E ‵Tau O Sa‵sale Tatou I Te Fakamaoni!

“Ka ko au, e sasale faeloa au i te fakamaoni.”​—SALAMO 26:11, Tusi Paia, Samoa.

1, 2. Ne a pati a Iopu ne fai e uiga ki tena fakamaoni, kae se a te mea ne fakaasi mai e uiga ki a ia i te Iopu mataupu e 31?

I ASO mua, e fua faeloa a mea ki se fua. E masani o aofia i ei se laupapa, telā e faka‵mau i te kogāloto. E fakatautau a pōla i feitu e lua. Ko tuku atu ei a te mea telā e fua ki te feitu e tasi kae ko te fua i i te suā feitu. E ‵tau eiloa o fakaaoga ne tino o te Atua a fua ‵tonu.​—Faataoto 11:1.

² I te taimi ne puapuagatia ei a te tagata amioatua ko Iopu mai lalo i osomaiga fakasatani, ne fai mai a ia: “Te Atua ke fua ne ia au i fua mea ‵mafa kolā e ‵tonu katoatoa, kae ka iloa ne ia i au e se ‵se.” (Iopu 31:6) I te feitu tenā, ne fakaasi mai ne Iopu a tulaga kese‵kese kolā e mafai o tofotofogina ei a tino fakamaoni. Kae ne iku manuia eiloa a Iopu i te tofotofoga, e pelā mo ana pati kolā ne fakamau i te Iopu mataupu e 31. E fai tena fakaakoakoga ‵lei ke gasue‵sue tatou i se auala tai ‵pau kae fai atu mo te loto tali‵tonu, e pelā mo pati a te faisalamo ko Tavita: “Ka ko au, e sasale faeloa au i te fakamaoni.”​—Salamo 26:11, Tusi Paia, Samoa.

3. Kaia e tāua ei ke fakamaoni ki te Atua i fakalavelave ‵lasi io me fo‵liki?

³ E tiga eiloa ne tofotofogina malosi a Iopu, ne tumau eiloa tena fakamaoni ki te Atua. E fai mai a nisi tino me e fai a Iopu e pelā me se fakaakoakoga ‵lei o te fakamaoni i te taimi ne tofotofogina ei a ia. E se logo‵mae tatou e pelā mo Iopu. Kae e ‵tau o fakamaoni tatou ki te Atua i fakalavelave ‵lasi io me fo‵liki ko te mea ke mafai o fakamalosi aka ei a ‵tou tulaga e pelā me ne tino fakamaoni kae ‵lago atu ki tena pulega sili.​—Faitau te Luka 16:10.

Te Tāua o te Fakamaoni i Mea Tau Amioga

4, 5. E pelā me se tino fakamaoni, se a te uiga telā ne ‵kalo keatea a Iopu mai i ei?

⁴ Ke fakatumau a te ‵tou fakamaoni ki a Ieova, e ‵tau o ‵piki ‵mau tatou ki ana tulaga i mea tau amioga, e pelā mo Iopu. Ne folafola mai a ia: “Ko oti ne fai ne au se tautoga ‵malu, ke mo a e kilo oku mata ki se fafine mo toku loto lailai. Kafai au ne manako ki te avaga a toku tuakoi, kae ne ‵muni au o fakatalitali ki ei i tua o tena mataloa, ko tuku atu la ei taku avaga ke ‵tunu ne ia a meakai a te suā tagata kae ke moe i te moega o te suā tagata.”​—Iopu 31:1, 9, 10.

⁵ Mai te fakaikuga ke tumau i te fakamaoni ki te Atua, ne kalo kea‵tea a Iopu mai te kilo atu ki se fafine ke oko eiloa ki te taimi ko isi ei ne ana manakoga mō te fafine tenā. E pelā me se tagata avaga, ne seki fia‵fai a ia mo se fafine nofo taka io me manako ki faifaiga fakafamau mo te avaga a te suā tagata. I te Lauga i luga i te mauga, ne fai ne Iesu se fakamatalaga ‵mafa e uiga ki faifaiga fakatauavaga sē ‵tau​—se manatu tāua e ‵tau o masaua ne tino fakamaoni.​—Faitau te Mataio 5:27, 28.

