A IEOVA se Atua kaimalie. (Iako. 1:17) A fetū ‵pula i te lagi mo mea ola katoa i te lalolagi kolā ne faite ne Ieova, ne fakailoga o tena uiga kaimalie.—Sala. 65:12, 13; 147:7, 8; 148:3, 4.

Ona ko te ‵poko o te loto fakafetai o te faisalamo ki tena Mafuaga, ne gasuesue eiloa a ia o ‵fatu se pese e tavae atu ei ki galuega fakaofoofogia a Ieova. Ke faitau te Salamo 104, kae onoono atu me e ‵pau lua lagonaga mo ia io me ikai. Ne fai mai a te faisalamo, penei: “Ka pese atu au ki te Aliki [Ieova] i toku olaga kātoa; i aso katoa e ola ei au, ka tavae atu faeloa au ki toku Atua.” (Sala. 104:33) E mata, e penā foki ou lagonaga?

E manako eiloa a Ieova ke fakaakoako atu tatou ki tena uiga kaimalie. E tuku mai foki ne ia a pogai ‵lei ke fakaasi atu ei ne tatou te uiga kaimalie. Mafaufau la me ne fakaosofia ne ia a te apositolo ko Paulo ke tusi mai, penei: “Fakatonu atu ki tino kolā e mau‵mea i te olaga tenei ke mo a ma fakamaua‵luga, kae ke fakavae te lotou fakamoemoega, e se ki luga i koloa sē mautinoa, kae ki luga i te Atua, telā e tuku mai ne ia ki a tatou a mea katoa ke fia‵fia ei tatou. Fai ki ei ke ga‵lue ki mea ‵lei, ke mau‵mea i te faiga o galuega ‵lei, ke kaima‵lie, ke toka o fetufaaki olotou mea, ko tausi ei mō latou eiloa se fakavae ‵lei i aso mai mua, ko te mea ke puke ‵mau latou ki te ola tonu.”—1 Timo. 6:17-19.

I te taimi ne tusi ei ne Paulo a te lua o ana tusi ki te fakapotopotoga i Kolinito, ne faka‵mafa atu ne ia a te kilokiloga ‵tau e uiga ki te tuku atu o mea. “Ke fai ne tino taki tokotasi te mea telā ko oti ne fakaiku aka i tena loto, ke sē fai mo te fameo io me ko te faimalō, me i te Atua e alofa ki te tino telā e tuku atu ana mea mo te loto fiafia.” (2 Koli. 9:7) E se gata i ei, ne fakasae aka ne Paulo a tino kolā e aoga ki a latou a meaalofa konā: ko tino kolā e maua ne latou a meaalofa ke fakama‵lie aka ei olotou manakoga, mo tino kolā e tuku atu ne latou a meaalofa e maua foki ne latou a fakamanuiaga faka-te-agaga e uke.—2 Koli. 9:11-14.

I te fakaotiga o te vaega o te tusi tenei a Paulo, ne fakasino atu eiloa a ia ki te fakamaoniga sili o te uiga kaimalie o te Atua. “Ke fakafetai atu ki te Atua mō tena meaalofa faivasaga telā e se mafai o fakamatalagina,” ko muna a Paulo. (2 Koli. 9:15) E mautinoa eiloa me i te meaalofa tenei a Ieova e sili fakafia atu i meaalofa katoa ne tuku mai ne ia ki ana tino e auala i a Iesu Keliso. Ko oko eiloa i te fakaofoofogia o te meaalofa tenei, me e se mafai o fakamatalagina tena tāua.

E mafai pefea o fakaasi atu ne tatou a te loto fakafetai mō mea katoa ne fai ne Ieova mo tena Tama mō tatou? A te auala e tasi e fakaasi atu ne tatou te uiga kaimalie, ko te tuku atu o ‵tou taimi, malosi mo kope ke fai ei ke gasolo ki mua a te tapuakiga ‵ma a Ieova, faitalia te foliki io me ko te lasi o te meaalofa e tuku atu ne tatou.—1 Nofo. 22:14; 29:3-5; Luka 21:1-4.