1-3. Ne fakamalosi aka pefea ne Paulo a tena loto talitonu ki a Ieova? (Ke onoono ki te ata i te kamataga.)

A TE taimi tenei se vaitaimi fakamataku ke fai pelā me se Kelisiano i Loma. Mai te ‵losi atu mō te ‵sunuga o te fa‵kai i te 64 T.A., mo te takalia‵lia ki tino , ne fakasauagina malosi ei a soko a Keliso. Kafai koe se Kelisiano telā ne ola i te vaitaimi tenei, ne mafai eiloa o fakafesagai atu koe ki fakasauaga. A nisi o ‵tou taina mo tuagane faka-te-agaga ne kai ne manu fe‵kai io me ne ‵tuki ki luga i se lakau fakasaua kae ‵sunu ola e pelā me se moli i te po.

² E foliga mai me i te tulaga faigata tenei, a ko te apositolo ko Paulo ne ‵pei ki te falepuipui i Loma mō te lua o taimi. E mata, ne mafai o fesoasoani atu a nisi Kelisiano ki a ia? E mafai o isi ne mea ne manavase muamua a Paulo e uiga ki te mea tenā, me ne tusi atu a ia ki a Timoteo, penei: “I te kamataga o aku fakamatalaga o ‵pulu au i te fono, e seai se tino ne kau mai ki a au kae ne tiakina au ne latou katoa—talosia ke se agasala latou i te mea tenei.” E se gata i ei, ne iloa ne Paulo me ne seki tiaki lele a ia e aunoa mo se fesoasoani. Ne tusi mai a ia: “Kae ne tu te Aliki i oku tafa kae faulu mai ne ia te ‵mana ki loto i a au” E tonu, ne tuku atu ne te Aliki ko Iesu a te malosi telā ne manakogina ne Paulo. Kae ne aoga pefea a te fesoasoani telā ne tuku atu ne Iesu?  Tenei te ikuga: “Ne sao eiloa au mai te gutu o te leona.”—2 Timo. 4:16, 17. *

³ A te masaua ne Paulo a te mea ne tupu, ne fakamalosi kae fesoasoani atu ke talitonu a ia me e mafai o tuku atu ne Ieova te malosi ke kufaki i fakalavelave e fe‵paki mo ia i te taimi eiloa tenā mo mea kolā ka ‵tupu ki a ia i aso mai mua. E tonu, ne fai mai a ia mo te mautinoa, penei: “Ka fakasao au ne te Aliki mai so se mea masei.” (2 Timo. 4:18) Ao, ne tauloto ne Paulo me faitalia me isi se tapula ki te fesoasoani e maua mai i tino, a ko te fesoasoani mai i a Ieova mo tena Tama e mautinoa eiloa!

4, 5. (a) Ko oi te tino e mafai o tuku atu faeloa ne ia te fesoasoani e manakogina ne koe? (e) E mafai pefea o fakamalosi aka tou fesokotakiga mo Ieova?

⁴ E mata, e fe‵paki koe mō tulaga faiga‵ta i nisi taimi e aunoa mo se fesoasoani? Ona ko te seai sau galuega ‵togi, fakamalosiga ma‵sei i te akoga, se masaki, io me ko nisi mea faiga‵ta i te olaga. Kāti ne ‵sala atu koe ki se fesoasoani, kae e fanoanoa koe me se fetaui te fesoasoani e tuku mai ne nisi tino mo tou fakalavelave. E tonu, e isi ne fakalavelave e se mafai eiloa o faka‵lei aka ne tino. I vaegā tulaga penā, e mata, a te fakatakitakiga i te Tusi Tapu ke “fakatuaga” ki a Ieova se mea valea? (Faata. 3:5, 6) E mata, e se aoga? Ikai! A te fesoasoani mai te Atua se mea mautinoa, e pelā loa mea kolā ne fakaasi mai i tala e uke i te Tusi Tapu.

⁵ Tela la, i lō te sē fiafia māfai e se lava a fesoasoani e maua ne koe mai tino, ke maua ne koe te kilokiloga a te apositolo ko Paulo—ke fakalagolago katoatoa ki a Ieova kae ke lavea ne koe tena tausiga alofa ki a koe. Ka fakamalosi ne te mea tenei a tou loto talitonu ki a ia kae fai ei ke mautinoa a tou fesokotakiga mo ia.

