1. Kaia e ‵tau ei o fakamalosi faeloa a te ‵tou fesokotakiga mo Ieova?

E MATA, a koe se Molimau a Ieova telā ko oti ne tukugina atu kae papatiso? Kafai e penā loa, ko maua ne koe te tauliaga tāua—ko tou fesokotakiga totino mo te Atua. Kae ko te fesokotakiga tenā e fakafesagai atu ki fakamalosiga mai te lalolagi a Satani pelā foki mo te ‵tou tulaga se ‵lei katoatoa. E fakafesagai atu a Kelisiano katoa ki te tulaga faigata tenei. Tela la, e ‵tau o fakamalosi faeloa a te ‵tou fesokotakiga mo Ieova.

2. (a) Se a te uiga o te fesokotakiga? (Ke onoono ki te fakamatalaga fakaopoopo.) (e) E mafai pefea o fakamalosi aka te ‵tou fesokotakiga mo Ieova?

² E pefea te mautinoa ki a koe tou fesokotakiga mo Ieova? E mata, e manako koe o fakamalosi aka? E fai mai i te Iakopo 4:8 te auala e mafai o fai ne tatou: “Fakapilipili atu ki te Atua, kae ka fakapilipili mai a ia ki a koutou.” Masaua me aofia i te mea tenei a feitu e lua. * I te taimi e taumafai ei ke fakapilipili atu tatou ki te Atua, kae ka fakapilipili mai foki a ia ki a tatou. Ka fakamalosi aka ne te faifaiga tenei a te ‵tou fesokotakiga mo Ieova. A ko te  ikuga, ka mautinoa tonu eiloa a te fesokotakiga tenā ki a tatou. E ati aka ne tatou te vaegā loto talitonu ne maua ne Iesu i te taimi ne fai mai a ia: “Ka ko ia telā ne uga mai ne ia au, e tonu eiloa, kae . . . e iloa ne au a ia.” (Ioa. 7:28, 29) Kae ne a la auala mautinoa e mafai o fakagalue ne koe ke fakapilipili atu ei ki a Ieova?

3. E mafai pefea o fesokotaki atu tatou ki a Ieova?

³ A te fesokotaki atu faeloa ki a Ieova se vaega tāua ke fakapilipili atu ei ki a ia. E mafai pefea o fesokotaki atu koe ki te Atua? Ea, e fesokotaki atu koe pefea ki sou taugasoa telā e nofo ‵mao? Kāti e tusi atu koe ki ei kae fai‵pati sāle i luga i te telefoni. E faipati atu eiloa koe ki a Ieova e auala i te ‵talo faeloa ki a ia. (Faitau te Salamo 142:2.) Kae e talia ne koe a Ieova ke faipati atu ki a koe, māfai e faitau faeloa koe ki tena Muna tusia kae mafaufau ‵loto ki ei. (Faitau te Isaia 30:20, 21.) Nei la, ke na onoono tatou ki feitu e lua kolā e fakamalosi aka ne te fesokotakiga tenei o koe mo Ieova a te ‵tou vā mo ia, mai te faiga ne tatou a ia pelā me se taugasoa tonu o tatou.

4, 5. E fesokotaki mai pefea a Ieova ki a koe e auala i tena Muna tusia? Taku mai se fakaakoakoga.

⁴ E mautinoa eiloa me e ‵lago eiloa ki te manatu me e maua i te Tusi Tapu a fekau a te Atua ki tino katoa. Kae, e mata e fakaasi mai foki i te Tusi Tapu a te auala e mafai ei o fakapilipili atu koe ki a Ieova? Ao. E pefea la? I te taimi e faitau kae sukesuke faeloa koe ki te Tusi Tapu, mafaufau ki te auala e ‵saga atu koe ki pati i ei kae mafaufau ki te auala e mafai ei ne koe o fakagalue e ‵tusa mo ou fakanofonofoga; ko talia ei ne koe a Ieova ke faipati atu ki a koe e auala i tena Muna. Ka fai ne te mea tenei ke maua ne koe se fesokotakiga ‵pili mo ia.—Epe. 4:12; Iako. 1:23-25.

