1. Se a te uiga tafasili i te tāua o te Atua, kae e pefea ou lagonaga e uiga ki ei?

E FAI mai te Muna tusia a Ieova ko te Tusi Tapu, me i te “Atua ko te alofa eiloa.” E se fakaasi mai fua i ei me i te alofa se uiga e tasi mai i ana uiga ‵gali e uke kae ko te “Atua ko te alofa eiloa a ia.” (1 Ioa. 4:8) A te alofa ko tena toe uiga tafasili i te tāua. A Ieova e se maua fua i a ia te alofa—a ia ko te māfuaga o te uiga tena. Ko oko eiloa i te gali ke iloa atu me i te Mafuaga o te iunivesi mo mea ola katoa ko te Atua o te alofa! E takitaki ne te uiga tenā ana mea katoa e fai.

2. Se a te mea e fakatalitonu mai ne te alofa o te Atua ki a tatou? (Ke onoono ki te ata i te kamataga.)

² A te lagonaga alofa o te Atua ki ana mea katoa ne faite, se fakatalitonuga ki a tatou me ka fakataunu ana fuafuaga katoa mō te kaukāiga o tino i te ‵toe auala ‵lei kae ka aoga ki tino katoa kolā ka ‵nofo mai lalo i tena pulega. E pelā me se fakaakoakoga, ona ko te alofa “ko oti ne fakamoe ne [Ieova] te aso telā ne fuafua ne ia ke fakamasino ei a te lalolagi nofoaki kātoa i te amiotonu, ne se tagata telā ko oti ne fakasopo aka ne ia,” ko Iesu Keliso. (Galu. 17:31) E mafai o tali‵tonu tatou me ka fakataunu eiloa te mea tenā. Mō tino loto ‵lei kae faka‵logo, ka iku atu eiloa te lotou  fakamasinoga ki se olaga manuia tumau mō aso mai mua ke oko atu eiloa ki te se-gata-mai.

3. Se a tau faka‵tau, ka pefea te tulaga o te olaga moi ne fai e se alofa mai te Atua ki tino katoa?

³ Mafaufau la ki te tulaga o te olaga moi ne fai e seki alofa mai te Atua ki tino. Kāti ka ‵kilo atu fua tatou ki te tulaga masei o te lalolagi nei fakatasi mo pulega a tagata mai lalo i te takitakiga a te atua sē alofa kae sauā ko Satani te Tiapolo. (2 Koli. 4:4; 1 Ioa. 5:19; faitau te Fakaasiga 12:9, 12.) E fakaasi mai i te mea tenei a te matagā o te olaga i aso mai mua moi ne fai e fakateletele te iunivesi tenei e aunoa mo te takitakiga o te alofa o te Atua.

4. Kaia ne talia ei ne Ieova a tino ‵teke ke ‵teke atu ki tena pulega amiotonu?

⁴ I te taimi ne ‵teke atu ei ki te pulega a Ieova, ne fakamalosi ne te Tiapolo a te tauavaga muamua ke fai foki penā. Ne fakafesili ne ia te saolotoga mo te amiotonu o te pulega sili a te Atua. Tela la, ne ‵losi atu a Satani me ka ‵lei fakafia atu tena pulega i lō te pulega a te Mafuaga. (Kene. 3:1-5) E tiga eiloa ne talia ne Ieova ke fakamaoni mai ne Satani a te ‵tonu o ia, ka toetoe fua te taimi e pule mai ei a ia. Ona ko tena poto sili, ne manako a Ia ke lava te taimi ke fakamaoni faka‵lei aka ei a te sē ‵lei o so se pulega i tafa o tena pulega. E fakaasi mai i te tulaga fakafanoanoa e lavea atu i tino i te lalolagi nei me e seai eiloa se pulega a tagata io me ko Satani e mafai o tuku mai ne latou se pulega ‵lei.