6. Kaia e se faigofie ke tali‵tonu ki a Ieova māfai e fe‵paki tatou mo se fakalavelave?

⁶ E mata, e mafai o fakaasi atu ne koe se fakalavelave faigata ki a Ieova i se ‵talo, kae filemu koe mai te iloa aka me ko oti ne fai ne koe te mea e mafai o fai kae tuku atu te ‵toega ki ei? Ao e mafai loa! (Faitau te Salamo 62:8; 1 Petelu 5:7.) A te tauloto ke fai penā se vaega tāua ke ati aka ei se fesokotakiga ‵lei o koe mo Ieova. Kae, se mea faigata ke talitonu me ka tuku mai katoa ne Ieova a mea e manako koe ki ei. Kaia? A te pogai e tasi, me e se ‵tali fakavave mai faeloa a Ieova ki ‵tou ‵talo.—Sala. 13:1, 2; 74:10; 89:46; 90:13; Sapa. 1:2.

7. Kaia e se tali fakavave mai faeloa ne Ieova a ‵tou ‵talo?

⁷ Kaia e se tali mai fakavave ne Ieova a ‵tou fakamolemole? Masaua me e faka‵pau ne ia te ‵tou fesokotakiga mo ia ki se fesokotakiga o se tamaliki mo tena tamana. (Sala. 103:13) E se fakamoemoe se tamaliki ke tuku atu faeloa ne ana mātua i te taimi eiloa tenā a mea e manako a ia ki ei. A nisi manakoga o tama‵liki e se nā loa ko tāua. E faka‵tali a nisi mātua ki te taimi tonu. A ko manakoga o mātua e se fetaui mo manakoga o te tamaliki e pelā foki mo manakoga o nisi tino. E se gata i ei, a te fakataunu faeloa te manakoga o te tamaliki ko fai ei ke fesuiaki te tulaga o te matai mo te pologa, ko fai te tamaliki e pelā me se matai kae ko te tamana e pelā me se pologa. I se auala tai ‵pau, e iloa ne Ieova a ‵tou manakoga kae filifili aka ne ia te taimi tonu ke tali mai ei a ia ki ‵tou ‵talo. E pelā me ko te ‵tou Mafuaga poto, ‵tou Matai alofa mo te Tamana faka-te-lagi, i o ia te aiā ke fai  penā. Kafai e fakataunu a ‵tou manakoga katoa i te taimi loa tenā, e mafai ei o fakamakosu ne ia te vā o tatou mo ia.—Fakatusa ki te Isaia 29:16; 45:9.

8. Se a te tautoga a Ieova e uiga ki ‵tou tapula?

⁸ A te suā pogai, e iloa faka‵lei ne Ieova a ‵tou tapula. (Sala. 103:14) Tela la, e se fakamoemoe a ia ke kufaki tatou i ‵tou malosi eiloa kae e tuku mai ne ia te fesoasoani e pelā me se tamana. E tonu, i nisi taimi, e se mafai o fa‵ki tatou i ‵tou fakalavelave. Kae e fakatalitonu mai a Ieova me ka se tiaki lele ne ia ana tavini ke sili atu te lotou logo‵mae i te mea e mafai ne latou o kufaki. Ao, “ka tuku mai foki ne ia te auala e ‵sao ei koutou.” (Faitau te 1 Kolinito 10:13.) Tela la, e isi ne pogai ‵lei ke tali‵tonu tatou me iloa ‵lei ne Ieova a mea kolā e mafai o kufaki tatou i ei.

9. Ne a ‵tou mea e ‵tau o fai māfai e ‵talo atu mo te fesoasoani ki a Ieova kae sē tali fakavave mai a ia ki ‵tou ‵talo?

⁹ Kafai e se tali fakavave mai ne Ieova ‵tou ‵talo, ke faka‵tali tatou ki a Ia telā e iloa ‵lei ne ia te taimi tonu ke fesoasoani mai ei a ia ki a tatou. Masaua me e kufaki malosi foki a ia, me e manako malosi a ia o faka‵sao tatou. “A te Aliki [Ieova] e fakatalitali mai eiloa ke toe saga atu a ia mo te alofa ki a koutou. E toka eiloa a ia o fai faka‵lei koutou me i a ia e fai mea tonu faeloa. Amutia latou kola e tuku katoatoa atu olotou loto ki te Aliki [Ieova].”—Isa. 30:18.

