ne toka eiloa a tamafine ‵poto e tokolima ona me ne aumai ne latou a fagu sinu fakaleoleo fakatasi mo olotou moli. E mata, ne fakamaoni mai ne te kau fakaekegina me ne toka latou?

⁸ Ao, ne toka eiloa latou! I aso fakaoti, ne gasue‵sue eiloa a Kelisiano fakaekegina pelā mo tamafine ‵poto, o fakatoka ke fai te lotou galuega mo te fakamaoni ke oko loa ki te gataga. E iloa ne latou me i te lotou tavini atu mo te fakamaoni e fakauiga ki te tiakina o koloa faka-te-foitino kolā e ofo mai ne te lalolagi a Satani. E tuku katoatoa atu latou ki a Ieova kae tavini atu ki a ia, e se ona ko te mea ko pili mai te gataga, kae ona ko te a‵lofa mo te fakamaoni o latou ki a ia mo tena Tama. E tumau latou i te fakamaoni mai te sē talia ne latou a te agaga o te lalolagi masei tenei mo ana koloa, amioga ma‵sei mo kilokiloga kaima‵nako. Tela la, e tumau eiloa latou i te toka ‵lei, mai te maina atu pelā me ne moli, kae fakatali‵tali mo te kufaki ki te oko mai o te Tamataene ka fakaipoipo.—Fili. 2:15.

9. (a) Se a te faka‵pulaga ne tuku mai ne Iesu e uiga ki te tule‵moe? (e) Ne ‵saga atu pefea te kau fakaekegina ki te kalaga: “Ko oko mai te tamataene ka fakaipoipo”? (Ke onoono foki ki fakamatalaga fakaopoopo.)

⁹ A te lua o uiga telā e fesoasoani atu ki tamafine konā ke toka ko te matapulapula. E mata, e mafai eiloa o ‵to a ‵moe o Kelisiano fakaekegina ona ko te ‵ligo o te po? Ao e mafai eiloa. Masaua me ne fai mai a Iesu me i tamafine e tokosefulu ne “matule‵tule . . . kae ‵to atu ei olotou ‵moe” i te taimi ne tuai mai ei a te tamataene ka fakaipoipo. Ne iloa ‵lei ne Iesu me i te tino telā e loto malosi e mafai o vāivāi tena foitino. Ne faka‵logo faka‵lei a te kau fakaekegina fakamaoni ki te fakailoaga tenā kae ne ga‵lue malosi latou ke tumau i te mataala kae matapula‵pula. I te tala fakatusa, ne lagona katoa ne tamafine konei a te kalaga i te valuapo, penei: “Ko oko mai te tamataene ka fakaipoipo!” Kae ko latou fua kolā ne matapula‵pula ne kufaki ke oko loa ki te gataga. (Mata. 25:5, 6; 26:41) Kae e a te kau fakaekegina fakamaoni i aso nei? I aso fakaoti konei, ne ‵saga atu latou ki te fakamaoniga tenā, mai te ka‵laga atu, “Ko oko mai te tamataene ka fakaipoipo.” Ne kufaki foki latou, mai te tumau i te fakatoka mō te oko mai o te Tamataene ka Fakaipoipo. * E ui i ei, ne fakasino tonu atu loa te fakaotiga o te tala fakatusa ki se vaitaimi tonu. E pefea la?

10. Se a te fesili e mafai o sae aka e uiga ki te fai‵patiga i te vā o tamafine ‵poto mo tamafine va‵lea?

¹⁰ Kāti a te vaega faka‵numi ko te fakaotiga o te ‵tala fakatusa, i te taimi ne fai ei te sau‵talaga i te vā o tamafine ‵poto mo tamāfine va‵lea. (Faitau te Mataio 25:8, 9.) E sae aka i te sau‵talaga tenei se fesili: “Anafea i  tala fakasolopito o tino o te Atua ne seki talia ei ne te kau fakamaoni konei ke fesoasoani atu ki a latou kolā e ma‵nako ki ei?” Ke masaua te vaitaimi telā e fakasino atu ki ei te tala fakatusa. E malama‵lama tatou me i a Iesu, te Tamataene telā ka Fakaipoipo, e vau ke fai ne ia te fakamasinoga mai mua malie o oti te fakalavelave lasi. E mata, e mautinoa eiloa me e fakasino atu loa a te vaega tenei o te tala fakatusa ki mea ka ‵tupu mai mua o te taimi o te fakamasinoga? E foliga mai me i te taimi tenā ko oti ei ne maua ne te kau fakaekegina a te lotou fakamailogaga fakaoti.

