A Ieova Ko Te ‵Tou Aliki Maluga!

“E maua toku puipuiga i te Aliki Maluga [ko Ieova].”​—SALAMO 73:28.

1. E pelā mo ana pati kolā ne tusi i te 1 Kolinito 7:31, se a te mea ne fakasino atu ki ei a Paulo?

“E MAFULIFULI a te tulaga o te lalolagi e iai nei.” Ne fai mai ne te apositolo ko Paulo a pati konā. (1 Kolinito 7:31, Tusi Paia, Samoa) E mautinoa eiloa me ne fakatusa ne ia a te lalolagi ki tino takutakua i tamunei kolā e fai pelā me ne tino ‵lei io me ne tino ma‵sei i se ata ke oko eiloa ki te fakaotiga o te vaega tenā.

2, 3. (a) Se a te mea e mafai o fakatusa ki ei a te kinauga ki te pulega sili a Ieova? (e) Ne a fesili ka sau‵tala tatou ki ei?

² I aso nei, e isi se ata tāua ‵ki ko sae mai​—kae e aofia i ei a koe! E fakasino tonu atu eiloa ki te fakamalugaga o te pulega sili a Ieova te Atua. E fakatusa a te ata tenei ki se tulaga telā e mafai o sae aka i se fenua. I te feitu e tasi, e isi eiloa se malo telā e fai ne ia a tulafono. Kae i te suā feitu, e isi se fakapotopotoga masei e pule mai e auala i uiga kai‵soa, amioga fakasaua, mo te tatino. E taua atu a te fakapotopotoga masei tenei ki te pulega sili kae tofotofo ne ia a te fakamaoni o tino katoa ki te lotou malo.

³ Ko oti foki ne sae aka se tulaga tai ‵pau penā i te lalolagi kātoa. Ne fakatu aka a te malo tonu o te “Aliki” Maluga ko Ieova. (Salamo 71:5) Kae ko fakamatakutaku nei a tino ne te fakapotopotoga masei tenei telā e takitaki ne te “tino masei.” (1 Ioane 5:19) E taua atu ki te Malo o te Atua kae tofotofo ne ia a te fakamaoni o tino katoa ki tena pulega sili. Se a te mea ne iku mai i te tulaga tenei? Kaia ne talia ei ne te Atua a te mea tenei? Se a te mea e mafai ne tatou taki tokotasi o fai?

Vaega Tāua o te Ata

4. Ne a mataupu tai ‵pau e lua kolā e aofia i te ata tenei i te lalolagi kātoa?

⁴ E aofia i te ata tenei i te lalolagi kātoa a kinauga tai ‵pau e lua: ko te pulega sili a Ieova mo te fakamaoni o tino. I loto i te Tusi Tapu, e taku faeloa a Ieova e pelā me ko te “Aliki Maluga.” Ona ko te talitonu katoatoa ki a ia, ne usu atu te faisalamo, penei: “E maua toku puipuiga i te Aliki Maluga [ko Ieova].” (Salamo 73:28) E maluga atu fakafia a te “pulega sili” i te malosi pule. E fakagalue aka ne se pulega sili a te tulaga pule. E isi ne pogai ‵lei ke ‵kilo atu ki a Ieova te Atua e pelā me ko te Atua Maluga.​—Tanielu 7:22.

5. Kaia e ‵tau ei o fakamalosi aka tatou ke ‵lago atu ki te pulega sili a Ieova?

⁵ E pelā me ko te Mafuaga, a Ieova te Atua ko te Pule Sili o te lagi mo te lalolagi. (Faitau te Fakaasiga 4:11.) A Ieova foki ko te ‵tou Famasino, ko te Tino Fai Tulafono Sili, mo te Tupu, me e fai katoa ne ia a mea kolā e fai ne matagaluega kese‵kese i se malo. (Isaia 33:22, Tusi Paia, Samoa) Ona ko te mea e ‵nofo kaitalafu tatou ki te Atua kae fakalago‵lago ki a ia, e ‵tau o ‵kilo atu tatou ki a ia e pelā me ko te ‵tou Aliki Sili. Ka fakamalosi eiloa tatou o ‵lago atu ki tena tulaga maluga māfai e masaua faeloa ne tatou me “e fakatu ne te Aliki [ko Ieova] a tena nofogaaliki i te lagi; a ia ko te tupu o mea katoa.”​—Salamo 103:19; Galuega 4:24.