5. Se a te mea ko oti ne fakamaoni faka‵lei mai ne pulega a tino?

⁵ Kāti i se 100 tausaga ko ‵teka, e silia atu mo te 100 miliona o tino ne ‵mate i taua a atufenua. I aso nei, ko gasolo aka eiloa o na ma‵sei atu a tulaga o te lalolagi. Tenei eiloa te mea ko oti ne ‵valo mai i te Muna a te Atua me ka tupu i “aso fakaoti” o te olaga tenei, ko te taimi telā “a tino amio ma‵sei kae fakaloi‵loi tino ka gasolo aka mai te masei o na ma‵sei atu.” (2 Timo. 3:1, 13) E seai eiloa se fakalotolotolua me ko oti ne fakaasi mai i tala fakasolopito a te ‵tonu o pati konei a te Tusi Tapu: “Ieova, e iloa ne au me e se i a te tagata tena auala, e se mafai ne te tino telā e sasale o faka‵tonu tena auala.” (Iele. 10:23, NW) Ne seki faite ne Ieova a tino mo te atamai io me ko te saolotoga ke takitaki ne latou olotou auala i a latou eiloa e aunoa mo ia.

6. Kaia ne talia ei ne te Atua a pulega a tino ma‵sei mō se vaitaimi toetoe?

⁶ E se gata fua i te fakaasi atu a te sē ‵lei o pulega a tino, e isi se pogai ne talia ei ne te Atua ke ‵tupu a mea ma‵sei konā. E fakamaoni atu i ei me ko te pulega fua a te Atua e mafai o manuia. Kafai ko oti ne fakaseai atu ne Ieova a amioga ma‵sei mo tino kolā e fakamāfua aka ne latou, so se tino telā e toe fakafesili ne ia te auala e pule mai ei te Atua i te alofa, ka se toe tuku atu ne te Atua se avanoaga ki te tino tenā. Ka fakaaoga eiloa ne ia a te tala fakasolopito o tino mai te kamataga e pelā me ko te pogai ke ave kea‵tea fakavave a tino ‵teke, ke mo a e toe fakamāfua ne latou a amioga ma‵sei.

7, 8. Ne a nisi auala aka ne fakaasi mai ei ne Ieova tena alofa sili?

⁷ Ko oti ne fakaasi mai ne Ieova tena alofa sili i auala e uke. E pelā me se fakaakoakoga, onoono aka la ki te fakaofoofogia o te iunivesi. E lau i te fia piliona o fakaputugā fetu, e aofia i mea takitasi konā a te fia piliona o fetu mo paneta. E aofia i te Kaniva ko te fetu ko te lā, e aunoa mo te lā, ka se mafai o ola a mea ola katoa i te lalolagi. E fakamaoni mai i mea katoa konei ne faite a te tulaga o te Atua ko Ieova mo ana uiga i ei pelā mo te malosi, te poto, mo te alofa. E tonu, “e lavea faka‵lei atu ana uiga sē lavea talu mai te faitega o  te lalolagi, me e mafai o lavea atu ana mea ne faite, ke oko eiloa ki tena ‵mana telā e seai sena gataga mo tena tulaga e pelā me ko te Atua.”—Loma 1:20.

⁸ I te lalolagi nei, ne faite ne Ieova a mea katoa ke aoga ki mea ola katoa kolā ne faite ne ia ke ola i te lalolagi. Ne faite ne ia te fatoaga palataiso gali mō tino katoa, kae tuku atu ki a latou se mafaufau mo se foitino ‵lei katoatoa ke mafai ei o ola ki te se-gata-mai. (Faitau te Fakaasiga 4:11) E se gata i ei, “ne tuku mai ne ia a mea‵kai ki tino katoa pelā foki mo manu; i tena alofa e se gata mai.”—Sala. 136:25.

