1. E pefea te tāua o te galuega talai ki a Iesu? Fakamatala mai.

NE FIAFIA eiloa a Iesu o faipati e uiga ki te Malo o te Atua. E ‵tusa mo fakamatalaga a te Tusi Tapu, ne faipati a ia i taimi e uke ki te Malo i lō nisi mataupu aka—e silia atu mo te 100 taimi ne faipati ei a ia e uiga ki ei i te faiga o tena galuega talai. Ne fakatāua malosi eiloa ne Iesu a te Malo.—Faitau te Mataio 12:34.

2. E tokofia a tino kolā ne lagona ne latou te fakatonuga telā ne fakamau i te Mataio 28:19, 20, kae kaia e mafai o fakaiku aka ne tatou me e tonu te manatu tenā?

² Mai tua malie eiloa o tena toetuga, ne fakasae atu a Iesu ki tino e silia atu mo te toko 500 kolā ne mafai o fai pelā me ne tino talai o te Malo. (1 Koli. 15:6) Kāti tenei eiloa te taimi ne tuku atu ei ne ia te fakatonuga ke folafola atu te fekau o te Malo ki tino i “fenua katoa”—se galuega faigata i te taimi tenā! * A te galuega tenei ne ‵valo mai ne Iesu, ka fai eiloa ke oko ki te “gataga o te olaga tenei,” kae tenā eiloa te mea ko fai nei. E mautinoa eiloa me e aofia koe i te fakataunuga o te fakatonuga mo te valoaga tenā.—Mata. 28:19, 20.

3. Ne a feitu e tolu kolā ne fesoasoani mai ke fakataunu ne tatou a te fakatonuga e uiga ki te talaiatuga o te tala ‵lei?

 ³ I te otiga ne tuku atu te fakatonuga ke talai, ne toe tauto atu a Iesu ki ana soko, penei: “Au e fakatasi faeloa mo koutou.” (Mata. 28:20) Tela la, ka fai eiloa te galuega lasi tenei mai lalo i tena takitakiga. Kae ne tuku mai ne te ‵tou Atua a “mea ‵lei katoa” ke fesoasoani mai ke fakataunu ne tatou a te fakatonuga tenā. (Epe. 13:20, 21) I te mataupu tenei, ka sau‵tala eiloa tatou ki mea ‵lei konei: (1) ko mea faigaluega kolā ne tuku mai ki a tatou, (2) ko auala e fakaaoga ei ne tatou, a ko te (3) ko fakaakoakoga kolā e maua ne tatou. Muamua la, ke suke‵suke nei tatou ki nisi mea faigaluega kolā ne fakaaoga ne tatou i te 100 tausaga ko ‵teka.

4. Kaia e fakaaoga ei ne tatou a mea faigaluega kese‵kese i te ‵tou galuega talai?

⁴ Ne fakatusa ne Iesu a “te muna e uiga ki te Malo” ki fuaga kolā ne ‵toki i vaegā laukele kese‵kese. (Mata. 13:18, 19) Kāti e fakaaoga eiloa ne se tino ‵toki fatoaga a mea faigaluega kese‵kese ke mafai o ‵toki ne ia a fuaga i tena fatoaga. I se auala tai ‵pau, ko oti ne tuku mai ne te ‵tou Tupu i tausaga e uke a mea faigaluega kolā e mafai o fesoasoani atu ki te fia miliona o tino kolā e lagona ne latou te fekau o te Malo. Kāti ne aoga eiloa a nisi mea faigaluega i se sefulu tausaga ko ‵teka, kae ko nisi koi tumau eiloa te lotou aoga. Kae ne fesoasoani mai eiloa a mea faigaluega konei ke ati aka ne tatou a te atamai e pelā me ne tino talai.

5. Se a te testimony card, kae ne fakaaoga pefea?

⁵ A te mea faigaluega e tasi telā ne fesoasoani atu ki te tokoukega ke kamata o talai ko te testimony card, telā ne kamata o fakaaoga ne tino talai o te Malo i te 1933. A te pepa tenei e nofo ki se tolu ki te lima inisi (7.6 ki te 12.7 cm) tena lasi kae e aofia i ei se fekau toetoe mai te Tusi Tapu. I taimi kese‵kese, e fakafou faeloa a te fekau telā e tusi i luga i te pepa tenā. E faigofie fua te fakamatalaga i ei! Ne aofia eiloa a C. W. Erlenmeyer i te vaega tenei o te galuega talai i te taimi koi sefulu ei ana tausaga. Ne fakamatala mai a ia, penei: “Konei eiloa a pati fakatomua kolā e fai atu i te galuega talai, ‘Fakamolemole, e mafai o faitau ne koe te pepa tenei?’ Kafai ko oti ne faitau ne te tino i te fale, tuku atu te tusi ko olo ei matou.”