6. Se a te fakamaoni?

⁶ Ke ‵lago atu ki te pulega sili a Ieova, e ‵tau o fakatumau te ‵tou fakamaoni ki a ia. A te “fakamaoni” e amio ‵lei io me katoatoa. A te tino fakamaoni e ‵ma kae fai mea tonu. Ne fai eiloa penā a Iopu.​—Iopu 1:1.

Te Auala ne Kamata ei te Ata

7, 8. Ne fakafesili aka pefea ne Satani a te ‵tonu o te pulega sili a Ieova?

⁷ I te 6,000 tupu tausaga ko ‵teka, ne fakafesili aka ei ne se tino faka-te-agaga a te ‵tonu o te pulega sili a Ieova. Ne fakamalosi aka a pati mo faifaiga a se tino ‵teke ne se manakoga kaimanako ke tapuaki atu ki a ia. Ne fakaloiloi ne ia a te  tauavaga muamua, ko Atamu mo Eva, ke se fakamaoni ki te pulega sili a te Atua kae taumafai ke fakamasiasi te igoa o Ieova mai te fai atu me ne loi a Ia. (Faitau te Kenese 3:1-5.) Ne fai a te tino ‵teke tenei e pelā me ko te Fili sili, ko Satani (Tino ‵Teke), te Tiapolo (Tino Fatufatu), te gata taumua, (tino fakaloiloi), mo te talako (se tino fekai).​—Fakaasiga 12:9.

⁸ Ne fai ne Satani a ia eiloa mo fai se pule ‵teke. Mai te fakafesagai atu ki te tofotofoga tenei, se a te mea e ‵tau o fai ne te Aliki Sili ko Ieova? E mata, e fakaseai fakavave ne ia a tino ‵teke e tokotolu konei​—ko Satani, Atamu, mo Eva? E isi eiloa sena malosi ke fai penā, kae ka tali faka‵lei aka i ei a te fesili e uiga ki te tino telā e maua ne ia a te ‵mana malosi. Kae e mafai o fakamaoni atu i ei me ne fai atu ne Ieova a te mea tonu e uiga ki te ikuga o te ofa tulafono. Kaia ne seki fai ei ne te Atua a te mea tenā?

9. Se a te mea ne fakafesili ne Satani?

⁹ Mai te loi mo te ‵fuli keatea ne ia o Atamu mo Eva mai te Atua, ne fakafesili ne Satani a te aiā o Ieova ke fai a tino katoa ke faka‵logo ki a ia. E se gata i ei, mai te fakaloiloi ne ia a te tauavaga muamua ke se faka‵logo ki te Atua, ne fakafesili foki ne Satani a te a‵lofa fakamaoni o tino katoa. E pelā mo te mea ne fakaasi mai i te tala o Iopu, telā ne fakamaoni ki te pulega sili a Ieova, ne fai atu a Satani me e mafai o ‵fuli keatea ne ia a tino mai te Atua.​—Iopu 2:1-5.

10. Mai te fakatalave o te fakaasimaiga o tena pulega sili, se a te mea ne talia ne te Atua?

¹⁰ Mai te fakatalave o fakaasi mai tena pulega sili, ne fakaavanoa ne Ieova se taimi ke fakamaoni aka ne Satani ana pati ‵toa. Ne tuku atu foki ne te Atua a te avanoaga ke fakaasi atu ne tino a te lotou a‵lofa fakamaoni ki tena pulega sili. Ne a mea ne ‵tupu i senitenali mai tua ifo? Ko oti ne fakatu aka ne Satani se fakapotopotoga malosi kae solitulafono. Ko pili o fakaseai atu ne Ieova a te fakapotopotoga tenā mo te Tiapolo, kae tuku mai i ei se fakamaoniga e uiga ki te ‵tonu o te pulega sili a te Atua. Ne mautinoa eiloa i a Ieova te Atua a te ikuga ‵lei telā ne ‵valo mai ne ia i te taimi o te ‵tekeatuga tenā i Etena.​—Kenese 3:15.

11. Ne a mea ne fai ne tino e tokouke mo te āva e uiga ki te pulega sili a Ieova?

¹¹ E tokouke a tino ne fakatuanaki kae fakatumau te lotou fakamaoni ki te pulega sili a Ieova mo te fakamalugaga o tena igoa. E aofia i tino konei ko Apelu, Enoka, Noa, Apelaamo, Sala, Mose, Luta, Tavita, Iesu, soko mua o Keliso, mo te fia miliona o tino fakamaoni i aso nei. E fakamaoni atu ne tino kolā e ‵lago atu ki te pulega sili a te Atua a te loi o Satani mo te faka‵māga o te igoa o Ieova i te fakamaseiga telā ne fai ne te Tiapolo mai te fai atu mo te fakamatamata me e mafai ne ia o ‵fuli keatea a tino katoa mai te Atua.​—Faataoto 27:11.