10-12. (a) Ne a tulaga faiga‵ta e fepaki mo se Kelisiano telā e tausi ki se kāiga telā e masaki malosi? (e) Kafai e talitonu koe ki a Ieova i taimi faiga‵ta, ka pokotia pefea tou fesokotakiga mo ia? Taku mai se fakaakoakoga.

¹⁰ Kafai e fakafesagai mo mea faiga‵ta, e mafai o maua ne koe te lagonaga ne oko ki a Paulo—e pelā me ko nofo atu i loto io me ko pilipili atu koe ki te “gutu o te leona.” Konei eiloa a taimi e tofotofogina ‵tou loto talitonu ki a Ieova—kae e tāua foki. E pelā me se fakaakoakoga, mafaufau la me tausi ne koe se tino i te kāiga telā e maua ne se masaki matagā. Kāti ne ‵talo atu koe ke maua te poto mo te malosi. * Mai te faiga ne koe a mea katoa e mafai o fai ne koe, e mata e maua ne koe te filemu ke iloa atu me e onoono atu a Ieova ki a koe kae ka tuku atu ne ia a mea e manakogina ke kufaki ei koe mo te fakamaoni?—Sala. 32:8.

¹¹ Kāti e mafai o ‵kese a fakanofonofoga. E mafai o kese‵kese a mau mai tokita. Io me seai se fesoasoani e maua ne koe mai kāiga kolā ne fakamoemoe koe me ka fesoasoani atu ki a koe i taimi faiga‵ta. ‵Sala atu faeloa ki a Ieova ke maua te malosi. Ke fakapilipili atu faeloa ki a ia. (Faitau te 1 Samuelu 30:3, 6.) Kafai ko maua ne koe a tali ki au ‵talo, ka fai ei ke malosi a tou fesokotakiga mo Ieova.

¹² Ne fakatalitonu mai ne Linda * a te ‵tonu o te mea tenei i te taimi ne fesoasoani atu a ia i te tausiga o ana mātua kolā ko ma‵saki ‵ki i tausaga fakaotioti o lā olaga. “I te tulaga tenā, ne seiloa ne taku avaga, toku tuagane mo au a te mea e ‵tau o fai ne matou. Ne mafau‵fau matou i nisi taimi me ko seai se fakamoemoega. Kae mai te ‵toe mafaufau ki mea ne ‵tupu, ne lavea faka‵lei ne matou a te auala e fakatasi mai ei a Ieova. Ne fakamalosi ne ia matou kae tuku mai ne ia a mea fua kolā ne manakogina ne matou, faitalia me ne foliga mai me seai se fesoasoani ne maua ne matou.”

13. Ne fesoasoani atu pefea a te talitonu ki a Ieova ki se tuagane ke kufaki i fakalavelave fakalogo‵mae e uke?

¹³ A te talitonu katoatoa ki a Ieova e mafai foki o fesoasoani mai māfai e fe‵paki  mo se fakalavelave. I te taimi telā ne manako te avaga a Rhonda, telā e sē se Molimau ke ‵tala te lā avaga, ko te taimi foki tenā ne masaki ei tena tuagane i se masaki fakamataku ko te lupus. I nāi masina mai tua, ne mate atu te avaga a tena tuagane. I te taimi ko ‵lei ei a Rhonda mai i ana fakalavelave fakalogo‵mae, ne kamata ei a ia o paenia tumau. E se leva, kae mate atu tena mātua. Se a te mea ne fesoasoani atu ke kufaki a Rhonda? E fai mai a ia: “Ne fesokotaki faeloa au mo Ieova i aso katoa, ke oko foki loa ki tamā fakaikuga e fai ne au. A te faiga tenā, ne fai ei a Ieova pelā me se tino tonu ki a au. Ne akoako mai ei ke fakalagolago atu au ki a ia i lō ki a au eiloa io me ki nisi tino. Kae ko te fesoasoani ne tuku mai ne Ieova ki a au se mea tonu eiloa—ne maua ne au a mea katoa kolā ne manako au ki ei. A ko te ikuga, ne lagona ne au me e ga‵lue fakatasi eiloa au mo Ieova.”