Ke mo a ma Filifili a Auala Ma‵sei

6, 7. (a) E pelā mo te mea ne tupu ki a Iopu, se a te mea e fakaaoga ne te Atua ke fua ki ei te ‵tou fakamaoni? (e) Kaia e se ‵tau ei mo tatou o amio ma‵sei io me amio fakaloiloi?

⁶ E se mafai ne tatou o filifili a auala ma‵sei māfai e ma‵nako tatou ke aofia i tino fakamaoni. (Faitau te Faataoto 3:31-33.) Ne fai mai a Iopu: “Au e tauto me ne seki fai eiloa ne au ne amioga ma‵sei, kae seki fakaloiloi foki eiloa ne au a nisi tino. Te Atua ke fua ne ia au i fua mea ‵mafa kolā e ‵tonu katoatoa, kae ka iloa ne ia i au e se ‵se.” (Iopu 31:5, 6) E fua ne Ieova a tino katoa ki “fua mea ‵mafa kolā e ‵tonu katoatoa.” E pelā mo te mea ne tupu ki a Iopu, e fakaaoga ne Ieova te tulaga ‵lei katoatoa o tena fai mea tonu ke fua aka ei ‵tou fakamaoni e pelā me ne ana tavini tukugina atu.

⁷ Kafai e ma‵sei tatou, e se mafai eiloa o tumau  a te ‵tou fakamaoni ki te Atua. Ko oti ne tuku kea‵tea ne tino fakamaoni a “amioga ‵funa mo amioga fakalumaluma” kae ‵teke atu ki te “amio takolekole.” (2 Kolinito 4:1, 2) Kae e a māfai e matagā ‵tou pati io me ko faifaiga, telā e fai ei ke akai atu se tino talitonu ki te Atua mō se fesoasoani? Ka se ‵lei eiloa a te ikuga e maua ne tatou! Ne usu mai te faisalamo: “Au ne kalaga ki te Aliki [ko Ieova] i taimi ne puapuagatia ei au, ne tali mai a ia ki a au. Te Aliki, fakasao mai au i tino gutu ‵loi kae gutu takolekole!” (Salamo 120:1, 2) Se mea ‵lei ke masaua me e ‵poko te kilo a te Atua, kae ‘fakamasino ne ia a loto mo manakoga’ ko te mea ke fakaiku aka me i a tatou ne tino fakamaoni ‵tonu io me ikai.​—Salamo 7:8, 9.

Ke Fai Pelā me se Fakaakoakoga ‵Lei i Au Faifaiga ki Nisi Tino

8. E pefea a faifaiga a Iopu ki nisi tino?

⁸ Ke fakatumau te ‵tou fakamaoni, e ‵tau o fai tatou e pelā mo Iopu, telā ne fai mea tonu, loto maulalo, kae amanaia ki nisi tino. Ne fai mai a ia: “Kafai se tavini a aku e tagi mai ki a au, me e isi se mea e se malie ei, au e fakalogologo eiloa ki tena tagi, kae e fai eiloa ne au ki ei a te mea tonu. Kafai ne seki fai ne au, e mafai la pefea ne au o fakafesagai te Atua? Ne a aku pati ka fai manafai ko vau te Atua o fakamasino au? A te Atua ne faite ne ia a au, ko te Atua foki tenā ne faite ne ia taku tavini.”​—Iopu 31:13-15.