E Mautinoa Eiloa te Ikuga

12. E mafai pefea o mautinoa i a tatou me ka se tumau eiloa te Atua i te kufaki i amioga ma‵sei?

¹² E mafai o mautinoa i a tatou me ko pili o fakaasi mai ne Ieova tena pulega sili. Ka se tumau eiloa tena kufaki i amioga ma‵sei, kae e iloa ne tatou me ko ‵nofo ‵tatou i aso fakaoti. Ne taua atu a  Ieova ki tino ma‵sei i te aso o te Lolo. Ne fakaseai ne ia a Sotoma mo Komolo mo Falao mo tena kautau. Ne seki mafai o manumalo a Sesela mo tena kautau mo Sanelivi mo tena kautau Asulia i te lotou taua atu ki te Aliki Maluga. (Kenese 7:1, 23; 19:24, 25; Esoto 14:30, 31; Famasino 4:15, 16; 2 Tupu 19:35, 36) Tela la, e mafai o tali‵tonu tatou me ka se mafai o fa‵ki faeloa a Ieova te Atua i faifaiga sē āva ki tena igoa mo mea ma‵sei e fai ki ana Molimau. E se gata i ei, ko lavea nei ne tatou a fakamaoniga o te fakailoga o te fakatasi mai o Iesu mo te gataga o te olaga masei tenei.​—Mataio 24:3.

13. E mafai pefea o ‵sao tatou mai te fakaseaiga fakatasi mo fili o Ieova?

¹³ Ke ‵sao atu mai te fakaseaiga fakatasi mo fili o te Atua, e ‵tau mo tatou o fakamaoni ki te pulega sili a Ieova. E mafai pefea o fai ne tatou a te mea tenā? E auala i te ‵vae keatea mai te pulega masei a Satani kae ke mo a ma talia ke fakamatakutaku koe ne ana sui. (Isaia 52:11; Ioane 17:16; Galuega 5:29) Kafai e ‵vae keatea tatou mai te pulega a Satani, ka mafai o ‵lago atu tatou ki te pulega sili a te ‵tou Tamana faka-te-lagi kae fakamoemoe ke sao koe māfai ko faka‵mā a te igoa o Ieova kae fakaasi atu i ei me i a ia ko te Pule Sili i te lagi mo te lalolagi.

14. Ne a mea ne fakaasi mai i fuaiupu kese‵kese i te Tusi Tapu?

¹⁴ A fakamatalaga e uiga ki tino mo te pulega sili a Ieova e maua i te Tusi Tapu. E fakaasi mai i mataupu e tolu muamua a te faitega o mea mo te taimi ne agasala ei te tagata, a ko tusi e tolu fakaoti e faipati eiloa ki te ‵toe faka‵leiga o tino katoa. E maua i itulau ki mua a fakamatalaga e uiga ki mea kolā e fai ne te Aliki Maluga ko Ieova ke fakataunu ei tena fuafuaga mō tino, mo te lagi mo te lalolagi kātoa. E fakaasi mai i te Kenese a te auala ne oko mai ei a Satani mo amioga ma‵sei ki te lalolagi, kae e fakaasi mai i fuaiupu fakaoti o te Fakaasiga a te auala ka fakaseai atu ei a amioga ma‵sei, te Tiapolo, kae ka fai a te loto o te Atua i te lalolagi e pelā mo te faiga i te lagi. E tonu, e fakaasi mai i te Tusi Tapu a te pogai o te agasala mo te mate mo te auala ka ave keatea ei mai te lalolagi kae sui ki te fiafia mo te ola se-gata-mai mō tino fakamaoni.

15. Ne a mea e ‵tau o fai ne tatou ke maua ne tatou a mea aoga māfai ko oti atu a te ata e uiga ki te pulega sili?

¹⁵ E se leva nei kae ka ‵fuli katoatoa ei a te ata o te lalolagi tenei. Ko pili o oko mai ki te fakaotiga o te ata telā e aofia i ei te pulega sili. Ka ave keatea a te tulaga pule o Satani kae fakaseai atu, kae mautinoa eiloa me ka manumalo te Atua. Kae ke maua a mea aoga mo fakamanuiaga e uke kolā ne ‵valo mai i te Muna a te Atua, e ‵tau o ‵lago atu tatou ki te pulega sili a Ieova i te vaitaimi nei. E se ‵tau mo koe o tu atu i te kogāloto. Ke mafai ne koe o fai atu, penei: “Au ko se mataku me ‵kau fakatasi māua mo te Aliki,” e ‵tau o ‵kau atu tatou ki tena feitu.​—Salamo 118:6, 7.

