Toeitiiti kae kātoa te sefulu tausaga ne galue ei a Alberto i te kautau. E masaua ne tou tagata: “Ne fakamanuia matou ne te motou faifeau, penei, ‘E fakatasi atu te Atua ki a koutou.’ Kae ne manatu aka au, ‘Au e fano o ‵ta a tino, kae ko te Tusi Tapu e fai mai, “E se ‵tau mo koe o ‵tatino.”’”

A Ray ne galue i vakatau i te Taua i te Lua a te Lalolagi. Ne fesili atu a ia i se taimi e tasi ki te faifeau: “A koe e vau ki luga i te vakamutu o ‵talo mō te kautau mo te manumalo. E mata, e se tenā foki te palani a te fili?” Ne tali mai te faifeau i te Aliki e galue i auala ‵funa.

Kafai e se lotomalie koe ki te tali tenā, e se ko koe fua tokotasi e se lotomalie ki ei.

Ne fai mai a Iesu i te tulafono tafasili e tasi a te Atua ko te “alofa ki tou tuakoi e pelā mo koe ki a koe eiloa.” (Maleko 12:31) E mata, ne fai mai a Iesu i ‵tou a‵lofa ki ‵tou tuakoi e fakalagolago ki te koga e ola ei te tuakoi tenā mo te fenua ne vau ei a ia? Ikai. Ne fai atu a ia ki ana soko: “Ona ko te mea tenei ka iloa ei ne tino katoa i a koutou ko oku soko, manafai e fakatau a‵lofa koutou.” (Ioane 13:34, 35) E fakaofoofogia ‵ki te fakatau a‵lofa o latou te suā tino ki te suā tino, tenā ne fai ei mo fai se iloga o latou. E fia‵fia atu latou o tuku olotou ola mō te suā tino i lō te tamate o nisi tino.

Ne ola a Kelisiano mua e ‵tusa mo pati a Iesu. E fai mai The Encyclopedia of Religion, penei: “Ne taku tonu mai ne tino muamua kolā ne maua ne latou a te lotu, e aofia i ei a Tertullian mo Origen, i Kelisiano ne fakatapu ma ‵tatino, se fakatakitakiga telā ne puipui ei latou mai te ‵kau ki te kautau Loma.”

Ona ko Molimau a Ieova e ‵nofo i fenua e uke, e mafau‵fau a tino taki tokotasi i a latou e ola i feitu e lua o kinauga i va o atufenua. E ui i ei, e taumafai malosi latou o fakatumau a te iloga o latou ko te alofa.

Pelā me se fakaakoakoga, i te fe‵pakiga i te va o te kau Hutu mo te kau Tutsi i Rwanda i te 1994, ne tumau eiloa a Molimau a Ieova i te sē ‵kau ki se feitu. Ne faka‵muni ne Molimau o te matakāiga e tasi a Molimau mai i te suā matakāiga, kae ne fakamataku ‵ki eiloa ki olotou ola. I te taimi ne ‵po ei a te avā Molimau Hutu kolā ne faka‵muni ne lāua a lā taina Tutsi, ne fai atu a sotia Hutu, “A koulua e ‵tau o ‵mate i a koulua ne fesoasoani ki tino Tutsi ke ‵sao.” Se mea fakafanoanoa i te avā Molimau Hutu ne tamate eiloa.​—Ioane 15:13.

Se a tau faka‵tau: E mata, e fetaui a faifaiga a Molimau a Ieova mo pati a Iesu e uiga ki te tuku atu o ‵tou ola pelā me se taulaga ona ko te alofa?