Mekala: Talofa Sofia. Tapa, ko oko loa te gali ke maua atu ne au koe i te fale.

Sofia: E penā foki au.

Mekala: I te taimi fakamuli ne āsi mai ei au, ne sau‵tala eiloa tāua ki lagonaga o te Atua e uiga ki ‵tou logo‵maega. * Ne fai mai ne koe me ko leva eiloa ne mafaufau koe ki te mea tenei, maise eiloa i te taimi ne pakia ei tou mātua i te fe‵pakiga o motoka. E tiga eiloa te feitu tenā, e a mai tou mātua?

Sofia: E isi ne taimi ‵lei kae e isi foki ne taimi ko tai logologosala a ia. Kae e ‵lei ‵ki a ia i te aso nei.

Mekala: Ko oko eiloa i toku fiafia ke lagona atu me ‵lei a ia. E mafai eiloa o faigata ke tumau i se vaegā tulaga penā.

Sofia: E tonu ‵ki koe. I nisi taimi e mafaufau au me e pefea te leva ka logo‵mae ei penei tou fafine.

Mekala: A te mea tenā se lagonaga masani. Kāti e masaua ne koe i te fakaotiga o taku āsiga fakamuli, ne tuku atu ne au se fesili ke mafaufau koe ki ei me kaia ne talia ei ne te Atua ke tumau a logo‵maega māfai e isi sena ‵mana ke fakagata aka ne ia.

Sofia: Ao, e masaua ne au.

Mekala: A koi tuai o mafau‵fau tāua ki te tali i te Tusi Tapu, ke toe onoono aka tāua ki nai manatu ne sau‵tala tāua ki ei i taku āsiga fakamuli nei.

Sofia: Io ko ‵lei la.

Mekala: E tasi mai i ei, ne tauloto ne tāua me ke oko foki eiloa ki se tagata fakamaoni i taimi o te Tusi Tapu ne fia iloa foki ne ia me kaia ne talia ei ne te Atua a logo‵maega. Kae ne seki pati ‵toko ne te Atua a ia ona ko te fesili tenā, io me e seki fai atu foki te Atua me e ‵tau o tai momea aka ki luga tena fakatuanaki.

Sofia: A te mea tenā se manatu fou ki a au.

Mekala: Ne iloa ne tāua me e takalialia a Ieova ke kilo mai ki ‵tou logo‵maega. E pelā mo te Tusi Tapu, e fai mai me kafai ko puapuaga ana tino e ‘alofa kae atafai a ia’ ki a latou. * E a, e se fakamafanafana loto ke iloa atu me e alofa te Atua ki a tatou māfai ko logo‵mae tatou?

Sofia: Ao, e tonu.

Mekala: A te ‵toe manatu, ne lotoma‵lie tāua me i te mafaufau ki te lasi o te ‵mana o te ‵tou Mafuaga, e mautinoa eiloa me e mafai o fakagata ne ia a logo‵maega i so se taimi.

Sofia: Tenā te mea e se malamalama au i ei. Kaia e talia katoa ei ne te Atua a mea ma‵sei konei ke ‵tupu māfai e isi sena ‵mana ke fakagata atu?

Mekala: E mafai o onoono muamua tāua ki te tali o tau fesili mai i te ‵suke ki te tusi muamua i te Tusi Tapu, ko Kenese. E masani koe mo te tala o Atamu mo Eva mo te fuaga telā ne fakatapu?

Sofia: Ao, ne iloa ne au te tala tenā i Akoga Aso Sa. Ne fai atu te Atua ke se ‵kai lāua ki se lakau fakapito, kae ne ‵kai eiloa lāua ki ei.

 Mekala: E tonu eiloa. Nei la, ke onoono aka tāua ki mea ne ‵tupu kolā ne iku atu ki te agasala a Atamu mo Eva. A mea konā ne ‵tupu e mafai o tali aka ei a te fesili me kaia e logo‵mae ei tatou. Fakamolemole, e mafai o faitau mai ne koe te Kenese mataupu e 3, te fuaiupu e 1 ki te 5?

