KE FAKATUSA ki te lakau lasi ko te alasi i Lepanona, e mafai o se foliga gali te lakau ko te olive telā ko matua ‵ki. Kae ui ei, e isi eiloa se mea e tu ‵kese ei te lakau ko te olive me mafai ne ia o ola ki se taimi leva. Nisi olive ko ‵nofo ki se 1,000 tausaga te ma‵tua. E fai ne aka lasi o te olive ke mafai ne ia o toe ola aka i a ia eiloa faitalia foki loa ko oti ne ne ‵kati ki lalo. Ka tumau eiloa i te ola o te olive ki te leva loa telā e mafai ei o ola ana aka.

Ne talitonu a te toeaina ko Iopu i a ia ka mafai o toe fakaola mai faitalia e mate a ia. (Iopu 14:13-15) Ne fakaoga ne ia se lakau—kaati ko te olive—ke fakatusa ki ei tena loto talitonu ki te mafai ne Ieova o toe fakaola mai a ia mai te mate. Ne fai mai a Iopu, “Kafai se lakau ne ‵kati ki lalo, kae e isi eiloa se fakamoemoega me e mafai o toe ola aka.” Kafai ko ‵to mai a vaiua mai tua o se taulā, ka mafai o toe somo aka mai i ana aka a tamā kaulā kolā ne pakupaku ko mafai ei o toe ola aka e pelā me se “lakau fatoa tupu aka.” —Iopu 14:7-9.

E pelā loa me te tino fai fatoaga telā e naunau malosi tena loto ke lavea ne ia a aka o se olive telā ne ‵kati ki lalo ke toe somo aka, e penā foki te naunau o te loto o Ieova ke toe faka‵tu mai ana tavini kolā ne mate fakatasi mo nisi tino aka foki. (Mata. 22:31, 32; Ioa. 5:28, 29; Galu. 24:15) Se mea fakafiafia ‵ki ke fakafetaui atu ki tino pele kolā ko mate kae ke ‵kilo atu ki te fia‵fia telā e maua ne latou me ko toe ola mai latou!