11. (a) Se a te mea ka tupu mai mua o kamata te fakalavelave lasi? (e) Se a te mea ne fakauiga ki ei a tamafine ‵poto i te taimi ne uga atu ei ne latou a tamafine va‵lea ke olo o ‵togi olotou sinu?

¹¹ Tela la, mai mua malie o kamata te fakalavelave lasi, ka maua katoa ne te kau fakaekegina fakamaoni i te lalolagi nei a te lotou fakamailoga fakaoti. (Faka. 7:1-4) Tenā te taimi ko mautinoa ei te lotou fakamoemoega. Kae mafaufau la ki tausaga mai mua o kamata te fakalavelave lasi. Ne a mea e mafai o ‵tupu ki te kau fakaekegina kolā e seki tumau i te matapula‵pula, kae sē fakamaoni? Ka galo atu i a latou a te lotou taui faka-te-lagi. E manino ‵lei me ka se maua ne latou te fakamailoga fakaoti mai mua malie o kamata te fakalavelave lasi. I te taimi tenā, e mafai o fakaeke aka a nisi tino fakamaoni. Kafai ko kamata te fakalavelave lasi, e mafai o ‵poi a tino va‵lea konei ke lavea atu a te fakaseaiga o Papelonia te Sili. Tenā te taimi ka iloa ei ne latou me seki toka latou mō te oko mai o te Tamataene ka Fakaipoipo. Se a te mea e tupu māfai e akai atu latou mō se fesoasoani i te taimi tenā? E tuku mai i te tala fakatusa a Iesu se mea fakafanoanoa. Ne seki talia ne tamafine ‵poto ke tuku atu olotou sinu mō te ‵lei o tamafine va‵lea, kae ne fai atu ke olo o ‵togi olotou sinu. Kae masaua la me ko “valuapo.” E mata, e isi ne tino koi mafai o maua ne latou a tino ‵togi sinu i te itula tenā? E mautinoa eiloa me ko talimuli ‵ki latou.

12. (a) I te taimi o te fakalavelave lasi, se a te mea ka tupu ki so se tino telā ko oti ne fakaekegina kae seki tumau i te fakamaoni mai mua o te fakamailogāga fakaoti? (e) Se a te ikuga o latou kolā e fai pelā mo tamafine va‵lea?

¹² I se auala tai ‵pau, i te taimi o te fakalavelave lasi, e se mafai eiloa ne tino fakaekegina fakamaoni o fesoasoani atu ki so se tino sē fakamaoni. Ka seai se fesoasoani e maua ne latou. Ko tō talimuli. Se a la te ikuga ki vaegā tino penā? Ne fakamatala mai ne Iesu te mea ne tupu ki tamafine va‵lea i te taimi ne olo atu o ‵sala olotou sinu : “Kae oko mai te tamataene ka fakaipoipo, ulu atu ei a tamafine kolā ko toka fakatasi mo te tamataene tenei ki loto i te ‵kaiga o te avaga kae ‵pono mai te mataloa.” Kafai ko vau a Keliso i tena ‵malu māfai ko pili o oti te fakalavelave lasi, ka fakamaopoopo ei ne ia te kau fakaekegina fakamaoni ki te lagi. (Mata. 24:31; 25:10; Ioa. 14:1-3; 1 Tesa. 4:17) E tonu, ka ‵pono te mataloa ki tino sē fakamaoni, kolā e fai pelā mo tamafine va‵lea. E mafai o ‵kalaga atu latou: “Tou ‵malu, Tou ‵malu, ‵tala mai aka ke ulu atu matou!” Kae e maua ne latou se ikuga e ‵pau mo te ikuga o latou kolā e fai pelā me ne kouti i te itula loa tenā o te fakamasinoga: “Au e muna ‵tonu atu ki a koutou, e se iloa ne au koutou.” Ko oko loa i te fakafanoanoa!—Mata. 7:21-23; 25:11, 12.

13. (a) Kaia e se ‵tau o fakaiku aka ne tatou me ka tokouke a soko fakaekegina o Keliso ka sē fakamaoni? (e) Kaia e mafai o fai atu tatou me e fakaasi mai i te tala fakatusa a Iesu tena loto talitonu ki Kelisiano fakaekegina? (Ke onoono ki te ata i te kamataga.)

