E ‵Fuli ne te Tusi Tapu a Olaga o Tino

NE MAFAI pefea o maua se olaga aoga ne se tamāfine telā ne tupu aka i se olaga matagā? Se a te mea ne fakamalosi atu ki se tino ‵teke fakasaua i mea fakapolitiki ke fai mo fai se faifeau uiga filemu i se lotu? Faitau ki tala konei ke maua a tali ki ei.

“Ne manako malosi au ke maua te alofa mo te atafai.”​—INNA LEZHNINA

TAUSAGA NE FANAU I EI: 1981

TENA FENUA: LUSIA

TENA TALA FAKASOLOPITO: SE PUTIAKAGA MATAGĀ

TOKU OLAGA MUA: Au ne fanau mai e ‵tuli ne oku mātua ‵tuli. Ne gali ‵ki ki a au a te ono tausaga muamua o toku olaga. Mai tua ifo i ei, ne ‵tala ne oku mātua te lā avaga. E tiga eiloa koi foliki au, ne malamalama au i te uiga o te ‵talaga o te avaga kae ne logo‵mae malosi au i ei. Mai tua o te ‵talaga o te avaga, ne olo atu toku tamana mo toku tuagane matua o ‵nofo i Troitsk, kae ne ave au ne toku mātua ke ‵nofo i Chelyabinsk. E seki leva kae ne toe avaga tou fafine. Ne umiti toku tamana ki meainu ma‵losi, kae ne masani sāle o ta ne ia māua mo toku mātua.

I te 1993, ne malemu toku tuagane matua pele. Ne ‵poi malosi eiloa te motou kāiga i te fakalavelave tenā. Ne kamata o inu malosi toku mātua kae ‵kau fakatasi mo toku tamana fai i te fai fakamasei mai ki a au. Ne kamata o ‵sala atu au ki se olaga tai ‵lei atu. Ne manako malosi au ki te alofa mo te atafai. Ne kamata o kau atu au ki lotu kese‵kese, ke ‵sala atu ki se fakamafanafanaga, kae e seai se mea ne maua ne au.

TE AUALA NE ‵FULI EI NE TE TUSI TAPU TOKU OLAGA: I te taimi ko 13 ei oku tausaga, e isi soku kautama, se Molimau a Ieova, ne fai mai ne ia a nisi tala mai te Tusi Tapu. Ne fiafia au o tauloto ki vaegā tino i te Tusi Tapu, e pelā mo Noa mo Iopu, kolā ne tavini atu ki te Atua faitalia a fakanofonofoga faiga‵ta. E seki leva kae ne fai taku akoga i te Tusi Tapu mo te kau Molimau kae kamata o kau ki olotou fakatasiga.

A te sukesuke ki te Tusi Tapu ne lavea ei ne au a muna‵tonu ‵gali e uke. Ne otia toku loto i te iloaga ne au me e isi se igoa o te Atua. (Salamo 83:18) Ne ofo foki au i te ‵tonu o te fakataunuga o tulaga kolā ne ‵valo mai i te Tusi Tapu me e ‵tau o ‵tupu i “aso fakaoti.” (2 Timoteo 3:1-5) Kae ne fiafia malosi foki au ke iloa atu a te fakamoemoega ki te toetuga. Mafaufau la—ka toe fetaui au mo toku tuagane!—Ioane 5:28, 29.

Kae e se ko tino katoa ne ‵lago mai ki toku fiafia fou telā ne maua ne au. Ne ‵teke malosi toku mātua mo toku tamana fai ki Molimau a Ieova. Ne  taumafai lāua o faimālō au ke fakagata taku sukesukega ki te Tusi Tapu. Kae ne fiafia malosi au ki aku mea ne tauloto, telā ne seki fia fakagata lele ne au.