6. I te auala fea ne fesoasoani atu ei a te testimony card i te galuega talai?

⁶ Ne fai eiloa te testimony card e pelā me se fesoasoani aoga i auala e uke. E tiga eiloa ne malosi ‵ki te manakoga ke fai te galuega talai, a nisi tino talai e mata ‵ma kae seiloa ne latou o fai olotou pati. Kae ko nisi tino talai e uke ‵ki olotou fakamatalaga e fai atu i se fia fua o minute, kae e se fai atu i se auala atamai! E ‵kese mai i ei a testimony card, me e mu‵tana fua pati kolā ko oti ne filifili faka‵lei ke mafai o fakaaoga ne tino talai “ke fakaoko atu ei te fekau.”

7. Ne a nisi fakalavelave ne fakafesagai mo nisi tino talai i te fakaaogaga o te pepa tenā?

⁷ E tiga te feitu tenā, kae e isi foki loa ne fakalavelave ne ‵sae aka. Ne fai mai a Grace A. Estep, se Molimau telā ko leva i te munatonu, penei: “I nisi taimi, ne mafai o ‵sili atu matou, ‘E a, se a te mea e fakaasi mai i ei? E a e mafai o fai mai ne koe?’” E se mafai o faitau mai ne nisi tino a fakamatalaga i te pepa. E se gata i ei, e mafau‵fau a nisi tino me e tuku atu mā latou te pepa tenā, tela la, e talia ne latou ke puke te pepa mai te tino talai ko ‵pono mai ei olotou mataloa. Kafai e talai atu ki se tino ‵teke, e mafai eiloa ne te tino tenā o ‵sae ne ia te pepa. E tiga te feitu tenā, ne mafai eiloa o fakafesagai atu a ‵tou taina ki tino kae fakaasi ‵tonu atu i a latou ne tino talai o te Malo.

8. Fakamatala mai te auala ne fakaaoga ei a lāleo. (Ke onoono ki te ata i te kamataga.)

⁸ A te suā mea faigaluega telā ne  fakaaoga i tausaga mai te 1930 o vau ki te 1940, ko lāleo, kolā ne fakaigoa ne nisi o taina ki a Alona me e fai katoa loa ne te masini tenā a te talaiga. (Faitau te Esoto 4:14-16.) Mai te taliaga a te tino i te fale, e mafai eiloa o fakatagi ne te tino talai a te lāuga faka-te-Tusi Tapu mō se fa minute, kae oti ko ofo atu ei a nisi tusi. I nisi taimi, e maopoopo mai eiloa te kāiga kātoa o fakalogo‵logo ki te fekau mai te Tusi Tapu. I te 1934, ne kamata o faite ne te Watch Tower Society a lāleo kolā ne mafai o fakaaoga i te galuega talai. Fakamuli ifo, ne mafai o ‵kopi a lāuga faka-te-Tusi Tapu kese‵kese e 92 ki lāleo ke mafai o faka‵tagi atu.

9. Ne magoi pefea a te fakaogaga o te lāleo i te faiga o te galuega talai?

⁹ I te taimi ne fakalogologo ei a ia ki se lāuga faka-te-Tusi Tapu, ne fakamolemole atu eiloa a Hillary Goslin ki tino talai me mafai o nofo mo ia te lāleo mō se vaiaso ko te mea ke fakaasi atu ne ia ki ana tuakoi a te fekau o te Malo. I te taimi ne foki atu ei te tino talai, ne maua atu ne ia ne tino fia‵fia ne faka‵tali mai ki a ia. E se leva, kae ne tukugina atu ei latou konei ki a Ieova, kae ne ‵kau atu fakamuli a tama‵liki fafine e tokolua a Hillary ki Te Akoga i Kiliata, kae maua foki a lā tofiga ‵fou. E pelā loa mo te testimony card, ne fesoasoani atu eiloa a te lāleo ke mafai ne tino e tokouke o kamata te faiga o te galuega talai. Fakamuli ifo, e auala i Te Akoga mō Tino Talai, ka akoako ei ne te Tupu ana tino ke iloa ne latou o talai.