Sofia: Io ko ‵lei. “A te gata ko te ‵toe manu faitogafiti eiloa i manu katoa ne faite ne te Aliki te Atua. Muna a te gata ki te fafine, ‘E tonu eiloa i te Atua ne fai atu ke sa ‵kai koulua ki fuaga o so se lakau i te fatoaga?’ Ne tali atu te fafine penei, ‘E mafai ne māua o ‵kai ki fuaga o so se lakau i te fatoaga, kae tenā fua ko te lakau telā i te kogaloto o te fatoaga. A te Atua ne fai mai ke tapu e ‵kai māua ki fuaga o te lakau tenā io me pa‵tele ki ei; kafai e ‵kai māua ki ei, ko māua ka ‵mate.’ Muna a te gata penei, ‘A te mea tenā sē se mea tonu; a koulua e se ‵mate. A te Atua ne fai atu penā me e iloa ne ia me kafai e ‵kai koulua ki fuaga o te lakau tenā, ko koulua ka ‵pau mo te Atua, ka iloa foki ei ne koulua te mea ‵lei mo te mea masei.’”

Mekala: Fakafetai. Ke iloilo malie aka ne tāua a fuaiupu konei. A te mea muamua, ke onoono la me ne faipati atu te gata ki te fafine. E fakaasi mai i nisi vaega o te Tusi Tapu me ko Satani te Tiapolo telā ne faipati atu e auala i te gata. * Ne fesili atu a Satani ki a Eva ki te fakatonuga a te Atua e uiga ki se lakau fakapito. Ne iloa ne koe me se a te fakasalaga māfai ne ‵kai a Atamu mo Eva ki ei?

Sofia: Ka ‵mate lāua.

Mekala: E tonu. Kae mai i ana nisi pati, ne fai ne Satani se matugā ‵losiga ‵se e uiga ki te Atua. Onoono aka la ki ana muna: “A koulua e se ‵mate.” Ne taku ne Satani a te Atua ki se tino loi!

Sofia: E seki lagona aka eiloa ne au muamua a te vaega tenei o te tala tenā.

Mekala: Kae i te taimi ne taku ei ne Satani te Atua me se tino loi, ne fakasae aka ne ia se mataupu telā e manakogina se taimi tai leva ke faka‵lei aka. E mata, ko mafai o lavea ne koe a te pogai?

Sofia: Oi. E se mautinoa i a au.

Mekala: Ia, kāti e mafai o fakamatala atu ne au a te manatu tāua i te auala tenei. Mafaufau la me ko fanatu au i se aso e tasi kae fai atu me e malosi fakafia atu au i a koe. Ka fakamaoni aka pefea ne koe me i a au e ‵se fua?

Sofia: Kāti la mai i te faiga o se tofotofoga.

Mekala: Ao, ko ia eiloa tenā. Kāti e mafai o fakaaoga ne tāua se mea ‵mafa kae onoono aka me ko oi e mafai o sau aka ne ia. A te ‵tonuga loa, e mafai eiloa fakamaoni aka i konā me ko oi e malosi atu.

Sofia: Ao, tenei ko lavea ne au te mea e fai koe ki ei.

Mekala: Kae e a māfai e se fai atu ne au me e malosi atu au i a koe, kae e fai atu fua au me e fakamaoni atu au i a koe? E faigata atu te mea tenā, ne?

Sofia: Ao, i taku faka‵tau.

Mekala: A te ‵tonuga loa, a te fakamaoni e se fai pelā mo te malosi telā e mafai o fakatalitonu aka ki te faiga o se tofotofoga faigofie fua.

Sofia: Ao, e tonu koe.

Mekala: Tela la, a te auala fua e tasi ke faka‵lei aka te kinauga ko te fakaaogaga o se taimi tai leva ke lavea ne nisi tino me ko oi i a tāua e sili atu tena fakamaoni.

Sofia: E ‵tagi tonu eiloa te manatu tenā.

Mekala: Nei la, ke toe onoono aka tāua ki te tala tenei i te Kenese. E mata, ne fai atu a Satani me e malosi atu a ia i te Atua?

Sofia: Ikai.

Mekala: Ne mafai faeloa o fakamaoni fakavave atu ne te Atua tena ‵se. I lō te fai penā, ne fai pelā me ne fai atu Satani me e fakamaoni atu a ia i lō te Atua. Ne fai pelā me ne fai atu penei ana pati ki a Eva, ‘A te Atua e loi atu ki a koe, kae ko au e faipati ‵tonu atu eiloa ki a koe.’

