0102_W11.DI1
“I taku faka‵tau a te mea tenei se fakasalaga mai te Atua, e tiga eiloa e alofa au i a latou kolā ne pokotia i ei,” ko pati a se tagata politiki i Tiapani i te otiga ne poko a te fenua ko Tiapani ne se mafuie telā e 9.0 tena malosi mo te tsunami i a Mati 2011.
I te taimi ne ‵mate ei a tino e silia atu i te toko 220,000 i te mafuie telā ne poko i Haiti i a Ianuali 2010, ne fai mai se tagata lauiloa i mea fakalotu i televise me ne fai penā ona ko te lotou “feagaiga mo te tiapolo” kae ne manakogina ke “fuli atu latou ki te Atua.”
“E manako te Atua ke ‵fagu aka ‵tou loto lagona kolā ko ‵mate,” ko pati a se faifeau Katolika i te taimi ne ‵mate ei a te toko 79 o tino i se faigāmea ne fai i Manila, Filipaina. Ne lipoti mai se nusipepa i konā me “luasefulu-tasi pasene o tino ma‵tua e tali‵tonu me ko ‵tala mai te kaitaua o te Atua e auala i laukele ma‵toli, matagi ma‵losi mo nisi fakalavelave ‵tupu fakafuasei” kolā e fakapuapuagatia faeloa i ei te atufenua.
ATE talitonuga me aumai ne te Atua a fakalavelave ‵tupu fakafuasei ke fakasala ei a tino ma‵sei e sē se mea fou. I te 1755, i te otiga ne ‵mate atu a te toko 60,000 tino i se mafuie, se afi, mo se tsunami telā ne poko i Lisbon, Portugal, ne fesili ifo ei penei te tagata poto lauiloa ko Voltaire: “E mata, e uke atu amioga ma‵sei e maua i Lisbon i lō Paris telā e ‵fonu i fakafiafiaga sonafai valevale?” E tonu, ko oti ne mafau‵fau te fia miliona o tino me ka fakaaoga ne te Atua a fakalavelave ‵tupu fakafuasei o te natula ke fakasala aka ei a tino. E taku a vaegā fakalavelave penā me ko galuega a te Atua i atufenua e uke.
Ona ko mea katoa konei, e manakogina ke fesili ifo tatou penei: E mata, ne fakaaoga eiloa ne te Atua a fakalavelave ‵tupu fakafuasei ke fakasala ei a tino? E mata, a fakalavelave fakama‵taku konei ne ‵poko fakamuli nei se fakasalaga mai te Atua?
E uiga ki mea kolā ne fakamasei e auala i mea ma‵losi o te natula, ne ‵losi atu a nisi tino ki te Atua. (Kenese 7:17-22; 18:20; 19:24, 25; Numela 16:31-35) Kae e auala i iloiloga kolā ne fai ki tala i te Tusi Tapu konei, e fakaasi mai ei me e tolu a vaega tāua kese‵kese i ei. Muamua la, e isi eiloa ne faka‵pulaga ne fai atu muamua e uiga ki fakalavelave konā ka ‵tupu. A te lua o mea, ne kai filifili te Atua i fakamaseiga kolā ne fai ne ia. E ‵kese mo fakalavelave o te natula i aso nei kolā e ‵mate i ei a tino ‵lei mo tino ma‵sei, e fakaasi mai i tala konei me ko tino ma‵sei fua mo latou kolā ne seki fia faka‵logo ki faka‵pulaga konā ne fakaseai atu. A ko te tolu, ne fakatoka ne te Atua se auala ke ‵sao ei a tino amio ‵lei.—Kenese 7:1, 23; 19:15-17; Numela 16:23-27.
I fakalavelave ‵tupu fakafuasei e uke kolā ko oti ne fakama‵sei atu ki olaga o te fia miliona o tino i aso nei, e seai se fakamaoniga me ko te Atua ne fakamafua ne ia fakalavelave konei. Kaia la ko gasolo aka ei o uke atu a vaegā fakalavelave penā? E mafai pefea o fakafesagai atu tatou ki ei? Kae e mata, ka isi se taimi ka se toe ai ei ne fakalavelave ‵tupu fakafuasei? Ka maua ne koe a tali ki fesili konā i mataupu kolā e ‵soko mai.
