A Petania se tamā fa‵kai telā e nofo ki te lua maila (3 kilomita) te ‵mao mai Ielusalema. (Ioane 11:18) Ne tupu eiloa se fakalavelave lasi i nai vaiaso mai mua o te mate o Iesu. A Lasalo, se tokotasi o taugasoa pili o Iesu, ne masaki fakapoi me ko mate.

I te taimi ne lagona muamua ei ne Iesu te tala, ne fai atu a ia ki ana soko me i a Lasalo ko moe kae e manako a ia o fanatu ke ‵fagu aka a ia. (Ioane 11:11) Kae ne seki malamalama a soko o Iesu i te mea ne fakauiga a ia ki ei, telā ne fai ‵tonu atu ei a Iesu ki a latou: “A Lasalo ko oti ne mate.”​—Ioane 11:14.

Mai tua o te fa o aso ne tanu ei, ne oko atu a Iesu ki Petania kae ne taumafai ke fakamafanafana atu ki a Maleta, ko te tuagane o te tino mate. Ne fai atu a Maleta: “Moi ne nofo koe i konei penei e se mate toku tuagane.” (Ioane 11:17, 21) Ne tali atu a Iesu: “Au ko te toetu mo te ola. Ko te tino telā e fakatuanaki mai ki a au, e tiga eiloa e mate, kae ka toe ola mai.”​—Ioane 11:25.

Ke fakaasi atu me i pati konā e se ne folafolaga fakaloiloi, ne fanatu a Iesu ki te tanuga kae kalaga atu: “Lasalo o, vau ki tua!” (Ioane 11:43) Kae ne ‵poi a tino kolā ne maimoa atu, me ne sae mai ki tua a te tino mate.

Ko oti foki ne faka‵tu aka ne Iesu a tino e tokolua mai mua atu o te taimi tenei. I te taimi e tasi, ne fakatu aka ne ia se tamaliki fafine foliki mai te mate​—ko te tama fafine a Iailo. Mai mua faeloa o toe fakatu aka ne Iesu tou fafine, ne fai mai foki a ia me ne moe fua tou fafine.​—Luka 8:52.

Onoono aka la me ne faka‵pau ne Iesu te mate ki te moe i te taimi ne faipati mai ei a ia e uiga ki te mate o Lasalo mo te tama fafine a Iailo. E fetaui ‵lei eiloa te fakatusaga tenā. Kaia? A te moe se tulaga telā ko seai se mea e iloa kae e fakaasi mai i ei i se auala telā e fetaui ‵lei a te manatu ko te malōlō mai i te ‵mae mo te logo‵mae. (Failauga 9:5; ke onoono foki ki te pokisi  “E Fai a te Mate e Pelā me se Tino e ‵Nau Tena Moe.”) Ne malamalama ‵lei eiloa a soko mua o Iesu i te tulaga tonu o te tino mate. E fai mai te Encyclopedia of Religion  and Ethics: “A te mate e fai eiloa pelā mo te moe ki soko o Iesu, kae ko te tanuga se koga malōlō . . . ki a latou kolā ko ‵mate i te fakatuanaki.” *

E fakamafanafana mai ke iloa atu me e ‵moe a tino ‵mate i te tanuga kae e se logo‵mae latou. Tela la, ko iloa nei ne tatou a te mea e tupu ki te tino mate kae ko se toe fai ei tatou ke ma‵taku.

Kae e tiga eiloa te gali o te moe ‵lei o tatou i te po, ko oi e manako ke moe eiloa a ia ki te se-gata-mai? Se a te fakamoemoega e maua ne tatou me i tino ‵mate kolā e ‵moe i te tanuga ka toe fakaola mai​—e pelā mo te mea ne fai ki a Lasalo mo te tama fafine a Iailo?

Ne fakasae aka ne te tagata mua ko Iopu a te fesili tenei i te taimi ko tai mate aka eiloa a ia. Ne fesili atu a ia: “Kafai e mate se tagata, e mata, e mafai o toe ola mai?”​—Iopu 14:14.

I te faipati atu ki te Atua Malosi Katoatoa, ne tali foki eiloa ne Iopu tena fesili: “Ka kalaga mai koe, kae tali atu au, kae ka fiafia ei koe ki a au, tau mea ola ne faite.” (Iopu 14:15) Ne mautinoa i a Iopu me ne olioli eiloa a Ieova ki te aso ke fakatu aka ne Ia Tena tavini fakamaoni. E mata, a te mea tenā se mafaufauga sē tonu fua o Iopu? Ikai, e se penā loa.

A toe‵tuga kolā ne fai ne Iesu e tuku mai i ei se fakamaoniga manino me ne tuku atu ne te Atua a te pule ki luga i te mate. A te ‵tonuga loa, e fai mai te Tusi Tapu me ko maua nei ne Iesu a “kī o te mate mo te Tanuga.” (Fakaasiga 1:18) Tela la, ka toe ‵tala ne Iesu a mataloa o te tanuga, e pelā eiloa mo tena fakatonuga ke ave keatea te fatu i te tanuga o Lasalo.

E fakafokifoki mai faeloa ne te Tusi Tapu a te folafolaga tenei e uiga ki te toetuga. Ne fakatalitonu atu se agelu ki te pelofeta ko Tanielu: “Ka mate koe, kae ka toe tu mai koe o puke te taui ‵lei o koe i te taimi o te gataga.” (Tanielu 12:13) Ne fai atu a Iesu ki te kau Satukaio, ko takitaki Iutaia kolā ne fakaseaoga ne latou a te folafolaga ki te toetuga: “A koutou e ‵se, me e se iloa ne koutou a te Tusi Tapu io me ko te ‵mana o te Atua.” (Mataio 22:23, 29) Ne fai atu te apositolo ko Paulo: “Kae isi soku fakamoemoega mai te Atua . . . Me ka toe‵tu mai a tino amio‵tonu mo tino amio sē ‵tonu.”​—Galuega 24:15.

Ka tupu māfea a te toetuga tenei o tino amio‵tonu mo tino amio sē ‵tonu? Ne fai atu te agelu ki te tagata amiotonu ko Tanielu me ka toetu aka a ia “i te taimi o te gataga.” Ne talitonu foki a Maleta me ka toetu aka tena tuagane, ko Lasalo “i te aso fakaoti.”​—Ioane 11:24.

E ‵soko tasi ne te Tusi Tapu a te “aso fakaoti” tenei mo te pulega a Keliso i te Malo. Ne tusi mai a Paulo: “Me e ‵tau mo ia [Keliso] o pule mai e pelā me se tupu ke oko ki te taimi e tuku ei ne te Atua ana fili katoa mai lalo i ana vae. A te ‵toe fili telā e ‵tau o fakaseai atu ko te mate.” (1 Kolinito 15:25, 26) Tenei eiloa te pogai tāua e ‵tau ei o ‵talo atu tatou ki te Malo o te Atua ke oko mai mo te loto o te Atua ke fai i te lalolagi nei. *

E pelā mo te mea ne iloa ne Iopu, a te loto o te Atua ko te faka‵tuakaga o tino ‵mate. Kafai ko oko mai te aso tena, ka fakaseai tonu atu eiloa i ei te mate. Kae ka se toe ai se tino e fesili mai, ‘E mata, e gata atu a mea katoa i te mate?’