9. Ne a uiga ne fakaasi atu ne Iopu i ana faifaiga ki ana tavini, kae e ‵tau o pefea tatou i te feitu tenei?

⁹ A te ‵tonuga loa, e seai eiloa se mea faigata mō te faiga o te fakamasinoga i aso o Iopu. Ne fai te fakamasinoga tenā i se auala tonu, kae ne fakaavanoa foki a fono fakamasino ki pologa. A Iopu ne fai mea tonu kae alofa fakamagalo i ana faifaiga ki ana tavini. Kafai e sa‵sale tatou i te fakamaoni, e ‵tau o fakaasi atu ne tatou a vaegā uiga penā, maise loa māfai e tavini atu tatou e pelā me ne toeaina i te fakapotopotoga Kelisiano.

Ke Kaimalie, Kae sa Matakanokano

10, 11. (a) E iloa pefea ne tatou i a Iopu se tino kaimalie kae fesoasoani? (e) Se a te polopolokiga fakamuli i te Tusi Tapu telā e fakamasaua mai ne te Iopu 31:16-25?

¹⁰ A Iopu ne kaimalie kae lasi tena fesoasoani, kae e se kaimanako kae matakanokano. Ne fai mai a ia: “E seki tuku tiaki foki eiloa ne au a fafine ko ‵mate olotou avaga ke ‵nofo puapuaga; e seki tiakina foki eiloa ne au a tama‵liki ko ‵mate olotou mātua ke olo mo te fia‵kai i te taimi e kai ei au. . . . Kafai ne maua ne au se tino mativa telā ko se maua eiloa ne ia o ‵togi ne gatu mō ia, . . . Kafai ne fakaloiloi ne au se tamaliki ko seai ne ana mātua, me e iloa ne au i au e mafai o manumalo i te fono tulafono, ko ‵tau la ei o fatifati aka oku lima, kae ke to keatea foki mai i oku tuauma.” Kae ne seki mafai o tumau a Iopu i te fakamaoni moi ne fai atu a ia ki aulo: “Au e talitonu ki te aoga o koloa.”​—Iopu 31:16-25.

¹¹ E mafai o fakamasaua mai ne tugapati konei a pati a te apositolo ko Iakopo: “Tenei te mea e taku ko te lotu mo te ‵lei i mua o te Atua te Tamana: ko te tausi koutou ki tama‵liki ko ‵mate olotou mātua, mo fafine ko ‵mate olotou avaga i olotou puapuaga, ke mo a foki ma pisia se tino i amioga sē ‵lei faka te lalolagi.” (Iakopo 1:27) E mafai foki o masaua ne tatou a pati a Iesu: “Ke matapula‵pula koutou, kae fakaeteete i te matakanokano, me i te olaga tonu o te tino e se fakavae i luga i te uke o ana mea!” Kae ne fai atu ne Iesu se fakatusa e uiga ki se tagata maumea telā ne mate e pelā me se tino telā “e se maukoloa . . . i mua o te Atua.” (Luka 12:15-21) Ke fai e pelā me ne tino fakamaoni, e se ‵tau o tosina atu tatou ki te matakanokano io me ko te kaimanako. A te matakanokano ko te ifo ki tupua me i te tino kaimanako e ‵fuli keatea mai i a Ieova kae fai pelā me se tino telā e ifo ki tupua. (Kolose 3:5) E se palu fakatasi a te fakamaoni mo te kaimanako!

Taofi ‵Mau ki te Tapuakiga Tonu

12, 13. Se a te fakaakoakoga ne tuku mai ne Iopu e uiga ki te ‵kalo keatea mai te ifo ki tupua?

¹² E se ‵fuli keatea a tino fakamaoni mai te tapuakiga ‵ma. E seki fai eiloa penā a Iopu, me ne folafola mai a ia: “E seki tapuaki foki eiloa au ki te la ona ko tena mainaga io me ko te masina ona ko tena gali. E seki mafuli eiloa au o fakaaloalo ki ei, o sogi oku lima o fakaasi toku fakaaloalo ki ei. A te vaegā agasala penā e ‵tau o fakasala ki te mate; e fakaseaoga ne ia te Atua Malosi.”​—Iopu 31:26-28.