9. I tafa o te alofa, e pefea foki a lagonaga o te Atua i nisi taimi, kae kaia?

⁹ E tiga eiloa e fai mai a Ieova i a ia ko te Atua o te alofa, kae ne fakaasi mai foki ne ia tena takalialia ki mea ma‵sei. E pelā me se fakaakoakoga, e fai mai te Salamo 5:4-6 e uiga ki a Ieova, penei: “A koe e sē se Atua telā e fiafia ki faiga ‵se . . . A koe e se fiafia ki tino amio ma‵sei.” Kae ne toe fai mai, penei: “E takalialia koe [Ieova] ki tino sauā kae fai togafiti.”

10, 11. (a) Ka saga atu pefea a Ieova ki tino amio ma‵sei? (e) Se a te taui ka tuku atu ne Ieova ki tino loto ‵lei?

¹⁰ Ona ko ia se Atua e alofa kae e takalialia foki ki amioga ma‵sei, ko te fuafuaga eiloa a Ieova ke fakaseai te lalolagi e pelā foki mo te ‵toega o tino ma‵sei i te iunivesi i te taimi telā ka faka‵tonu aka ei te kinauga e uiga ki te pulega. E tauto mai te Muna a te Atua, penei: “Ka ko tino amio ma‵sei ka afuli kea‵tea. E se toe leva nei, ka ‵galo atu ei a tino amio ma‵sei . . . A fili o te Aliki [Ieova] ka ‵galo atu e pelā mo pula o lakau o te vao; Ka ‵galo atu foki latou e pelā mo se au o te afi.”—Sala. 37: 9, 10, 20.

¹¹ I te suā feitu, e folafola mai foki te Muna a te Atua, penei: “A tino amio‵tonu ka fai mō latou te fenua, kae ka ‵nofo faeloa i ei ki te se gata mai.” (Sala. 37:29) A vaegā tino amio‵tonu penā “ka maua ne latou te manuia mo te filemu katoatoa.” (Sala. 37:11) Ka fakataunu eiloa te mea tenā me e fai faeloa ne te ‵tou Atua alofa a mea kolā e ‵lei mō ana tavini fakamaoni. E fai mai te Tusi Tapu ki a tatou, penei: “Kae ka ‵solo keatea ne ia a loimata katoa mai i olotou mata, kae ka se toe ai se mate, kae ka se toe ai foki se fanoanoa, se tagi io me se ‵mae. Ko palele atu a mea mua.” (Faka. 21:4) Ko tafaga la te gali o te olaga i aso mai mua telā e faka‵tali mai mō tatou katoa kolā e loto fakafetai ki te alofa o Ieova kae faka‵logo ki a ia e pelā me ko te ‵tou Pule Sili!

12. Ko oi a tino e mafai o taku pelā me ne “tino amio ‵lei”?

¹² E fai mai te Muna a Ieova ki a tatou, penei: “Onoono faka‵lei ki te tino amio ‵lei, kilokilo faka‵lei foki ki te tino amiotonu; A te tino filemu e fanafanau. Ka ko tino agasala e malaia eiloa, a fanau foki a latou ka ‵solo keatea.” (Sala. 37:37, 38) A te “tino amio ‵lei” ka iloa ‵lei ne ia a Ieova mo tena Tama kae ka fakalogo o fai te loto o te Atua. (Faitau te Ioane 17:3) E puke ‵mau te tino tenā ki pati i te 1 Ioane 2:17: “E se gata i ei, ka fakaseai atu te lalolagi e pelā foki mo ana manakoga, kae ko te tino telā e fai ne ia te loto o te Atua ka tumau eiloa ki te se-gata-mai.” Ona ko te pili mai o te gataga o te lalolagi, ko oko eiloa i te tāua “ke fakamoemoe koe ki te Aliki [Ieova] kae fakalogo ki ana fakatonuga.”—Sala. 37:34.

