TALU mai te 1992, ne ‵tofi aka ne te Potukau Pule a toeaina Kelisiano kolā ko ma‵tua ‵lei ke fesoasoani atu ki te Komiti i te faiga o olotou galuega. * A tino fesoasoani konei, kolā e aofia i “nisi mamoe,” e tuku atu ne latou a te fesoasoani tāua ki te Potukau Pule. (Ioa. 10:16) E ‵kau atu latou ki fono kolā e fai i vaiaso a te komiti kolā ne ‵tofi ki ei latou, kae tuku atu ne latou a fakamatalaga mo manatu fesoasoani e uiga ki galuega. E fai eiloa ne te Potukau Pule a te fakaikuga fakaoti, kae ka fakagalue eiloa ne tino fesoasoani konei a fakatakitakiga a komiti konei kae fai so se galuega telā e tuku atu ke fai ne latou. E ‵kau fakatasi atu a toeaina fesoasoani konei mo sui o te Potukau Pule ki fono fakapito mo fono ‵lasi o atufenua. E mafai foki o ‵tofigina latou ke asi atu ki nisi ofisa lagolago e pelā me ne sui mai te ‵tou laumua.

Ne fai mai se tino fesoasoani e tokotasi telā ne kamata o galue i ei talu mai te taimi ne kamata i ei te fakatokaga tenei, ana muna: “Kafai e saga tonu atu au o fai a galuega kolā e fai ne au, ko mafai ei o ‵saga katoatoa atu a te Potukau Pule ki nisi fakatokaga faka-te-agaga.” I te taimi ne toe mafaufau ei a ia ki tena tofiga pelā me se tino fesoasoani i se lua sefulu tausaga ko ‵teka, ne fai mai te suā taina, penei: “A te mea tenei se tauliaga telā e sili atu i so se mea telā ne olioli malosi au ke maua.”

E tuku katoatoa atu ne te Potukau Pule a galuega e uke ki tino fesoasoani konei kae loto fakafetai latou ki galuega ‵gali ne fai ne taina fakamaoni kae ga‵lue malosi konei. Tela la, ke na “āva malosi faeloa tatou ki vaegā tino penā.”—Fili. 2:29.