⁵ E pelā me se fakaakoakoga, ke faitau kae mafaufau ‵loto ki pati a Iesu ke “sa fakaputu ne otou koloa i te lalolagi nei.” Kafai ko iloa ne koe me e fakamuamua ne koe a manakoga o te Malo i tou olaga, ka fiafia eiloa a Ieova ki a koe. I te suā feitu, kafai e lavea ne koe te tāua ke fakafaigofie tou olaga kae saga malosi atu ki manakoga o te Malo, ka fakasino atu eiloa ne Ieova ki a koe a te auala e mafai ei o fakapilipili atu koe ki a ia.—Mata. 6:19, 20.

6, 7. (a) Mai te suke‵suke tatou ki te Tusi Tapu, e pokotia pefea te ‵tou a‵lofa ki a Ieova e pelā foki mo tena alofa ki a tatou? (e) Se a te mea e ‵tau o fakamoe‵moe tatou ki ei māfai e fai ‵tou sukesukega totino?

⁶ Ka uke eiloa a feitu e mafai o faka‵lei aka ne tatou i te feitu faka-te-agaga māfai e suke‵suke tatou ki te Tusi Tapu. E fai foki  ne ia ke ‵poko te ‵tou loto fakafetai mō auala ‵gali o Ieova, kae fakaosofia ne ia tatou ke a‵lofa malosi ki a ia. Kae kafai ko gasolo aka ki luga te ‵tou a‵lofa ki te Atua, ka gasolo aka foki o malosi tena alofa mō tatou, kae fakamalosi aka ei te ‵tou vā fesokotaki mo ia.—Faitau te 1 Kolinito 8:3.

⁷ Ko te mea ke fakapili‵pili atu tatou ki a Ieova, e tāua ke suke‵suke tatou fakatasi mo se fakamoemoega tonu. E fai mai te Ioane 17:3, penei: “Tenei te uiga o te ola se-gata-mai, ke iloa tonu ne latou a koe, ko te Atua tonu e tokotasi, penā foki loa mo te tino telā ne uga mai ne koe, ko Iesu Keliso.” Tela la, e se fakamoe‵moe tatou ke maua fua te iloaga kae ke “iloa tonu” ne tatou a Ieova e pelā me se Tino Tonu ki a tatou.—Faitau te Esoto 33:13; Sala. 25:4.

8. (a) Se a te mafaufauga e mafai o sae aka e uiga ki te auala ne saga atu ei a Ieova ki te tupu ko Usia, pelā mo te fakamatalaga i te 2 Tupu 15:1-5? (e) Kafai e iloa ne koe a Ieova, ka pefea ou lagonaga ki mea e fai ne ia?

⁸ Kafai ko iloa faka‵lei ne tatou a Ieova, ka se manava‵se tatou māfai e se fakamatala mai i te Tusi Tapu a te pogai e gasuesue ei a ia penā. E pelā me se fakaakoakoga, e saga atu koe pefea ki te auala ne saga atu ei a Ieova ki te tupu o Iuta ko Usia? (2 Tupu 15:1-5) Masaua la me e tiga loa a “koga tapuaki fapaupau e seki ofa, tela la, a tino koi olo eiloa o ofo taulaga kae sunu mea ma‵nogi i ei,” ne gasuesue eiloa a Usia o “fai eiloa ne ia a mea kolā e fiafia ki ei te Aliki [Ieova].” Kae ui i ei, “ne fai ne te Aliki [Ieova] a Usia ke maua ne te lepela, kae ne tumau eiloa i a ia a te masaki tena ke oko ki tena mate.” Kaia? E se fakamatala mai i te tala a te pogai. E mata, e ‵tau o fai ne te mea tenei ke mafau‵fau tatou me isi se pogai ‵tau ne fakasala ei ne Ieova a Usia io me ikai? Kafai e iloa ‵lei ne tatou a auala o Ieova, ka se ‵poi eiloa tatou i ei. E aofia i te mea tenā e iloa ne tatou me e fakasala faeloa ne Ieova a tino “i te mea ‵tau.” (Iele. 30:11) E fakatalitonu mai a te vaegā iloaga tenā ki a tatou me faitalia loa e se iloa ne tatou te pogai ne gasuesue ei a Ieova o fai te mea tenā ki a Usia, e tali‵tonu tatou me i Ana fakamasinoga e amio‵tonu.