¹³ Ne seki tapuaki atu a Iopu ki mea ‵mate. Moi  ne fai ne tuku atu tena loto ki mea i te lagi, e pelā mo te masina, io me ‘sogi atu a ia ki ana lima,’ i se auala telā e ifo ki tupua, penei ko fai a ia mo tino e ifo ki tupua telā e ‵teke atu ki te Atua. (Teutelonome 4:15, 19) Ke fakatumau te ‵tou fakamaoni ki te Atua, e ‵tau o ‵kalo keatea tatou mai te ifo ki tupua.​—Faitau te 1 Ioane 5:21.

Ke mo a ma Amio Masei io me Amio Fakaloiloi

14. Kaia e mafai o fai atu tatou me i a Iopu e se amio masei?

¹⁴ A Iopu e se amio masei io me amio fakasaua. Ne iloa ne ia me i te fakaasi atu o vaegā uiga penā ko tena sē fakamaoni tenā, me ne fai mai a ia: “E seki ai eiloa se taimi kai fiafia ei au manafai e puapuaga oku fili, io me katakata manafai ko maua latou ne fakalavelave; e seki agasala eiloa au i te agasala ko te ‵talo ke ‵mate oku fili.”​—Iopu 31:29, 30.

15. Kaia e masei ei ke katakata māfai ko puapuaga se tino telā e takalialia ki a tatou?

¹⁵ Ne seki mafai o fiafia a Iopu moi ne fai e oko atu a puapuaga ki se tino telā e takalialia ki a ia. E fai mai te faataoto fakamuli, penei: “Sa fiafia manafai ko puapuaga tou fili, sa fiafia foki manafai ko pakū. E iloa eiloa ne te Aliki manafai koe e fakatauemu, ka se fiafia a ia ki te mea tenā, kae mafai faeloa o se fakasala ne ia a te tagata tenā e fai fili mo koe.” (Faataoto 24:17, 18) Ona ko te mea e mafai o iloa ne Ieova a mea i te loto, e iloa ne ia māfai e katakata koe ki se tino telā e puapuaga kae mautinoa eiloa me e se talia ne ia se vaegā uiga penā. (Faataoto 17:5) E mafai o saga mai te Atua ki a tatou, me e fai mai a ia: “A te Aliki ka taui ne ia te lotou mea ne fai, o fakasala latou.”​—Teutelonome 32:35.

16. E tiga eiloa e ma‵tiva tatou, e mafai pefea o fakaasi atu ne tatou a te uiga talimālō?

¹⁶ Ne uiga talimālō eiloa a Iopu. (Iopu 31:31, 32) E tiga eiloa e ma‵tiva tatou, e mafai o ‘fakaasi atu ne tatou te alofa kaimalie’ io me ko te uiga talimālō. (Loma 12:13) E mafai o ‵kai fakatasi tatou mo nisi tino, kae ke masaua me “e sili atu te ‵lei manafai e kai laulakau koe fakatasi mo tino kolā e alofa koe ki ei, i lo te kai meafasi ‵gali i te koga e seai se fiafia i ei.” (Faataoto 15:17) A te ‵kai fakatasi mo se taina fakamaoni i se koga gali ka fai eiloa ke gali te ‵kaiga tenā kae mautinoa eiloa me ka aoga ki a tatou i te feitu faka-te-agaga.