14. Se a te loto talitonu e mafai o maua ne se Kelisiano fakamaoni māfai e fakatea sena kāiga?

¹⁴ Mafaufau ki te suā tulaga faigata. Mafaufau la māfai ko fakatea atu sou kāiga pili. Mai au sukesukega ki te Tusi Tapu, e iloa ne koe a faifaiga e ‵tau o fai ki se tino e fakatea. (1 Koli. 5:11; 2 Ioa. 10) Kae se mea faigata ke tausi ki fakanofonofoga e uiga ki se tino fakatea i nisi taimi. * E mata, e mafai o talitonu koe me ka tuku atu ne tou Tamana faka-te-lagi a te malosi ke tumau o tausi a fakatakitakiga i te Tusi Tapu e uiga ki te tino fakatea? E mata, e matea ne koe me i te faiga tenei e fai ei ke fakamalosi aka tou fesokotakiga mo Ieova?

15. Kaia ne seki fakalogo a Atamu ki te fakatonuga a Ieova i Etena?

¹⁵ I te feitu tenei, ke mafaufau tatou ki  te tagata muamua, ko Atamu. E mata, ne talitonu a ia me ka sē fakalogo a ia ki a Ieova kae ka tumau eiloa a ia i te ola? Ikai, me e fai mai te Tusi Tapu me e se ko Atamu “ne faka‵segina.” (1 Timo. 2:14) Kae kaia ne seki fakalogo ei a ia? Ona ko tena alofa ki tena avaga, ne kai ei ne ia te fuaga o te lakau telā ne tuku atu ne Eva. Ne fakalogo a ia ki te leo o tena avaga i lō te Atua, ko Ieova.—Kene. 3:6, 17.

16. Ko oi e ‵tau o fakasilisili ki ei a te ‵tou a‵lofa, kae kaia?

¹⁶ E mata, e fakauiga i ei me e se ‵tau o alofa malosi tatou ki ‵tou kāiga? Ikai! Kae e ‵tau loa o sili atu te ‵tou a‵lofa ki a Ieova. (Faitau te Mataio 22:37, 38.) E fai ne tatou a te mea tenei mō te ‵lei o ‵tou kāiga, faitalia me tavini atu latou ki a Ieova io me ikai. Tela la, ke tumau i te fakamalosi a tou alofa mō Ieova mo tou talitonu ki a ia. Kae kafai e logo‵mae koe i te fakatea atu o sou kāiga, tuku katoatoa atu ne koe te mea tenā ki a Ieova e auala i te ‵talo. * (Loma 12:12; Fili. 4:6, 7) Fakaaoga te tulaga faigata tenei ke fai ei tou fesokotakiga mo Ieova pelā me se mea tonu. I te feitu tenei, ka fesoasoani atu ei ke kilo atu faeloa ki a Ieova ke maua mai ei ne koe a toe ikuga ‵lei.

17. Kafai e fakalave‵lave tatou i te galuega talai o te Malo, e fakaasi atu pefea ‵tou tali‵tonu ki a Ieova?

¹⁷ Se a te pogai ne fakasao ei a Paulo mai “te gutu o te leona”? E fai mai a ia: “ko te mea ke fakataunu katoatoa te galuega talai e auala i a au, ke lagona ne fenua katoa.” (2 Timo. 4:17) E pelā mo Paulo, kafai e fakalave‵lave tatou i te faiga o te galuega talai, ka tali‵tonu tatou me ka lavea ne Ieova kae ka “fakaopoopo” mai ne ia a mea katoa kolā e ma‵nako tatou ki ei. (Mata. 6:33) E pelā me ne tino talai o te Malo, ko oti ne “tuku mai ki a [tatou] a te tala ‵lei” kae e taku ne Ieova tatou ko tino kolā e “ga‵lue fakatasi” mo ia. (1 Tesa. 2:4; 1 Koli. 3:9) Mai te tumau i te fakalavelave faeloa i te galuega a te Atua, ka faigofie ei ke faka‵tali tatou ke tali mai ne Ieova a ‵tou ‵talo.

18. I auala fea e mafai ei o ati aka ‵tou tali‵tonu ki a Ieova kae fakamalosi aka ei ‵tou fesokotakiga mo ia?

¹⁸ Tela la, ke na fakaaoga ne tatou a te vaitaimi tenei ke fakamalosi aka ei ‵tou fesokotakiga mo te Atua. Kafai e isi se tulaga e fai ei ke manava‵se tatou, fakaaoga te avanoaga tenā ke fakapili‵pili atu tatou ki a Ieova. Ao, mai te suke‵suke ki te Muna a te Atua, ‵talo faeloa, kae aofia i so se polokalame faka-te-agaga, ke na tali‵tonu tatou me e mafai kae lavea ne Ieova a ‵tou fakanofonofoga i te taimi nei pelā foki mo aso mai mua.