10, 11. Ne fakaaoga pefea a nusipepa mo te letio ke fakasalalau atu ei a te munatonu i te Tusi Tapu, kae kaia ne ma‵goi ‵ki ei a auala konei?

¹⁰ Mai lalo o te takitakiga a te Tupu, ne fakaaoga ne tino o te Atua a auala kese‵kese ko te mea ke mafai o talai atu te tala ‵lei ki tino e tokouke. Ne aoga ‵ki eiloa te auala tenei i te taimi ne ‘seki tokouke ei a tino ga‵lue.’ (Faitau te Mataio 9:37.) I te kamatamataga o te 20 senitenali, ne fakaaoga eiloa a nusipepa ke talai atu ki koga kolā e se tokouke a tino o Ieova i ei. I vaiaso takitasi, ne ualesi atu ne Charles Taze Russell se lāuga ki se kamupane ‵lomi nusipepa. Mai konā, ko toe lafo atu foki ne te kamupane tenā a te lāuga ki kamupane o te nusipepa i Iunaite Sitete, Canada mo Eulopa. I te 1913, ne fakatautau me nofo ki se toko 15,000,000 o tino ne fai‵tau ki lāuga a te taina ko Russell e auala i nusipepa e 2,000 kolā ne ‵lomi!

¹¹ Mai tua o te taimi ne mate ei a te taina ko Russell, ne toe kamata aka foki se suā auala magoi ke fakasalalau atu ei te tala ‵lei. I a Apelila 16, 1922, ne fai ne Joseph F. Rutherford a tena lāuga fakalogologo i te letio ki se aofaki o tino e nofo ki te 50,000. Fakamuli ifo i a Fepuali po 24 i te 1924, ne kamata ei o fakaaoga te fale fakasalalau muamua telā ko te WBBR. E uiga ki te auala fou tenei ke talai atu ki tino, ne fai mai The Watch Tower o Tesema 1, 1924, penei: “E tali‵tonu matou me ka ‵togi māmā te fakaaogaga o te fale fakasalalau kae magoi atu foki i te fakasalalauatuga o te fekau o te munatonu telā ko oti ne fakaaoga sale.” E pelā mo te nusipepa, ne magoi ‵ki eiloa te letio i te fakaokoatuga o te fekau ki tino e tokouke i koga kolā e se tokouke i ei a tino talai o te Malo.

12. (a) Ne a vaega o te galuega talai i koga kolā e tokouke a tino i ei e gali ‵ki ki a koe? (e) Se a te mea e mafai o fesoasoani mai ke manumalo tatou i te mataku māfai e aofia tatou i te vaega tenei o te galuega talai?

¹² Ko gasolo aka eiloa o fakatāua malosi i te taimi nei a te faiga o te galuega talai i koga kolā e tokouke a tino i ei: i koga e faka‵tu ei a pasi, tuleini mo nisi mea fakatele‵tele, i koga e oloolo ei a tino mo maketi. Kafai koe e polele mā talai atu i koga konei, kaia e se ‵talo atu ei koe kae mafaufau ‵loto ki fakamatalaga a se taina telā ko leva ne tavini atu pelā me se ovasia faimalaga, ko Angelo Manera, Jr.: “Ne ‵kilo  atu eiloa māua ki auala ‵fou i te galuega talai e pelā me se auala ke tavini atu ki a Ieova, ke fakamaoni atu a te mā a‵lofa tumau ki a ia, mo te auala ke tofotofo aka ei te mā fakamaoni, kae ne ma‵nako malosi māua o fakatalitonu atu a te fia tavini atu ki a ia mo te loto kātoa i so se auala e fakamolemole mai ei a ia.” A te aofia i se auala fou o te galuega talai i koga e tokouke ei a tino telā e se masani tatou i ei, ka fesoasoani mai ke ati aka ne tatou te talitonu mo te fakatuanaki ki a Ieova, kae iku atu ei ki te malosi i te feitu faka-te-agaga.—Faitau te 2 Kolinito 12:9, 10.