Ne seki faigofie ke fakafesagai atu ki ‵tekemaiga mai toku kāiga. A te suā mea fakapoi, ko te taimi ne malemu foki toku tuagane foliki, telā ne olo sāle māua ki fakatasiga a Molimau a Ieova. Kae ne o‵mai faeloa a te kau Molimau. Ne maua ne au a te alofa mo te atafai mai i a latou, se mea telā ko leva ne manako malosi au ki ei i toku olaga kātoa. Ne iloa ne au me e ‵tau eiloa o fai te lotu tenei mo fai te lotu tonu. I te 1996, ne papatiso ei au e pelā me se tokotasi o Molimau a Ieova.

TE AUALA NE MAUA EI NE AU A MEA AOGA: I te ono tausaga ko ‵teka, ne avaga au ki se tagata gali ko Dmitry. Ne tavini fakatasi atu māua i te ofisa lagolago o Molimau a Ieova i St. Petersburg. E seki leva kae ‵fuli te kilokiloga a oku mātua ki toku talitonuga.

Ko oko eiloa i toku loto fakafetai ke iloa atu a Ieova! A te tavini atu ki a ia ne maua ei ne au se olaga aoga tonu.

“Ne ‵numi toku mafaufau i fesili e uke.”—RAUDEL RODRÍGUEZ RODRÍGUEZ

TAUSAGA NE FANAU I EI: 1959

TENA FENUA: CUBA

TENA TALA FAKASOLOPITO: SE TINO ‵TEKE KI MEA FAKAPOLITIKI

TOKU OLAGA MUA: Au ne fanau i Havana, i Cuba, kae ne puti aka au i se koga o tino ma‵tiva telā ne lauiloa faeloa a fusuga i auala. I te taimi ne tupu aka au, ne ati aka ne au toku fiafia ki tafaoga ‵fusu mo nisi tafaoga penā.

Au ne poto ‵ki i te akoga, kae ne fakamalosi mai oku mātua ke fanatu au ki se iunivesiti. I te taimi ne nofo atu au i konā, ne kamata o mafaufau au me e ‵tau o ‵fuli a faifaiga fakapolitiki i toku fenua. Ne fakaiku aka ei ne  au ke fai mo fai se tino ‵teke. Ne ta ne māua mo toku kautama se pulisimani mo te fakamoemoega ke kaisoa ne māua tena fana. Kae ne iku atu eiloa te mea tenā ki te pakia malosi o te ulu o te pulisimani. Ne ‵pei māua mo toku kautama ki te falepuipui kae ne fakasala māua ki te fanafana ke ‵mate. Ko 20 fua oku tausaga, kae ko pili o mate au.

Ona ko toku nofo tokotasi i te potu i te falepuipui, ne fakaakoako faeloa au ki aku mea ka fai māfai ko fanafana au ki te mate. Ne seki fia fakaasi atu ne au me i a au e mataku. I te taimi foki tenā, ne uke ‵ki aku fesili kolā ne fakalavelave mai. Ne mafaufau ifo au: ‘Kaia ko uke katoa ei a faifaiga sē fakamaoni i te lalolagi? E mata, ko gata eiloa i konei te olaga?’

TE AUALA NE ‵FULI EI NE TE TUSI TAPU TOKU OLAGA: Ne ‵fuli fakavave te mā fakasalaga ki te mate ki te ‵pei i te falepuipui mō se 30 tausaga. Ko te taimi eiloa tenei ne fetaui ei au mo nisi Molimau a Ieova, kolā ne ‵pei ki te falepuipui ona ko olotou talitonuga fakalotu. Ne ofo au i te loto ma‵losi o Molimau kae uiga filemu foki. E tiga eiloa ne ‵pei atu latou e aunoa mo se pogai ‵tau ki te falepuipui, ne seki kaitāua io me e loto ita latou.