E Mafai o Tumau Tatou i te Fakamaoni!

16. Kaia e mautinoa ei i a tatou me e mafai o fakatumau ne tino a te fakamaoni ki te Atua?

¹⁶ E mafai o ‵lago atu tatou ki te pulega sili a Ieova kae fakatumau te ‵tou fakamaoni, me ne tusi mai a te apositolo ko Paulo, penei: “Ko fakaosoosoga katoa kolā e masani o maua ne koutou i otou auala, se mea e masani eiloa o oko mai ki tino. Me i te Atua e tausi tena folafolaga, kae se mafai foki o talia ne ia ke fakaosoosogina koutou ke sili atu i te otou malosi o ‵teke te fakaosoosoga; kae i te taimi e fakaosoosogina ei koutou, ka tuku atu ne ia a te malosi e kufaki ei ne koutou, kae fai foki ne ia se ala e ‵sao ei koutou.” (1 Kolinito 10:13) Se a te fakavae o te fakaosoosoga telā ne fakaasi mai ne Paulo, kae e faka‵sao pefea tatou ne te Atua mai i ei?

17-19. (a) Se a te fakaosoosoga ne fakafesagai atu ki ei a te kau Isalaelu i te koga lavaki? (e) Kaia e mafai ei o fakatumau ne tatou a te ‵tou fakamaoni ki a Ieova?

¹⁷ E pelā mo te mea ne fakaata mai i mea ne fai ne te kau Isalaelu i te koga lavaki, e māfua mai te “fakaosoosoga” mai fakanofonofoga kolā e mafai o fakamalosi aka ei tatou ke ofa a tulafono a te Atua. (Faitau te 1 Kolinito 10:6-10.) Ne mafai o ‵teke atu ne te kau Isalaelu a te fakaosoosoga, kae ne fai ne latou a “mea ma‵sei” i te taimi ne tuku fakavavega atu ei ne Ieova a manu eva mō latou i te masina e tasi. E tiga eiloa ne seki ‵kai a tino ki ‵kano o manu mō se vaitaimi, ne tuku atu eiloa ne te Atua a manai e uke mo olotou ‵kai. Kae ne takavale latou i te tofotofoga me ne kaima‵nako latou i te taimi ne fakamaopoopo mai ei a manu eva.​—Numela 11:19, 20, 31-35.

¹⁸ Mai mua atu i ei, i te taimi telā ne tuku atu ei  ki a Mose a te Tulafono i te Mauga o Sinai, ne fai a tino Isalaelu e pelā me ne tino e ifo ki tupua, me ne aofia latou i te tapuakiga ki te pulumakau mo fakafiafiaga faka-te-lalolagi. A te galo atu o te lotou takitaki matea ki mata ne fai ei ke se iloilo aka faka‵lei a te tofotofoga ne fe‵paki mo latou. (Esoto 32:1, 6) A koi tuai o ulu atu ki loto i te Fenua o te Folafolaga, e lau i afe o tino Isalaelu ne fakakolekole ne fafine Moapi, kolā ne fai ne latou a faifaiga fakatauavaga sē ‵tau. I te taimi foki eiloa tenā, e lau i afe o tino Isalaelu ne ‵mate atu ona ko olotou agasala. (Numela 25:1, 9) I nisi taimi, ne tosina atu a tino Isalaelu ki te fakaosoosoga ke ‵teke kae mui‵mui, telā ne fai‵pati ‵teke atu ki a Mose e penā foki mo te Atua i te taimi e tasi! (Numela 21:5) Ne mui‵mui foki a tino Isalaelu mai tua o te tamatega o tino ma‵sei ko Kola, Tatano, Apilamo, mo olotou taugasoa, mai te fai atu me se mea sē tonu ke tamate a tino ‵teke konei. E pelā me ko te ikuga, ne fakaseai atu a te toko 14,700 tino Isalaelu mai i se mala telā ne fakaoko atu ne te Atua.​—Numela 16:41, 49.