17. Kaia e se ‵tau ei o ‵funa ne tatou a agasala matagā?

¹⁷ E ‵tau o fai a te mea tenei e pelā me se fakamalosiga faka-te-agaga ke fia‵fia ki te uiga talimālō o Iopu, me ne seki loi a ia. Ne seki fai a ia e pelā mo tino sē amioatua kolā ne ulu lēmū atu ki loto i te fakapotopotoga i te senitenali muamua kae ne “tavae fakaloiloi foki ne latou a nisi tino ko te mea ke maua mai ei ne olotou mea.” (Iuta 3, 4, 16) Ne seki ‵funa ne Iopu ana mea ‵se io me ‘‵funa ana agasala,’ i te mea ma iloa ne nisi tino. Ne lotomalie ke sukesuke a ia ne te Atua, te tino telā e ‵tau o fakaasi atu ki ei so se mea ‵se ne fai ne ia. (Iopu 31:33-37) Kafai e agasala tatou, ke mo a ma ‵funa ne tatou a te mea ‵se tenā ke puipui ei ‵tou tulaga. E mafai pefea o fakaasi atu me e taumafai tatou ke fakatumau te ‵tou fakamaoni? Mai te fakaasi atu o ‵tou mea ‵se, sala‵mo, ‵sala atu ki se fesoasoani faka-te-agaga, kae fai a mea katoa kolā e mafai o fai ei ke ‵fuli tatou.​—Faataoto 28:13; Iakopo 5:13-15.

Ne Manako se Tino Fakamaoni ke Tu Atu a Ia i Mua o te Fono

18, 19. (a) Kaia e mafai o fai atu me ne seki fakaaoga ‵se eiloa ne Iopu so se tino? (e) Se a te mea ne lotomalie a Iopu ke fai māfai ne ‵se a ia?

¹⁸ A Iopu ne fakamaoni kae sē fapito. Tela la, ne mafai o fai mai a ia, penei: “Kafai ne kaisoa ne au a te laukele tenei e ‵toki ne au io me ne puke ne au mai i tino kolā e o latou tonu te laukele; kafai ne kai ne au a fuaga o lakau e ola i konā kae tuku a tino ‵toki lakau kolā ne ‵toki ne latou ke fia‵kai, ko ‵tau la ei ke ola fua i konā a mouku mo lakau  makai‵kai, kae ke se ola i ei ne saito mo kalite.” (Iopu 31:38-40) Ne seki puke ne Iopu a manafa o nisi tino, kae ne seki fakaaoga ‵se ne ia a tino ga‵lue. E pelā mo ia, e ‵tau o fakatumau ne tatou a te ‵tou fakamaoni ki a Ieova i mea ‵lasi mo mea fo‵liki.

¹⁹ A koi tuai o olo atu ana taugasoa tokotolu e pelā foki mo te tamataene ko Eliu, ne faipati eiloa a Iopu e uiga ki te auala ne ola ei a ia. Ne ‵kami atu ne Iopu so se tino telā e isi sena tagi e uiga ki a ia, ke na avatu tena tagi ki te fono. Kafai ne fakamaoni aka i ei me i a Iopu e ‵se, penei ko lotomalie eiloa a ia ke logo‵mae i te fakasalaga. Tela la, ne tuku atu ne ia a fakamatalaga kae fakatalitali ki te fakamasinoga a te Atua. Kae ne “gata i konā muna a Iopu.”​—Iopu 31:35, 40.

E Mafai o Tumau Koe i te Fakamaoni

20, 21. (a) Kaia ne mafai ei o fakatumau ne Iopu tena fakamaoni? (e) E mafai pefea o ati aka ne tatou a te alofa ki te Atua?

²⁰ Ne mafai o fakatumau ne Iopu a tena fakamaoni me ne alofa a ia ki te Atua, kae ko Ieova ne alofa kae fesoasoani atu foki ki a ia. Ne fai mai a Iopu: “Ne aumai ne koe ki a au te ola, ne tumau foki tou alofa ki a au, ko tau tausiga tenei e fakatumau ei toku ola.” (Iopu 10:12) E se gata i ei, ne fakaasi atu ne Iopu te alofa ki nisi tino, me e iloa ne ia me i so se tino telā e taofi ne ia te alofa fakamaoni mai tino ka tiakina ne latou te mataku ‵tau ki te Atua Malosi katoatoa. (Iopu 6:14) A tino fakamaoni e a‵lofa ki te Atua mo tuakoi.​—Mataio 22:37-40.