9. Ne a pogai ne fakaoko atu ei ne Ieova a te lepela ki luga i a Usia?

⁹ E ui i ei, ka maua ne tatou a fakamatalaga fakaopoopo e uiga ki te mea tenei i te Tusi Tapu. I te tala telā e maua i te 2 Nofoaiga Tupu 26:3-5, 16-21, e tauloto ne tatou me e tiga eiloa ne fai ne Usia a te mea tonu i te kilokiloga a Ieova, kae i se taimi fakamuli loa i te olaga “ne gasolo ake ei a ia o fakamatamata.” Ona ko te fakamatamata, ne fai ne ia se galuega telā ne talia fua ke fai ne faitaulaga. E toko valu sefulu tasi faitaulaga ne fai atu me i a ia e ‵se. Ne saga atu pefea a Usia ki ei? Ne fakaasi atu ne ia te lasi o tena fakamatamata. Ne “kaitaua a ia” ki te kau faitaulaga. E se tioa eiloa o fakaoko atu ne Ieova a te lepela ki a ia!

10. Kaia e se ‵tau o fakafesili faeloa ne tatou a pogai e gasuesue ei a Ieova, kae e mafai pefea o fakamalosi aka te ‵tou loto tali‵tonu ki auala amio‵tonu o Ieova?

¹⁰ Ke mo a e galo i a tatou te manatu tāua. Kafai e se fakamatala likiliki mai a tala i te Muna a te Atua e pelā mo nisi tala i te Tusi Tapu, ka pefea tou kilokiloga ki ei? E mata, ka fakamalosi atu ei ke fakafesili ne koe te amiotonu o te Atua? Io me fakasako‵sako atu koe me e maua i te Tusi Tapu a fakamatalaga ke fakatalitonu atu ei me e iloa ‵lei ne Ieova te mea tonu io me ko te mea ‵se? (Teu. 32:4) Kafai ko iloa ‵lei ne tatou i a Ieova se Tino tonu ki a tatou, ka gasolo aka o lasi te ‵tou a‵lofa mo te ‵tou loto fakafetai mō ana auala kae ko se manakogina ne tatou se fakamatalaga e uiga ki ana mea ne fai. Ke loto talitonu me ka fesoasoani atu ki au taumafaiga mai te sukesuke kae mafaufau ‵loto ki te auala e fesokotaki mai ei te Atua e auala i tena Muna tusia. (Sala. 77:12, 13) A ko te ikuga, ka  fakamalosi aka ei tou fesokotakiga mo Ieova, e pelā me se mea mautinoa ‵tonu.

11-13. E iloa pefea ne koe me e fakalogologo mai a Ieova ki au ‵talo? (Ke onoono ki te ata i te kamataga.)

¹¹ E fakapili‵pili atu loa tatou ki a Ieova e auala i ‵talo. E ‵viki atu tatou ki a ia, fafetai ki a ia, kae ‵sala atu ki tena takitakiga. (Sala. 32:8) Kae ke mautinoa tou fesokotakiga mo Ieova, e ‵tau mo koe o loto talitonu me e lagona ne ia au ‵talo.

¹² E tali‵tonu a nisi tino me i te ‵talo se mea telā e aoga fua mō te mafaufau. E tali‵tonu latou me e fesoasoani atu te ‵talo ke mafaufau faka‵lei koe ki ou fakalavelave kae ‵sala atu foki ki se auala e mafai o fakalei aka ei. Mai tafa o mea konā, e iloa pefea ne koe me e lagona tonu ne Ieova au ‵talo?

¹³ Mafaufau ki te mea tenei: A koi tuai o liu tino, ne iloa muamua ne Iesu te auala e tali ei ne Ieova a ‵talo o ana tavini. Kae i tena galuega talai i te lalolagi , ne fakaaoga ne Iesu te ‵talo ke fakaasi atu ana lagonaga ki tena Tamana i te lagi. Moi ne fai e iloa ne Iesu me i a Ieova e se fakalogologo mai ki ana ‵talo, ea e mata, ka fakamāumāu ne ia te pō kātoa o ‵talo atu? (Luka 6:12; 22:40-46) E mata, ne ‵tau o akoako atu ne ia ana soko ke ‵talo atu moi fai ne iloa ne ia me i te ‵talo ko te fakaasiatuga fua o mafaufauga? E manino ‵lei, me ne iloa ne Iesu i te ‵talo ko te auala ke fesokotaki tonu atu ki a Ieova. I se taimi e tasi, ne fai atu a Iesu ki tena “Tamana Au e fakafetai atu ki a koe me ko fakalogologo mai koe ki a au. E tonu, e iloa ne au me fakalogologo mai faeloa koe ki a au.” E mafai o maua ne tatou te vaegā loto talitonu penā ia Ieova e “tali mai eiloa . . . ki talosaga.”— Ioa. 11:41, 42; Sala. 65:2.