Ne akoako mai ne te kau Molimau me e isi se fuafuaga a te Atua mō tino. Ne fakaasi mai ne latou mai te Tusi Tapu me ka ‵fuli te ‵tou lalolagi ki se palataiso telā e seai ne amioga solitulafono mo faifaiga sē fakamaoni i ei. Ne akoako ne latou au me i te lalolagi ka ‵fonu i tino ‵lei kolā ka maua ne latou te avanoaga ke ola ki te se-gata-mai i tulaga ‵lei katoatoa.—Salamo 37:29.

Ne fiafia malosi au ki aku mea ne tauloto mai te kau Molimau, kae ‵kese ‵ki eiloa oku uiga mai i a latou. Ne mafaufau au me ne faigata ki a au a te sē kau ki se feitu i mea fakapolitiki io me ko te sē taui ma sui. Tela la, ne fakaiku aka ne au ke faitau au ki te Tusi Tapu i a au eiloa. I te taimi ne oti ei taku faitauga, ne iloa aka ne au me i Molimau a Ieova ko tino kolā e fai pelā mo Kelisiano mua.

Mai taku sukesukega ki te Tusi Tapu, ne iloa ne au me ne ‵tau o fai ne au a nisi ‵fuliga ‵lasi i toku olaga. E pelā mo te auala e faipati ei au, ne masani sāle o fakaaoga ne au a pati ma‵sei. Ne ‵tau foki o fakagata taku ‵pusi. Kae ne ‵tau foki o fakagata toku kau atu ki kinauga fakapolitiki. Ne seki faigofie a ‵fuliga konei kae fakatasi mo te fesoasoani o Ieova, ne manumalo malielie eiloa au.

A te ‵toe ‵fuliga faigata, ko te fakamasani ke pule faka‵lei ki toku kaitaua. Koi ‵talo atu eiloa au mō te loto pulea i te feitu tenei. Ne fesoasoani malosi mai a vaegā fuaiupu i te Tusi Tapu e pelā mo te Faataoto 16:32, telā e fai mai: “A te tino e tuai o ita e ‵lei atu i lō se tagata mafi, kae ko te tino e pule atu ki tena kaitaua e ‵lei atu i lō te tino e fakatakavale ne ia se fakai.”

I te 1991, ne papatiso au pelā me se tokotasi o Molimau a Ieova. Ne fai eiloa te papatisoga i se tulamu vai i te falepuipui. I te tausaga mai tua ifo, ne fakasaoloto a nisi o matou, kae uga atu ki Sepania me e isi ne motou kāiga i ei. I te okoatuga ki Sepania, ne kau fakavave atu au ki fakatasiga a Molimau a Ieova. Ne tali fiafia au ne te kau Molimau i konā. E pelā loa me ko leva ne masani matou i se fia tausaga. Kae ne fesoasoani mai latou ke kamata toku olaga fou.

TE AUALA NE MAUA EI NE AU A MEA AOGA: Ko fiafia malosi au ke tavini atu ki te Atua fakatasi mo taku avaga mo mā tama‵liki fā‵fine. Ko taulia malosi au ke fakamāumāu a te ukega o oku taimi i te fesoasoani atu ki nisi tino ke tauloto ki te Tusi Tapu. I nisi taimi, kafai e mafaufau au ki toku olaga e pelā me se tamataene telā ko pili o mate, e fakatāua malosi ne au a mea e uke ne maua ne au talu mai te taimi tenā. E se ola fua nei au, kae ko maua foki ne au se fakamoemoega. E olioli au ki te Palataiso telā ko oti ne folafola mai—ki te taimi telā ka tumau i ei a faifaiga fakamaoni mo te taimi “ka se toe ai se mate.”—Fakaasiga 21:3, 4.

[Ko manatu tāua itulau e 19]

“Ne otia toku loto i te iloaga ne au me e isi se igoa o te Atua”

[Ko manatu tāua itulau e 20]

Ko ga‵lue fakatasi nei au mo taku avaga i te avatuga o tusi i te ‵gana fai tāga ki tino ‵tuli