²¹ E mafai o ati aka ne tatou a te alofa ki te Atua mai te fai‵tau ki tena Muna i aso katoa kae mafaufau ‵loto ki mea e fakaasi mai e uiga ki a ia. I se ‵talo e fai mo te loto kātoa, e mafai o ‵viki atu tatou ki a Ieova kae fakafetai ki a ia mō tena aga‵lei ki a tatou. (Filipi 4:6, 7) E mafai o usu atu tatou ki a Ieova kae maua ne tatou a mea aoga mai te ‵kau fakatasi faeloa mo ana tino. (Epelu 10:23-25) Tela la, a te ‵tou a‵lofa ki te Atua ka gasolo aka o lasi i te taimi e ‵kau atu ei tatou ki te galuega talai kae folafola atu “te tala ‵lei i te Aliki ne fakasao ne ia tatou.” (Salamo 96:1-3) I auala penā, e mafai o fakatumau te ‵tou fakamaoni e pelā mo te faisalamo telā ne usu mai, penei: “Kae ki a au, se mea tafasili i te gali te pili ki te Atua.”​—Salamo 73:28.

22, 23. E pelā me ne tino kolā e ‵lago atu ki te pulega sili a Ieova, e mafai pefea o fakatusa ne tatou a ‵tou galuega ki tino fakamaoni i aso mua?

²² I te fia o senitenali ko ‵teka, ne tuku atu ne Ieova ki ana tino fakamaoni a galuega kese‵kese e uke. Ne faite ne Noa se vaka kae ne “folafola atu ne ia te amiotonu.” (2 Petelu 2:5) Ne takitaki atu ne Iosua a te kau Isalaelu ki te Fenua o te Folafolaga, kae ne manumalo fua a ia ona ko te mea ne faitau a ia ki “te tusi o te Tulafono . . . i ao mo po” kae tautali faka‵lei atu ki ei. (Iosua 1:7, 8) Ne fai ne Kelisiano i te senitenali muamua a soko kae ‵kau fakatasi i aso katoa ke suke‵suke ki te Tusi Tapu.​—Mataio 28:19, 20.

²³ E ‵lago atu tatou ki te pulega sili a Ieova kae fakatumau te ‵tou fakamaoni mai te talai atu o te amiotonu, te faiga o soko, fakagalue aka a fakatakitakiga i te Tusi Tapu, kae maopoopo mo taina tali‵tonu i fakatasiga, fono i fenua, mo fono i atufenua. E fesoasoani mai ki a tatou a fakatasiga penā ke loto ‵toa, ke ma‵losi i te feitu faka-te-agaga, kae ke manuia foki tatou i te faiga o te loto o te Atua. E se faigata te mea tenei ki a tatou me e ‵lago mai eiloa te ‵tou Tamana faka-te-lagi mo tena Tama. (Teutelonome 30:11-14; 1 Tupu 8:57) E se gata i ei, e ‵lago mai foki ki a tatou a ‵tou “taina tali‵tonu,” kolā e sa‵sale foki i te fakamaoni kae faka‵malu atu ki a Ieova e pelā me ko te lotou Aliki Maluga.​—1 Petelu 2:17.

Ka Tali Mai Pefea Koe?

• E ‵tau o pefea ‵tou kilokiloga ki te tulaga o Ieova i mea tau amioga?

• Ne a uiga o Iopu kolā e ‵gali ki a koe?

• E pelā mo te mea e fakaasi mai i te Iopu 31:29-37, ne pefea a amioga a Iopu?

• Kaia e mafai ei o fakatumau ne tatou a te ‵tou fakamaoni ki te Atua?

[Fesili mo te Sukesukega]

[Ata i te itulau e 32]

E mafai o fakatumau te ‵tou fakamaoni!