6. Te Galuega Talai i te Lalolagi Kātoa
6. Te Galuega Talai i te Lalolagi Kātoa
“A te Tala ‵Lei tenei e uiga ki te Malo, e fakamatala atu ki te lalolagi katoa, mo fai te molimau ki tino katoa; ko oko mai ei te gataga.”—MATAIO 24:14.
● E nofo atu a Vaiatea i se motu e tasi o Tuamotu. E tiga eiloa e nofo ki se 80 motu o Tuamotu kolā e aofia i se koga telā e 802,900 kilomita, e nofo fua ki te 16,000 a tino e ‵nofo i ei. Kae e masani sāle o āsi atu a Molimau a Ieova ki a Vaiatea mo ana tuakoi. Kaia? Me e ma‵nako a Molimau ke talai atu te tala ‵lei o te Malo o te Atua ki tino katoa—faitalia te koga e ‵nofo ei latou.
SE A TE MEA E FAKAASI MAI I MANATU ‵TONU KONEI? A te fekau o te Malo ko oko atu ki koga katoa o te lalolagi. I te 2010, ne fakamāumāu ne Molimau a Ieova a itula e sili atu i te 1.6 piliona ke folafola atu ei te tala ‵lei tenei ki fenua e 236. Kāti e nofo a te aofaki masani ki se 30 minute i te galuega talai i aso takitasi a Molimau a Ieova. I tausaga e sefulu ko ‵teka atu nei, ne fakatoka kae tufatufa atu ne latou a tusi faka-te-Tusi Tapu e sili atu mo te 20 piliona.
SE A TE MANATU MASANI? Ko oti ne folafola atu a te fekau faka-te-Tusi Tapu tenei mō se fia afe o tausaga.
E MATA, KOI AOGA EILOA TE MANATU TENĀ? E tonu, ko oti ne folafola atu ne tino e tokouke se fekau mai te Tusi Tapu. Kae ne fai fua ne nisi tino mō se taimi toetoe i se koga foliki. E ‵kese mai ei, e fakataunu kae fakatoka ne Molimau a Ieova, a te galuega talai i te lalolagi kātoa telā e mafai o oko atu ki te fia selau miliona o tino. Ne kufaki eiloa a Molimau i te faiga o te lotou galuega talai faitalia a ‵tekemaiga faiga‵ta mai nisi fakapotopotoga ma‵losi kae ma‵sei i tala fakasolopito o tino. * (Maleko 13:13) E se gata i ei, e se ‵togi a Molimau a Ieova ke fai te galuega talai. Kae e volenitia olotou taimi, kae tufatufa atu a olotou tusi e aunoa mo se ‵togi. E maua ne latou a meaalofa kolā e ‵lago atu ki te faiga o te lotou galuega talai.
NE A OU MAFAUFAUGA? E mata, ko oti ne talai atu ki te lalolagi kātoa a te “tala ‵lei e uiga ki te Malo”? E mata, e mafai o fakauiga a te fakataunuga o te valoaga tenei me e isi se mea gali ka tupu i aso mai mua?
[Fakamatalaga fakaopoopo]
^ pala. 6 Ke maua a fakamatalaga e uke, ke onoono ki ata vitio e tolu konei “Faithful Under Trials,” “Purple Triangles,” mo te “Jehovah’s Witnesses Stand Firm Against Nazi Assault” kolā ne tufatufa ne Molimau a Ieova.
[Manatu Tāua i te itulau e 9]
“Kafai e talia ne Ieova, ka tumau eiloa tatou i te talai atu te tala ‵lei o te Malo mo te loto finafinau, ka tumau eiloa i te talai atu o te galuega talai mo te loto finafinau mai te fakaaogaga o so se auala ke oko atu ki tino katoa.”—2010 YEARBOOK OF JEHOVAH’S WITNESSES.