Sofia: Ko oko eiloa i te gali o te manatu tenā.

Mekala: Kae i tena poto eiloa, ne iloa ne te Atua me i te ‵toe auala ‵lei ke faka‵lei aka a te kinauga ko te fakaaogaga o se taimi tai leva. Fakamuli loa, ka iloa aka ei me ko oi te tino e faipati tonu mai mo te tino pati loi.

Sofia: Kae mai tua eiloa o te taimi ne mate ei a Eva, e a, e seki fakamaoni atu ei me ne faipati ‵tonu eiloa te Atua?

 Mekala: Ao, ne fai eiloa penā. Kae e uke atu mea e aofia i pati ‵toa a Satani. Ke toe onoono ki te fuaiupu e 5. E iloa ne koe me ne a foki a pati ne fai atu ne Satani ki a Eva?

Sofia: Ne fai atu tou tagata me kafai e kai tou fafine ki te fuaga, ka ‵pau a ia mo te Atua.

Mekala: Ao, kae “ka iloa foki ei ne koulua te mea ‵lei mo te mea masei.” Tela la, ne fai atu Satani me e isi se mea ‵lei e taofi aka ne te Atua mai i tino.

Sofia: Ao, e tonu.

Mekala: Kae ko te mea foki tenā se manatu ‵teke tāua ‵ki.

Sofia: Se a te mea e fakauiga koe ki ei?

Mekala: E auala i ana pati, ne fai atu a Satani me i a Eva​—kae penā foki loa mo tino katoa​—ka ‵lei fakafia atu olotou olaga e aunoa mo te pulega a te Atua. I te feitu foki tenei, ne iloa ne Ieova me i te ‵toe auala ‵lei ke fakamaoni aka a pati ‵toa konei ko te taliaga o Satani ke fakamaoni aka tena manatu. Tela la, ne talia ne te Atua ke pule mai a Satani ki te lalolagi mō se vaitaimi. Tenā eiloa te pogai ko uke katoa ei penei a logo‵maega i ‵tou tafa​—me i a Satani, ko te pule tonu o te lalolagi, kae se ko te Atua. * Kae e isi eiloa se tala ‵lei.

Sofia: Se a te mea tenā?

Mekala: E akoako mai i te Tusi Tapu a muna‵tonu ‵gali e lua e uiga ki te Atua. Muamua la, e toka faeloa a Ieova o fesoasoani mai ki a tatou i te taimi e logo‵mae ei tatou. E pelā mo pati a te tupu ko Tavita, kolā ne fakamau i te Salamo 31:7. Ne logo ‵mae malosi a Tavita i mea e uke i tena olaga, kae onoono la ki pati ne mafai o fai atu ne ia i tena ‵talo ki te Atua. E mafai o faitau mai ne koe te fuaiupu tenā?

Sofia: Ko ‵lei la. E fai mai penei: “Au e fiafia kae ‵lifu i tou alofa tumau. E iloa ne koe oku puapuaga; e lavea foki ne koe oku fakalavelave.”

Mekala: Tela la, faitalia eiloa me ne logo‵mae a Tavita, ne maua ne ia te fakamafanafanaga me ne lavea ne Ieova a mea katoa ne fepaki mo ia. E a, e se fakamafanafana loto​—a te manatu me e lavea ne Ieova a mea katoa, ke oko ki ‵tou lagonaga logo‵mae kolā e se maina i ei a nisi tino?

Sofia: Ao, e fakamafanafana ‵ki mai.

Mekala: A ko te lua, me ka se talia ne te Atua a logo‵maega ke tumau ki te se-gata-mai. E akoako mai ne te Tusi Tapu me ko pili o fakaoko mai ne ia te gataga ki te pulega masei a Satani. Kae ka fakaseai katoatoa atu ne ia a mea ma‵sei katoa kolā ko oti ne ‵tupu, e aofia i ei a mea kolā ne logo‵mae ei koulua mo tou mātua. E mafai ne au o toe foki mai i te suā vaiaso ke fakaasi atu ne au te pogai e mafai ei o tali‵tonu tatou me ka fakagata atu ne te Atua a logo‵maega katoa i se taimi pili mai nei? *

Sofia: Ko oko eiloa i te gali ki a au.