¹⁹ E seai eiloa se mea e tasi mai tofotofoga kolā ne fakamatala atu ne seki mafai o ‵teke atu ki ei a tino Isalaelu. Ne faigofie o tofotofogina a tino ona ko te galo atu o te lotou fakatuanaki kae ko fakapuli foki ne latou a Ieova, tena alofa atafai mō latou, mo te amio‵tonu o ana auala. E pelā mo te mea ne tupu ki tino Isalaelu, e fakafesagai atu tatou ki fakaosoosoga masani. Kafai e taumafai malosi tatou ke ‵teke atu kae fakalagolago ki te Atua, e mafai eiloa o fakatumau ne tatou te ‵tou fakamaoni. E mafai o tali‵tonu tatou ki te mea tenei me ‘i te Atua e fakamaoni’ kae e se talia ne ia ke “fakaosoosogina [tatou] ke sili atu i te [‵tou] malosi o ‵teke te fakaosoosoga.” E se tiaki lele eiloa tatou ne Ieova ke oko atu ki tulaga kolā ko se mafai eiloa o fai ne tatou tena loto.​—Salamo 94:14.

20, 21. Kafai ko fakaosoosogina tatou, e fakatoka pefea ne te Atua a te “ala e ‵sao” ei tatou?

²⁰ E fakatoka ne Ieova se “ala e ‵sao” ei tatou mai te fakamalosi ne ia tatou ke ‵teke atu ki tofotofoga. E pelā me se fakaakoakoga, e taumafai a tino o fakasaua tatou i te feitu faka-te-foitino ko te mea ke galo atu te ‵tou fakatuanaki. E mafai o tofotofo tatou ne vaegā faifaiga penā ke gutugutulua tatou ko te mea fua ke ‵sao tatou mai fakasauaga, io me ko te mate. Kae mai i pati fakaosofia a Paulo kolā ne fakamau i te 1 Kolinito 10:13, e iloa ne tatou me e se tumau a tofotofoga. Ka se talia ne Ieova ke oko atu tatou ki te tulaga telā ko se mafai ei o tumau te ‵tou fakamaoni ki a ia. E mafai o fakamalosi aka ne te Atua a te ‵tou fakatuanaki kae tuku mai ki a tatou a te malosi faka-te-agaga e manakogina ko te mea ke fakatumau ei te ‵tou fakamaoni.

²¹ E fesoasoani mai a Ieova ki a tatou e auala i tena agaga tapu. E fakamasaua mai ne te agaga tenā a manatu faka-te-Tusi Tapu kolā e manakogina ne tatou, ko te mea ke ‵teke atu ki fakaosoosoga. (Ioane 14:26) Tela la, e se takitaki tatou ki te auala ‵se. E pelā me se fakaakoakoga, e malamalama tatou i te sokoga o te kinauga e uiga ki te pulega sili a Ieova mo te fakamaoni o tino. Ona ko te malamalama i te mea tenā, ko oti ne fesoasoani atu a te Atua ki tino e tokouke ke tumau i te fakamaoni ke oko ki te mate. Kae e se fai a te mate mo fai se ala e ‵sao ei latou; ko te fesoasoani o Ieova telā e fai ei ke mafai ne latou o kufaki ke oko ki te gataga e aunoa mo te takavale i fakaosoosoga. E mafai o fai ne ia a te mea tenā mō tatou. A te ‵tonuga loa, e fakaaoga foki ne ia ana agelu fakamaoni e pelā me ne tavini kolā e “fesoasoani ki a latou kolā ka maua ne latou a te fakaolataga.” (Epelu 1:14) E pelā mo te mea e fakaasi mai i te suā mataupu, ko tino fakamaoni fua e mafai o fakamoe‵moe ke maua ne latou a te tauliaga gali ke ‵lago atu ki te pulega sili a te Atua ki te se-gata-mai. E mafai o aofia tatou i a latou māfai e ‵piki ‵mau tatou ki a Ieova e pelā me ko te ‵tou Aliki Sili.

Ka Tali Mai Pefea ne Koe?

• Kaia e ‵tau ei o ‵kilo atu tatou ki a Ieova e pelā me ko te ‵tou Aliki Maluga?

• Se a te mea e fakauiga ki ei a te fakatumau o te ‵tou fakamaoni ki te Atua?

• E iloa pefea ne tatou me ko pili o fakaoko mai ne Ieova tena pulega sili?

• E ‵tusa mo pati i te 1 Kolinito 10:13, kaia e ‵tau ei o fakatumau ne tatou a te ‵tou fakamaoni?

[Fesili mo te Sukesukega]

[Ata i te itulau e 26]

Ke fakaiku aka ke ‵lago atu koe ki te pulega sili a Ieova