“A tino ‵poto e lavea ‵mao ne latou a fakalavelave, tela la, e faka‵mao keatea mai i ei, ka ko te tino se mafaufau e fano tonu eiloa ki koga e ‵tupu ei fakalavelave, kae fakamuli ko salamo ei a ia,” ko pati a te Tusi Tapu. (Faataoto 22:3) A te mea tenei se fakatakitakiga poto telā e mafai o fakaaoga ki fakalavelave ‵tupu fakafuasei. Kafai e faka‵pula mai me ko pili o ‵ka te mauga, ka isi se lofiaga io me se matagi malosi, se faiga poto ke ‵tele keatea a tino mai kogā koga konā kae olo atu ki koga kolā e ‵sao ei latou. E tāua atu tou ola i lō tou fale io me ko nisi kope aka.

Kāti e filifili aka ne nisi tino ke se olo atu o ‵nofo i kogā koga kolā e lasi te fakamataku i ei. E fai mai se mau e tasi penei: “E foliki fua te koga i te Lalolagi e ‵tupu i ei a toe mea fakama‵taku kae ko toe fakalavelave ‵tupu fakafuasei ‵lasi eiloa ka ‵tupu fakamuli foki i kogā koga konā.” E mafai eiloa o tonu te manatu tenei maise loa i kogā koga ma‵lalo i tafatai mo ma‵faga i te laukele kolā e ‵poko sale i ei a mafuie. Ka se logo‵mae malosi eiloa koe māfai e fano koe o nofo i koga kolā e se uke a fakalavelave ‵tupu fakafuasei i ei.

Faitalia a taumafaiga katoa ne fai, kāti ka fepaki eiloa koe mo se fakalavelave tupu fakafuasei. Kafai e isi sau palani ko oti ne fakatoka faka‵lei, ka faigofie eiloa te fakafesagai atu o koe ki ei. E fetaui foki te mea tenā mo te fakatakitakiga i te Faataoto 22:3 telā ne siki muamua mai. E mata, e isi se mea e ‵fao ei au mea kolā e manakogina ke puke ne koe i taimi o fakalavelave? E fakamalosi mai te tusi ko te 1-2-3 of Disaster Education ke fakatoka a mea konei: Vailakau, fagu vai, meakai kolā e fui ma‵sei, mo pepa tāua ei. Se mea ‵lei foki ke onoono fakatasi koe mo tou kāiga ki fakalavelave ‵tupu fakafuasei takitasi kolā e mafai o ‵tupu mo mea kolā e ‵tau o fai ki ei.

E fesoasoani mai eiloa te mea tenei i so se mea e tupu. E faipati eiloa te Tusi Tapu e uiga ki te Atua e pelā me ko “te Tamana o te alofa fakamagalo. Ko ia foki ko te Atua o fakamafanafanaga katoa, kae e fakamafanafana mai a ia ki a tatou i ‵tou puapuaga katoa.” E fakamatala mai i te suā fuaiupu me i a ia ko te Atua telā e “fakamafanafana ne ia a tino loto vāi‵vai.”​—2 Kolinito 1:3, 4; 7:6.

E tonu, e iloa ‵lei ne te Atua a mea kolā e ‵tupu ki a latou kolā e fakatuanaki ki a ia. A iako te Atua alofa kae fakamalosi mai ne ia tatou i auala kese‵kese. (1 Ioane 4:8) E mafai eiloa o maua ne tatou te fesoasoani mai te Atua māfai e ‵talo atu ke maua te malosi o tena agaga tapu kae e se ko te ‵talo atu ke maua se faka‵saoga fakavavega. E ma fai ne te agaga tapu o fakamasaua mai a fuaiupu i loto i te Tusi Tapu kolā e mafai o fakamafanafana atu ki a latou kolā e fakafesagai mo mea faiga‵ta. E tonu, e mafai eiloa o ‵pau a lagonaga o tavini fakamaoni a te Atua mo Tavita, te tupu mua o Isalaelu, telā ne fai mai penei: “Te Aliki, e ui eiloa e sasale au i loto i se koga pouli tagataga, kae ka se mataku au i a koe e fakatasi mai faeloa ki a au. Ko tou tokotoko mo tau lakau e puipui ei au.”​—Salamo 23:4.

I te senitenali muamua, ne fakaasi mai ne te pelofeta Kelisiano ko Akapasi me “ko pili o oko atu se oge lasi ki te lalolagi nofoaki kātoa; kae ne tupu eiloa te mea tenā i taimi o Kalaotia.” Ne pokotia malosi eiloa a soko o Iesu i Iuta i te oge tenā. Ne a mea ne fai ne te kau soko i nisi koga i te taimi ne ‵logo ei latou i te fakalavelave o olotou taina Kelisiano? E fai mai penei te tala: “Ne fakaiku aka ne soko katoa ke avatu se fesoasoani ki taina kolā e ‵nofo i Iuta, e ‵tusa mo te mea e mafai ne latou taki tokotasi o tuku atu.” (Galuega 11:28, 29) Ne fakaasi atu eiloa te a‵lofa o latou mai te tukuatuga o fesoasoani kolā e manakogina.

E fai foki penā a tavini a te Atua i aso nei māfai e ‵tupu a fakalavelave faiga‵ta. E lauiloa a Molimau a Ieova i te fesoasoani atu ki olotou taina tali‵tonu. E pelā mo te taimi ne poko ei se mafuie lasi i Chile i a Fepuali 27, 2010, ne fesoasoani fakavave atu a Molimau a Ieova ki a latou kolā ne pokotia i ei. Ne fai mai se fafine telā ne galo atu tena fale i te tsunami: “Ko oko eiloa i te fakamafanafana kae fakamalosi loto me ko te aso eiloa mai tua ifo i ei ne oko mai a [taina Molimau] mai nisi koga o fesoasoani mai ki a matou. E seai se fakalotolotolua me ne fakamafanafana mai eiloa a Ieova e auala i te aga‵lei o volenitia konā. Ne oko mai te lagonaga me i a au e alofagina kae puipuigina.” Ne lavea ne tena tupuna tagata telā e sē se Molimau a te fesoasoani tenā. Ana muna: “E ‵kese ‵ki eiloa te mea tenei mo te mea telā ne matea ne au i taku lotu i tausaga e uke.” Ne fakamalosi atu a mea kolā ne lavea ne ia ke fakamolemole atu ei ki Molimau a Ieova ke fai sena akoga faka-te-Tusi Tapu.

A te ‵kau atu ki tino kolā e a‵lofa ki te Atua e fai mo fai se fesoasoani lasi ‵ki i taimi faiga‵ta. E tiga te feitu tenā, e mata, ka isi se taimi ka sē toe ai ei ne fakalavelave ‵tupu fakafuasei i te lalolagi nei? Ke onoono aka tatou me ne a pati a te Tusi Tapu e uiga ki te mataupu tenei.