13. Se a te faifaiga te alofa sili ne fakaasi atu ne Ieova ki tino agasala?

¹³ E tiga eiloa e se ‵lei katoatoa tatou, e mafai eiloa ne tatou o ‘tau‵tali i auala o Ieova.’ E mafai foki o maua ne tatou se fesokotakiga ‵pili mo Ieova ona ko faifaiga o tena alofa sili. Ne fakatoka ne ia te taulaga togiola a Iesu Keliso, kae ‵tala mai te auala  mō tino faka‵logo katoa ke saoloto mai te agasala mo te mate telā ne togi mai ne Atamu. (Faitau te Loma 5:12; 6:23.) Ne talitonu katoatoa a Ieova ki tena Tama fagasele e tokotasi, telā ko leva ne fakamaoni atu ki a ia i luga i te lagi mō se fia o tausaga. E pelā me se Tamana alofa, e mautinoa eiloa me ne logo‵mae malosi te Atua i faifaiga sē amio‵tonu kolā ne oko ki a Iesu i tena nofoga i te lalolagi. E ui i ei, ne ‵lago atu a Iesu mo te fakamaoni ki te pulega sili a te Atua kae ne fakaasi atu ei me e mafai eiloa se tino ‵lei katoatoa o tumau i te fakamaoni ki a Ieova faitalia a tulaga faiga‵ta ne fepaki mo ia.

14, 15. Se a te mea ne mafai o fakataunu ne te mate o Iesu?

¹⁴ Ne fakatumau ne Iesu tena fakamaoni mo tena ‵lago atu ki te pulega sili a Ieova mai lalo o tofotofoga faiga‵ta, kae ne mate a ia pelā me se tavini fakamaoni a tena Tamana. E ‵tau eiloa o loto fakafetai tatou me mai tena mate, ne ‵togi foki ne Iesu te togiola telā ne manakogina ne tino katoa kae ke ‵tala mai i ei te auala ke maua te ola se-gata-mai i te lalolagi fou telā ne folafola mai ne te Atua! Ne fakaasi mai ne te apositolo ko Paulo me se faifaiga alofa telā ne fakaasi mai ne Ieova mo Iesu i ana pati konei: “E tonu, ne mate a Keliso mō tino sē amioatua i te taimi tonu, a koi vāi‵vai ei tatou, me e faigata o mate se tino mō se tino amiotonu; kae kāti e mafai fua o mafaufau se tino ke mate a ia mō se tagata ‵lei. Kae ne fakaasi mai ne te Atua tena alofa ki a tatou i te taimi koi agasala ei tatou, me ne  mate a Keliso mō tatou.” (Loma 5:6-8) Ne tusi mai te apositolo ko Ioane, penei: “Ne fakaasi mai te alofa o te Atua ki a tatou e auala i te mea tenei, ne uga mai ne te Atua a tena Tama eiloa e tokotasi ki te lalolagi ko te mea ke mafai o maua ne tatou te ola e auala i a ia. Tenei eiloa te alofa, e se ona ko tatou ne a‵lofa ki te Atua, kae ko ia tenā ne alofa mai ki a tatou kae uga mai ne ia tena Tama ke fai mo fai te taulaga mō ‵tou agasala ke faka‵lei aka ei tatou mo te Atua.”—1 Ioa. 4:9, 10.

¹⁵ E uiga ki te alofa o te Atua mō tino, ne fai mai a Iesu, penei: “Ona ko te lasi o te alofa o te Atua ki te lalolagi ne tuku mai ei ne ia tena Tama fagasele e tokotasi, ko te mea ke se fakaseai atu so se tino e fakatuanaki ki a ia kae ke maua ne ia te ola se-gata-mai.” (Ioa. 3:16) Ko oko eiloa i te lasi o te alofa o te Atua mō tino katoa, me ne talia eiloa ne ia ke tuku mai tena tama e pelā me se togiola faitalia te ‵mafa o te mea tenā ki a ia. A tena alofa e se-gata-mai. Ka fakatāua faeloa ne tatou a te mea tenei. Ne tusi mai a Paulo, penei: “E talitonu au me e se mafai ne te mate io me ko te ola io me ko agelu io me ko malo io me ko mea i te taimi nei io me ko mea ka oko mai io me ko malosi pule io me ko mea i luga io me ko mea i lalo io me ko so se mea ne faite e mafai o ‵vae ne ia tatou keatea mai te alofa o te Atua e auala i a Keliso Iesu te ‵tou Aliki.”—Loma 8:38, 39.