¹³ E pelā mo fakamatalaga i te palakalafa mai luga, se a te mea e mafai o fakaiku aka ne tatou? E mata, ne fai mai a Iesu me ka tokouke a te kau fakaekegina ka sē fakamaoni kae manakogina ke sui? Ikai. Masaua la, ne fatoa fakailoa atu ne ia ki tena “tavini fakamaoni kae poto” ke mo a ma ‵fuli ki se tavini masei. E se fakauiga i ei me ne  fakamoemoe a ia ke tupu se mea penā. I se auala tai ‵pau, a te tala fakatusa tenei e fakaata mai ne ia se mea ke fakaeteete i ei. E pelā mo te tokolima tamafine va‵lea mo te tokolima tamafine ‵poto, e ‵tau mo Kelisiano fakaekegina taki tokotasi o filifili ke toka ‵lei kae matapula‵pula. Ne fakaosofia te apositolo ko Paulo ke faka‵mafa ne ia manatu tai ‵pau tenā e uiga ki ana taina Kelisiano fakaekegina. (Faitau te Epelu 6:4-9; fakatusa ki te Teutelonome 30:19.) Mafaufau la me ne faipati ‵tonu mai loa a Paulo, kae ne fakaasi mai ne ia i se faifaiga alofa a tena loto talitonu me i “mea kolā e ‵lei atu” ne fakatoka mō aso mai mua mo ana taina mo tuagane Kelisiano. I se auala tai ‵pau, ne tuku mai ne Iesu se fakailoaga i tena tala fakatusa i se auala alofa. E iloa ne Keliso me i ana tavini fakaekegina e mafai o tumau i te fakamaoni kae ke maua se taui fakafiafia!

14. Kaia e mafai ei o aoga ki “nisi mamoe” a te tala fakatusa e uiga ki tamafine e tokosefulu?

¹⁴ Ona me ne fakasino tonu atu te tala fakatusa a Iesu e uiga ki tamafine e tokosefulu ki ana soko fakaekegina, e mata, e ‵tau o fakaiku aka me i te fakatokaga tenei e se aoga ki “nisi mamoe” a Keliso? (Ioa. 10:16) Ikai, e se penā loa! Masaua la, e faigofie ke malamalama i te fekau mai i te ‵tala fakatusa: “Ke tumau i te matapula‵pula.” E mata, e fakasino atu fua te mea tenā ki te kau fakaekegina? Ne fai mai Iesu: “Ko aku pati e fai atu ki a koutou e fai atu foki ne au ki tino katoa, Ke tumau i te matapula‵pula.” (Male. 13:37) E manako Iesu ke toka a loto o ana soko katoa ki te taviniga fakamaoni kae ke fakafetaui ki tulaga e pelā me ne tino matapula‵pula. Tela la, e tau‵tali katoa Kelisiano ki te takitakiga telā e tuku mai ne te kau fakaekegina e uiga ki te mea tenei, mai te tau‵tali ki olotou fakakoakoga ‵lei kae fakamuamua te galuega talai i olotou olaga. E ‵tau foki o masaua ne tatou taki tokotasi me i tamafine va‵lea ne akai atu ki tamafine ‵poto ke tuku atu ne olotou sinu. Tela la, a te seki talia o te olotou fakatagi e fakamasaua mai ki a tatou, me seai se tino e mafai o fakamaoni mō tatou, ke tu mō tatou i te munatonu io me ke tumau i te matapula‵pula mō tatou. E tali atu loa tatou taki tokotasi ki te Famasino amiotonu telā ko oti ne filifili ne Ieova. E ‵tau mo tatou o toka. Ko pili o oko mai a ia!

15. Kaia e fakafiafia ei a te fakaipoipoga a Keliso mo tena avaga ki Kelisiano ‵tonu katoa?

¹⁵ E mafai foki o maua ne Kelisiano katoa a mea aoga mai te tala fakatusa a Iesu e uiga ki te fakaipoipoga. Tela la, ko oi la i a tatou e se fiafia ki te fakaipoipoga manuia tenei? Ka ‵nofo atu te kau fakaekegina i te lagi; mai tua o te taua o Amaketo, ka fai latou pelā me ko te avaga a Keliso. (Faka. 19:7-9) Kae ka maua katoa ne tino i te lalolagi nei a mea aoga mai te fakaipoipoga faka-te-lagi tenā, me ka pule mai ei se malo ‵lei katoatoa ki tino katoa. Faitalia me se a ‵tou fakamoemoega, me i te lagi io me ko te lalolagi, ke na fakaiku aka ke tauloto ne tatou se akoakoga tāua mai te tala fakatusa e uiga ki tamafine e tokosefulu. Ke na fakamaoni atu a te ‵toka o tatou mai te fakatoka ‵tou loto kae tu ‵mautakitaki, ke matapula‵pula, ko te mea ke mafai o maua ne tatou te olaga fiafia i aso mai mua telā ne fakatoka ne Ieova mō tatou!