‵Talo

5 I Fea Kae i Taimi Fea Foki?

E SEAI se fakalotolotolua me ko oti ne lavea ne koe me i te ukega o lotu e fakatāua ne latou a te olo atu ki fale ‵talo kae fai a fakatokaga ki taimi e ‵tau ei o fai a ‵talo i te aso. E mata, e fakatapula ne te Tusi Tapu a koga io me ko taimi e ‵tau o fai ei a ‵tou ‵talo?

E fakaasi mai i te Tusi Tapu me e isi ne taimi kolā e ‵tau ei o ‵talo atu tatou. E pelā me se fakaakoakoga, mai mua o ‵kai latou mo ana soko, ne fakafetai atu a Iesu ki te Atua i se ‵talo. (Luka 22:17) Kae i te taimi ne maopoopo ei ana soko mō te tapuakiga, ne ‵talo fakatasi atu latou. Ne fai ne latou se faifaiga masani telā ne fai sāle i sunako i Iutaia mo te faletapu i Ielusalema. Ne manako te Atua ke fai a te faletapu e pelā me “se fale ‵talo mō tino o fenua katoa.”​—Maleko 11:17.

I te taimi e maopoopo ei a tavini a te Atua kae ‵talo fakatasi atu, e mafai eiloa o maua ne latou a ikuga ‵lei. E fiafia eiloa a te Atua māfai e ‵kau fakatasi a te potukau i te agaga kae ko te ‵talo telā e fai ne latou e fakaata mai i ei a fakatakitakiga faka-te-Tusi Tapu. Ka fai ne te ‵talo ke gasuesue a ia o fai a te mea telā ne seki mafai ne ia o fai. (Epelu 13:18,19) E ‵talo faeloa a Molimau a Ieova i olotou fakatasiga. E ‵kami atu koe ke vau ki se Kingdom Hall telā e pili atu ki a koe kae ke fakalogo koe ki vaegā ‵talo penā.

Kae e se fakatapula ne te Tusi Tapu a ‵talo e fai i so se taimi io me i so se koga. E fai‵tau tatou i te Tusi Tapu e uiga ki tavini a te Atua kolā e ‵talo atu i taimi mo koga e uke. Ne fai mai a Iesu: “Kafai e ‵talo koe, ulu ki loto i tou potu, ‵pono te mataloa; ko fai ei tau ‵talo ki tou Tamana telā e i te koga sē lavea; ka ko tou Tamana telā e lavea ne ia koe i te koga sē lavea, e avatu foki ne ia a te taui ki a koe.”​—Mataio 6:6.

E mata, e sē se ‵kamiga fakafiafia a te mea tenā? E mafai o fakapilipili atu koe ki te Pule Sili o te lagi mo te lalolagi i so se taimi, i a koe eiloa, kae talitonu katoatoa me ka fakalogologo mai a ia. Kae e se tioa eiloa o fia nofo tokotasi faeloa a Iesu ko te mea ke mafai ne ia o ‵talo atu! I te taimi e tasi, ne ‵talo atu a ia ki te Atua i te po kātoa, o ‵sala atu ki te takitakiga e uiga ki se filifiliga tāua.​—Luka 6:12, 13.

Ne tusi ne nisi tagata mo fafine i te Tusi Tapu a ‵talo i te taimi ne fakafesagai atu ei latou ki fakaikuga ‵mafa io me ko tofotofoga fakama‵taku. E ‵talo atu latou i nisi taimi i se leo malalo io me maluga; ne ‵talo atu latou i potukau mo taimi foki e ‵nofo ei latou taki tokotasi. A te mea tāua, me ne ‵talo atu latou. E ‵kami foki ne te Atua ana tavini: “‵Talo foki i taimi katoa.” (1 Tesalonia 5:17) E toka a ia o fakalogologo ki ‵talo a latou kolā e fai tena loto. E mata, e sē se ‵kamiga alofa a te mea tenā?

E tonu, i te lalolagi kaimanako tenei, e mafau‵fau a tino e tokouke ki te tāua o te faiga o ‵talo. E mafai o fesili atu koe penei, ‘E mata, ka fesoasoani mai eiloa a te mea tenei?’

[Ata i te itulau e 9]

E mafai o ‵talo atu tatou i so se taimi i so se koga