14, 15. (a) E mafai pefea o aoga ki a tatou a te fakamatala maea atu ‵tou manakoga i ‵tou ‵talo? (e) Ne fesoasoani atu pefea a te ‵talo ke fakamalosi aka ne se tuagane tena fesokotakiga mo Ieova?

¹⁴ Kafai e fakamatala maea atu ne koe ou manakoga i au ‵talo, ka faka‵tali eiloa koe mo te fiafia ki te auala e tali mai a Ieova ki tou ‵talo, faitalia me e tali mai a ia i se auala telā e se matea ne koe. Ka ‵kilo atu tatou ki a Ieova e pelā me se tino tonu eiloa māfai e tali mai ne ia ‵tou ‵talo. E se gata i ei, ko te lasi o te fakaasi atu ne koe ou lagonaga  ‵loto ki a Ieova, ko te lasi foki o te pili atu o ia ki a koe.

¹⁵ Mafaufau ki te tala o Kathy. * Ne seki fiafia a ia ki te galuega talai, faitalia me ne kau atu faeloa a ia ki ei. E fai mai a ia: “E se tī fiafia sāle au ki te galuega talai. E tonu, au e se fiafia eiloa ki ei. I te taimi ne litaea ei au mai taku galuega ‵togi, ne fakamalosi mai se toeaina ki a au ke paenia tumau; ne tuku mai foki loa ne ia te pepa paenia ke faka‵fonu ne au. Ne fakaiku aka ne au ke paenia, kae ne kamata foki o ‵talo atu au ki a Ieova ke tuku mai ki au se manakoga ke fiafia ki te galuega talai.” E mata, ne tali mai a Ieova ki ana ‵talo? Ne fai mai a ia: “Ko tolu nei oku tausaga i te galuega faka-paenia. Ona ko te uke o taimi ne fakamāumāu ne au i te galuega talai kae tauloto mai nisi tuagane, ko gasolo aka eiloa toku atamai i te galuega talai. Nei la, ko sili atu te gali mo toku fiafia i te galuega talai. A ko te ‵toe mea tāua, me gasolo eiloa o pili atu a toku fesokotakiga mo Ieova i aso nei i lō te taimi muamua.” E tonu, ne fesoasoani atu a ‵talo a Kathy ke fai tena fesokotakiga mo Ieova e pelā me se mea mautinoa ‵tonu ki a ia.

16, 17. (a) Ne a mea e ‵tau o fai ne tatou ke fakamalosi aka ei kae gasolo ki mua a ‵tou fesokotakiga mo Ieova? (e) Ne a mea ka sau‵tala tatou ki ei i te suā mataupu?

¹⁶ A te atiakaga o se fesokotakiga ‵pili mo Ieova se fakamoemoega e ‵tau o fakatumau i tou olaga. E ‵tau o gasue‵sue tatou o fakapili‵pili atu ki te Atua māfai e ma‵nako tatou ke fakapilipili mai a ia ki a tatou. Tela la, mai mea katoa, ke na tumau tatou i te fesokotaki atu faeloa ki te Atua e auala i te sukesuke ki te Tusi Tapu kae ‵talo. A ko te ikuga, ka fai ne te fesokotakiga malosi o tatou mo Ieova ke mafai ne tatou o fakafesagai atu ki ‵tou fakalavelave mo te manuia.

¹⁷ E tonu, e mafai o ‵sae aka a fakalavelave totino faitalia me e ‵talo atu faeloa tatou. E mafai eiloa o galo atu te ‵tou loto tali‵tonu ki a Ieova i vaegā taimi penā. E mafai o mafau‵fau tatou me se lagona tonu ne Ieova ‵tou ‵talo io me ko se fia fesokotaki mai a ia ki a tatou. E mafai pefea o fakafesagai atu tatou ki tulaga penā mo te loto talitonu me i te ‵tou fesokotakiga mo te Atua se mea tonu? Ka fakamatala mai i te suā mataupu a te mea tenei.