13. Ne a mea tāua e maua ne tatou i te ‵tou website ko te jw.org, kae ne a au tala ‵gali e uiga ki te auala ne fakaasi atu ei ne koe te ‵tou website ki tino?

¹³ E tokouke a tino talai ne fia‵fia o fakaasi atu ki tino a te ‵tou website ko te jw.org, telā e mafai o fai‵tau kae ‵kopi ne latou a ‵tou tusi faka-te-Tusi Tapu i ‵gana e silia atu mo te 700. I aso takitasi, e silia atu mo te 1.6 miliona o tino e onoono ki ‵tou website. E pelā mo te auala ne fakaaoga ei te letio i taimi ko ‵teka, ko mafai nei o fakaoko atu a te fekau o te tala ‵lei ki tino e tokouke kolā e ‵nofo i koga ‵mao, e auala i te ‵tou website.

14. Ne a fakaakoakoga ne manakogina ne tino talai o te Malo, kae se a te akoga ne fesoasoani atu ki a latou ke fai pelā me ne faiakoga apo?

¹⁴ Ko oti ne sau‵tala tatou ki nisi mea faigaluega mo auala kolā ne fakaaoga ke fakasalalau atu ei te tala ‵lei. E ui i ei, ne a a fakaakoakoga ko oti ne maua ne tatou? Mafaufau la māfai a te tino i te fale e ‵teke mai ki fakamatalaga ne lagona ne ia i te lāleo io me fakaasi mai tena fiafia ki mea ne faitau ne ia i te testimony card. E ‵tau o iloa ne tino talai mo te atamai a te auala ke manumalo ei i ‵tekemaiga mo te auala ke akoako atu ei a tino loto ‵lei i se auala apo. E seai se fakalotololua me ne fesoasoani atu te agaga tapu o te Atua ke lavea ne Nathan H, Knorr a te tāua ke fakaakoako a tino talai ke fakaaoga ne latou a te meaalofa ko te faipati i te galuega talai. Se a te ikuga? Ne kamata o fakatu aka ei a Te Akoga mō Tino Talai i fakapotopotoga i te 1943. Ne fesoasoani mai eiloa te akoga tenā ke fai tatou pelā me ne faiakoga apo.

15. (a) Ne a mea ne fakafesagai atu ki ei a nisi tino kolā ne fai olotou tofiga i Te Akoga mō Tino Talai? (e) Ne fakatalitonu pefea ne koe a te ‵tonu o te tautoga a Ieova telā ne fakamau i te Salamo 32:8?

¹⁵ Mō te tokoukega, ne manakogina ne latou a taimi e uke ke fakamasani o fai‵pati atu i mua o tino e tokouke. Ne masaua ne Julio S. Ramu a tena lāuga muamua i te akoga i te 1944. Ne faipati eiloa a ia ki te mataupu e uiga ki a Toeka, se tagata telā ne sae mai tena igoa i tusi fai‵tau e lima i te Tusi Tapu! Ne fai mai a Julio, penei: “Ne kamata o pole‵pole oku vae, oku lima penā  foki toku kauvae.” Kae ne ‵tau foki o fakaaoga ne ia a tusi fai‵tau e lima ke fakatoka ki ei tena lāuga kātoa. “Ne fai ne au taku lāuga i se tolu minute. Tenā eiloa toku tofiga muamua ne fai i te tulaga, kae ne seki ‵fiu eiloa au.” Ne ‵kau atu foki a tama‵liki ki te akoga, faitalia loa me ne faigata ki nisi o latou ke fai olotou lāuga ki te fakapotopotoga. Ne masaua ne Angelo Manera, telā ne taku atu muamua, se lāuga muamua ne fai ne se tamaliki tagata foliki telā ne fatoā fano ki te akoga. “Ona ko tena polepole i te kamataga o tena lāuga, ne tagi ei tou tagata. Kae faitalia loa tena tagi, ne mafai eiloa ne ia o fakaoti tena tofiga.” E mata, e se manako eiloa koe o fai au tali io me aofia i nisi vaega o te fakatasiga ona ko te mata mā io me mafaufau me sē mafai ne koe o fai? Ke akai atu ki a Ieova ke fesoasoani mai ke manumalo koe i te mataku. Ka fesoasoani atu eiloa a ia ki a koe e pelā eiloa mo tena fesoasoani ki tino kolā ne ‵kau ki Te Akoga mō Tino Talai i aso mua.—Faitau te Salamo 32:8.