16. Se a te Malo faka-Mesia, kae ko oi a tino ka tuku atu ne Ieova a te pulega o te Malo tenei ki ei?

¹⁶ E fakamaoni mai ne te alofa o te Atua mō tino a te fakatokaga ne fai ne ia e auala i te Malo faka-Mesia. Ko oti ne fakatu ne Ieova te pulega tenei e auala i tena Tama, telā e alofa ki tino katoa kae ka fetaui ‵lei foki a ia ke pule mai. (Faata. 8:31) I te lotou toe‵tuga, ka olo atu eiloa a te toko 144,000 o sui lagolago o Iesu ki te lagi kae ka fakaaoga ne latou te lotou iloaga e pelā me ne tino kolā ne ola i te lalolagi mō te ‵lei o tino katoa. (Faka. 14:1) A te Malo ko te matua tāua o akoakoga a Iesu, kae ne akoako ne ia ana soko ke ‵talo atu, penei: “Te motou Tamana telā i te lagi, ke tapu tou igoa. Ke oko mai tou Malo. Ke fai te mea e loto koe ki ei i te lalolagi nei e pelā mo te faiga i te lagi.” (Mata. 6:9, 10) Se fakamanuiaga eiloa ki tino faka‵logo māfai ko fakataunu a pati i te ‵talo tenā!

17. Fakamatala mai te ‵kese o te pulega a Iesu mai pulega a tino pule agasala.

¹⁷ Ko oko eiloa i te tu ‵kese o te pulega faka-te-lagi alofa a Iesu mai pulega a tino kolā ne takitaki atu ne latou a te fia miliona o tino ki te ‵mate i taua! E atafai tonu atu eiloa a Iesu ki tino kolā e ‵nofo mai lalo i tena pulega kae fakaata mai ne latou a uiga fakaofoofogia o te Atua, maise loa te alofa. (Faka. 7:10, 16, 17) “O‵mai ki a au, a koutou katoa kolā e fi‵ta kae ‵mafa otou amoga, me ka tuku atu ne au ki a koutou se malosi fou,” ko muna a Iesu. “Ke puke ne koutou taku amo kae fakaakoako mai ki a au, me i a au e agamalu kae loto maulalo, kae ka maua ne koutou i ei se malosi fou. Me e māmā taku amo, kae amogofie foki taku amoga.” (Mata. 11:28-30) Ma‵faga o fakatalitonuga alofa a te mea tenā!

18. (a) Se a te mea ko fai nei ne te Malo o te Atua talu mai te taimi ne fakatu aka ei? (e) Ne a mea ka sau‵tala tatou ki ei i te suā mataupu?

¹⁸ E fakaasi mai i valoaga a te Tusi Tapu me i te Malo faka-te-lagi o te Atua ne fakatu aka i te taimi ne fakatasi mai ei a Keliso i te 1914. Talu mai te taimi tenā, ne fakamaopoopo ei a te ‵toega o latou kolā ka pule fakatasi mo Iesu i te lagi e pelā foki mo te “vaitino tokouke” o tino kolā ka ‵sao atu i te gataga o te olaga tenei kae ulu atu ki loto i te lalolagi fou. (Faka. 7:9, 13, 14) E pefea nei te tokouke o te vaitino tokouke i te taimi nei? Se a te mea ne ‵tau o fai ne te potukau tenei? Ka suke‵suke eiloa tatou ki vaegā fesili konei i te suā mataupu.