A te Atua se tino faka-te-agaga telā e se matea ki mata. Ne faite ne ia te lagi, te lalolagi, mo mea ola katoa. E seai se tino ne faite ne ia te Atua​—e seai sena kamataga. (Salamo 90:2) E manako te Atua ke ‵sala atu a tino ki a ia kae ke iloa ne latou te munatonu e uiga ki a ia.​—Faitau te Galuega 17:24-27.

A te Atua se tino telā e mafai o iloa ne tatou tena igoa. E mafai o iloa ne tatou ana uiga mai i te onoono ki ana mea ne faite. (Loma 1:20) Kae ke iloa ‵lei ne tatou te Atua, e ‵tau mo tatou o sukesuke ki tena Muna, ko te Tusi Tapu. E fakamasani ei tatou ki uiga ‵gali o te Atua.​—Faitau te Salamo 103:7-10.

A te ‵tou Mafuaga, ko Ieova, e takalialia ki faifaiga sē fakamaoni. Kae ne faite ne ia a tino ki ana foliga. (Teutelonome 25:16) Tenā eiloa te pogai e takalia‵lia ei a te tokoukega o tatou ki faifaiga sē fakamaoni. E se māfua mai i te Atua a faifaiga sē fakamaoni i ‵tou tafa. Ne tuku atu ne te Atua a te saolotoga ke fai a filifiliga ki te tagata. Se mea fakafanoanoa me e fakaaoga ‵se ne tino e tokouke te lotou saolotoga kae aofia i faifaiga sē fakamaoni. Ne fanoanoa eiloa te loto o Ieova.​—Faitau te Kenese 6:5, 6; Teutelonome 32:4, 5.

E fiafia malosi a Ieova ki faifaiga fakamaoni, kae ka se talia ne ia a faifaiga sē fakamaoni ke tumau ki te se-gata-mai. (Salamo 37:28, 29) E folafola mai te Tusi Tapu me ka aumai ne te Atua te gataga ki faifaiga sē fakamaoni katoa i se tami pili mai mua nei.​—Faitau te 2 Petelu 3:7-9, 13.