‵Talo

1 Kaia?

‵TALO. E isi ne nai mataupu faka-te-Tusi Tapu kolā e maua i ei a mea ‵gali kae fakamalosi aka ei te ‵tou fia iloa. Mafaufau la ki fesili masani e fitu e uiga ki te ‵talo; ko suke‵suke fakatasi ei tatou ki tali kolā e maua i loto i te Tusi Tapu. Ne fakatoka a mataupu konei ke fesoasoani atu ki a koe ke kamata o ‵talo kae ke ma‵goi foki au ‵talo.

I TE lalolagi kātoa, e ‵talo atu eiloa a tino mai fenua mo lotu katoa. E ‵talo atu māfai e ‵nofo atu eiloa i a latou; e ‵talo atu latou i potukau. E ‵talo atu latou i lotu, i fale tapuaki, i sunako, i mosques. E mafai o fakaaoga ne latou a kapeti mō ‵talo, malele ‵talo, mea ‵talo kolā e fakaaoga ne te Lotu Puta, fakatusa, tusi ‵talo, io me ko ‵talo kolā e tusi i luga i tamā laupapa kae fakatau‵tau.

A te faiga o ‵talo se auala e tasi e ‵kese ei a tino mai nisi mea ola katoa i te lalolagi. E tonu, e tai uke eiloa a mea e ‵pau ei tatou mo manu. E pelā mo manu, e manakogina ne tatou a mea‵kai, te ea, mo vai. E fa‵nau mai tatou, e ola, kae oti ko ‵mate atu ei. (Failauga 3:19) Kae ko tino fua e mafai o ‵talo. Kaia?

Kāti te ‵toe tali faigofie ki ei me e ‵tau o ‵talo atu tatou. E sili atu i ei, e masani o fai a te ‵talo e pelā me se auala ke fesokotaki atu ei a tino ki se koga faka-te-agaga, se mea telā e ‵kilo atu latou ki ei e pelā me e tapu, io me ‵malu, kae tumau tena aoga. E fakaasi mai i te Tusi Tapu me ne faite tatou mo se manakoga ke fai penā. (Failauga 3:11) Ne fai mai a Iesu, penei: “E fia‵fia a tino kolā e iloa ne latou olotou manakoga faka-te-agaga.”​—Mataio 5:3, Tusi Paia, Samoa.

A “manakoga faka-te-agaga”​—e mafai pefea o fakamatala mai ne se tino a te pogai e faite ei a falesa ‵lasi mo mea ‵togi ‵mafa i ei, e aofia i ei a te fia o itula kolā e fakamāumāu ki te ‵talo? E fakalagolago a nisi tino ke fakama‵lie aka eiloa ne latou olotou manakoga faka-te-agaga io me e fai ne nisi tino. Kae e mata, e se mafaufau koe, me e se maua ne tino a te atamai ke fesoasoani atu? A tatou ne tino vāi‵vai, e se tumau, kae e se kilo ‵mao. Ko te tino fua telā e lasi tena poto, e malosi ‵ki, kae lasi tena kufaki i lō tatou e mafai o tuku mai ne ia a mea e ma‵nako tatou ki ei. Kae ne a la a manakoga faka-te-agaga konei kolā e fakamalosi aka ei tatou ke ‵talo atu?

Mafaufau la: E mata, ko oti ne ‵sala atu koe mō se takitakiga, te poto, io me ko tali ki fesili kolā e se oko ki ei a te iloa o tino? E mata, ko oti ne manako koe ki se fakamafanafanaga i te taimi ne logo‵mae ei koe mai te galo atu o se tino pele, io me fakafesagai atu ki se filifiliga faigata, io me manakogina te loto fakamagalo māfai ne fai ne koe se mea ‵se?

E ‵tusa mo pati a te Tusi Tapu, se mea ‵lei ke ‵talo atu koe mō mea konei. A te Tusi Tapu ko te ‵toe tusi fakatuagagina i te mataupu tenei, kae e aofia i ei a ‵talo e uke a tagata mo fafine fakamaoni e tokouke. Ne ‵talo atu latou mō se fakamafanafanaga, takitakiga, fakamagaloga, kae penā foki eiloa mo tali ki fesili faiga‵ta.​—Salamo 23:3; 71:21; Tanielu 9:4, 5, 19; Sapakuka 1:3.

E tiga eiloa te kese‵kese o ‵talo, e isi eiloa se mea e ‵pau ei latou. E ‵tau o maua ne tino kolā e ‵talo a te kī tāua ki te faiga ke iku manuia a ‵talo, se mea e tasi telā e masani o galo atu io me e fakaseaoga sāle ne te lalolagi i aso nei. Ne iloa ne latou a te tino telā e ‵tau o ‵talo atu latou ki ei.