16. Ne a pogai tāua ne fakatu aka ei a Te Akoga i Kiliata (a) i taimi ko ‵teka mo te (e) tausaga 2011?

¹⁶ A fakaakoakoga kolā e maua ne tino o Ieova e se gata fua i Te Akoga mō Tino Talai. Ko oti ne maua ne misionale mo nisi tino a mea aoga e uke mai te ‵kau atu ki Te Akoga i Kiliata. E ‵tusa mo fakamatalaga a se faiakoga e tokotasi, a te pogai tāua o te akoga ko te “faka‵goto ki loto o tino a‵koga se manakoga malosi ke aofia i te galuega talai.” Ne kamata eiloa o fakatu aka a Te Akoga i Kiliata i te tausaga e 1943, kae e silia atu mo te toko 8,500 a tino kolā ne a‵koga i ei. A misionale kolā ne a‵koga i Kiliata, ko ga‵lue atu nei i nisi fenua e 170. Talu mai te 2011, ne ‵tala atu fua te avanoaga tenā ki a latou kolā e aofia i te taviniga tumau—e pelā mo paenia fakapito, ovasia faima‵laga, tino ga‵lue i te Peteli, io me ko misionale kolā ne seki ‵kau atu ki te Akoga i Kiliata.

17. Ko pefea nei te magoi o te Akoga i Kiliata?

¹⁷ Ko pefea nei te magoi o te fakaakoakoga tenei? Mafaufau la ki se fakaakoakoga e tasi. I a Aokuso 1949, ne mu‵tana ifo i te sefulu o tino talai i Tiapani. I te fakaotiga o te tausaga tenā, e toko 13 a misionale kolā ne a‵koga i Kiliata ne olo o ga‵lue i konā. Nei la, ko silia atu i te toko 216,000 o tino talai i Tiapani, kae toeitiiti ko kātoa te 42 pasene o latou ko tavini atu e pelā me ne paenia!

18. Taku mai a nisi akoga kolā ne fesoasoani atu ki Molimau kolā e fetaui ‵lei ke ga‵solo ki mua i te feitu faka-te-agaga.

¹⁸ A nisi akoga konei e aofia i ei a Te Akoga mō Toeaina mo Tavini Fesoasoani, te Akoga mō Paenia, te Akoga mō Tino Talai o te Malo, te akoga mō Ovasia o Fenua mo olotou Avaga, mo te Akoga mō Komiti o te Ofisa Lagolago mo Olotou Avaga, ne fesoasoani malosi atu ke momea aka te malosi o te feitu faka-te-agaga o tino o Ieova. E mautinoa eiloa me koi tumau i te fakaakoako ne te Tupu a ana tino!

19. Se a te manatu gali ne fakaasi mai ne Charles Taze Russell e uiga ki te galuega talai, kae e fakamaoni pefea ne tatou te ‵tonu o te manatu tenā?

¹⁹ Ko silia atu nei mo te 100 tausaga talu mai te taimi ne kamata ei o fakatu aka a te Malo o te Atua. E tumau eiloa a te ‵tou Tupu ko Iesu Keliso i te fakaakoako o tatou. Mai mua malie eiloa o mate a Charles Taze Russell i te 1916, ne fakaasi mai ne ia se kilokiloga tāua e uiga ki te lasi o te galuega talai telā e ‵tau o fai. Ne fai atu a ia ki se taugasoa pili o ia, penei: “A te galuega ko gasolo o vave, kae ka tumau eiloa te gasolo ki mua, me e isi eiloa se galuega e ‵tau o fai i te lalolagi kātoa e uiga ki ‘te tala ‵lei o te malo.’” (Faith on the March, by A. H. Macmillan, itu. 69) Ko oko eiloa i te ‵tonu o ana pati! Kae e loto fakafetai eiloa tatou me e tumau eiloa o tuku mai ne te Atua o te Filemu a mea faigaluega ke mafai ne tatou o fai a te galuega tāua tenei! E tonu, e tuku mai ne ia a “mea ‵lei katoa” kolā e manakogina ne tatou ke fai tena loto!