E FESILI MAI ‵TOU TINO FAI‵TAU . . .

Kaia e se taku mai ei a igoa o nisi tino i loto i te Tusi Tapu?

I loto i te tusi a Luta i te Tusi Tapu, a te tagata telā e ita ma fai a tena tiute e ‵tusa mo te Tulafono a Mose e se taku mai a tena igoa. (Luta 4:1-12) E mata, e ‵tau o fakaiku aka ne tatou me e se taku mai olotou igoa ona ko tino konei e ma‵sei io me e se tāua?

Ikai. Ke mafaufau ki se fakaakoakoga e tai ‵kese. Ko te mea ke toka a ia mō tena toe ‵kaiga o te Paseka, ne fai atu a Iesu ki ana soko ke “olo ki te Tagata i te fa‵kai [“se tagata,” The New English Bible]” kae fakatoka a mea ke toka i tena fale. (Mataio 26:18) E mata, e ma‵natu aka tatou i te “Tagata” telā e fakasino ki ei i te fuaiupu tenei se tagata masei io me e se tāua malosi ke taku mai tena igoa? Ikai loa; e seai se fakalotolotolua i te “tagata” telā e taku mai i konei se soko o Iesu. Ona la ko tena igoa e se tāua ki te tala, tenā ne ‵solo ei kea‵tea.

E se gata i ei, e maua i te Tusi Tapu a igoa o tino ma‵sei taki tokotasi e tokouke; e maua foki i ei a fakaakoakoga o tino fakamaoni e tokouke kolā ne seki taku mai olotou igoa. Pelā me se fakaakoakoga, e lauiloa a te igoa o te fafine muamua, ko Eva. Kae ne fesoasoani atu a tena kaimanako mo te sē fakalogo ki te agasala a Atamu, telā ne maua ei ne tatou a ikuga matagā. (Loma 5:12) E ‵kese mai i ei, ne seki taku mai te igoa o te avaga a Noa i Tusitusiga Tapu, kae e āva malosi tatou ki tena loto fiafia o ‵lago atu ki tena avaga i tena galuega tāua. E manino ‵lei i te seai o sena igoa e se fakauiga i ei i a ia e se tāua io me ne seki fakamanuia a ia ne Ieova.

E isi aka foki ne tino taki tokotasi ne seki taku mai olotou igoa i te Tusi Tapu kae ne fai ne latou ne tusaga tāua ‵ki i te fuafuaga a Ieova. Ke mafaufau ki te tamaliki fafine telā ne pologa i te fale o Namanu, se ofisa o te kautau Sulia. Ne faipati atu a ia mo te loto toa ki tena pule, te avaga a Namanu, e uiga ki te pelofeta a Ieova i Isalaelu. Ne iku atu a te mea tenei ki te faiga o se vavega lasi ‵ki. (2 Tupu 5:1-14) Ne fai foki ne te tamaliki fafine a te famasino o Isalaelu ko Iefata se fakaakoakoga sē fuafuagina o te fakatuanaki. Ne loto fiafia eiloa tou fafine o sē avaga kae ke seai ne ana tamaliki ko te mea ke fakataunu a te tautoga ne fai ne tena tamana. (Famasino 11:30-40) I se auala tai ‵pau, e silia atu i te 40 o tino fatu pese o salamo ne seki taku mai olotou igoa e pelā foki mo pelofeta kolā ne fai olotou tofiga mo te fakamaoni kae seki taku mai olotou igoa.—1 Tupu 20:37-43.

E se taumate a te mea telā e tai fakaofoofogia atu ko te fakaakoakoga a agelu fakamaoni. E lau i selau miliona a latou, kae tokolua fua e taku mai a igoa i te Tusi Tapu—ko Kapilielu mo Mikaele. (Tanielu 7:10; Luka 1:19; Iuta 9) A te ‵toega o agelu e se taku mai olotou igoa i tala i te Tusi Tapu. Pelā me se fakaakoakoga, ne ‵sili atu a Manoa te tamana o Samasoni, ki se agelu: “Taku mai tou igoa, ko te mea ke mafai ne māua o tavae koe, manafai e taunu au muna ne fai mai.” Se a te tali? “Ai a e manako ei koe ke iloa ne koe toku igoa?” Ona ko te loto maulalo, ne ita te agelu tenā ma talia a tavaega kolā e ‵tau fua o avatu ki te Atua.—Famasino 13:17, 18.

E se fakamatala mai i te Tusi Tapu te pogai e taku mai ei a igoa o nisi tino taki tokotasi kae ko nisi tino e seai. Kae e uke a mea e mafai o tauloto ne tatou mai tino fakamaoni taki tokotasi kolā ne tavini ki te Atua e aunoa mo te fia takutakua io me ko te fia maluga.

[Ata i te itulau e 10]