E talitonu koe ki te folafolaga i te Tusi Tapu e uiga ki te toetuga? * Se mea gali a te fakamoemoega ke toe ‵kau fakatasi mo ou tino pele kolā ko oti ne ‵mate. Kae e mata, se fakamoemoega tonu eiloa? Ke tali aka te fesili tenā, se mea ‵lei ke mafau‵fau tatou ki te fakaakoakoga a apositolo a Iesu Keliso.

Ne tali‵tonu katoatoa a te kau apositolo ki te toe‵tuga o tino ‵mate. Kaia? Ona ko pogai e lua. Muamua la, ne fakavae muamua eiloa te lotou fakamoemoega ki te manatu tonu tenei: Ne fakatu aka eiloa a Iesu mai te mate. Ne lavea ne te kau apositolo​—mo “taina e silia atu i te toko 500 i te taimi e tasi”​— a Iesu telā ko oti ne fakatu aka. (1 Kolinito 15:6) E se gata i ei, ne lauiloa kae ne taliagina foki a te toetuga o Iesu e pelā mo te mea e fakaasi mai i tala Evagelia.​—Mataio 27:62–28:20; Maleko 16:1-8; Luka 24:1-53; Ioane 20:1–21:25.

A te lua o mea, ne lavea ne te kau apositolo a te faiga ne Iesu o toetuga e tolu​—te mea muamua i Naina, i Kapanaumi, kae ko te ‵toe mea i Petania. (Luka 7:11-17; 8:49-56; Ioane 11:1-44) A te ‵toe toetuga telā ne fakamatala mai mua i te lōmiga tenei, ne aofia i ei se kāiga telā ne pili ‵ki ki a Iesu. Ke na onoono tatou ki nisi mea ne ‵tupu.

“Ka toetu mai tou tuagane.” Ne fai atu ne Iesu a pati konā ki a Maleta, ko te tuagane o Lasalo telā ne mate i te fa o aso ko ‵teka. Ne seki malamalama a Maleta i te uiga o pati a Iesu. “E iloa ne au me ka toetu mai a ia i te toe‵tuga i te aso fakaoti,” ne tali atu tou fafine, kae ne mafaufau a ia ki se taimi i aso mai mua. Mafaufau la ki te poi o tou fafine mai tua o te lagonaga ne ia a pati a Iesu “Au ko te toetu mo te ola,” i te taimi ne lavea ei ne tou fafine a te fakatuakaga ne Iesu o tena tuagane mai te mate!​—Ioane 11:23-25.

Ne nofo atu i fea a Lasalo i te fa o aso mai tua o tena matega? Ne seai eiloa ne pati a Lasalo ne fai e uiga ki te koga ne nofo atu ei a ia i aso e fa konā. Ne seki maua ne Lasalo se agaga telā e se mafai o mate kae ne fanatu ki te lagi. I te fakatuakaga o Lasalo, ne seki fakafoki mai ne Iesu a ia ki te lalolagi, mai te aumaiga keatea mai i te koga gali i tafa o te Atua i te lagi. Tela la, ne nofo atu i fea a Lasalo i aso e fa konā? A te ‵tonuga loa, ne moe a ia i te tanuga.​—Failauga 9:5, 10.

Masaua, me ne fakatusa ne Iesu te mate ki te moe telā e mafai o toe ala aka se tino e auala i te toetuga. E faitau penei te tala: “‘A Lasalo te ‵tou taugasoa ko moe, kae ka faimalaga atu au o ‵fagu aka a ia.’ Fai atu ei ana soko ki a ia: ‘Te Aliki, kafai a ia e moe, ka toe  lei a ia.’ Ne faipati a Iesu e uiga ki tena mate. Kae ne leake latou me ne faipati a ia e uiga ki te moe o malōlō. Ne fai ‵tonu atu ei a Iesu ki a latou i te taimi tenā: ‘A Lasalo ko oti ne mate.’” (Ioane 11:11-14) I te fakatumaiga o Lasalo, ne toe fakafoki mai ne Iesu a ia ki te ola kae ne toe ‵nofo fakatasi mo tena kāiga. Ko se faka‵tau eiloa i te gali o te meaalofa ne tuku atu ne Iesu ki te kāiga tenā!

A toetuga kolā ne fai ne Iesu i te taimi ne nofo mai ei i te lalolagi se ata foliki fua o mea ka fai ne ia i aso mai mua e pelā me ko te Tupu o te Malo o te Atua. * I taimi o tena pulega ki te lalolagi, ka toe fakafoki mai ne Iesu mai te lagi a tino kolā ko ‵moe i te tanuga masani o tino. Tenā eiloa te pogai ne fai mai ei a ia: “Au ko te toetu.” Mafaufau la ki te fiafia ka maua ne koe māfai e toe fetaui koe mo ou tino pele kolā ko oti ne ‵mate! Mafaufau foki ki te fiafia ka maua ne tino kolā ka toe‵tu mai!​—Luka 8:56.

Ne fai atu a Iesu ki a Maleta: “Ko te tino telā e fakatuanaki mai ki a au, e tiga eiloa e mate, kae ka toe ola mai. Kae ko tino katoa kolā e ola kae e fakatuanaki mai ki a au ka se ‵mate eiloa.” (Ioane 11:25, 26) A tino kolā e toe faka‵tu aka ne Iesu i tena pulega i te afe tausaga ka maua ne ia te fakamoemoega ke ola ki te se-gata-mai​—māfai e fakatuanaki tonu latou ki a ia.

Mai tua o ana fakamatalaga ‵gali konā e uiga ki te toetuga, ne fai atu ne Iesu ki a Maleta se fesili e uiga ki ana lagonaga: “‘E a, e talitonu koe ki te mea tenei?’ Ne fai atu tou fafine ki a ia: ‘Ao, e te Aliki, au e talitonu i a koe ko te Keliso te Tama a te Atua, telā e vau ki te lalolagi.’” (Ioane 11:26, 27) Kae e a koe​—e mata, e fia ati aka ne koe se vaegā fakatuanaki ki te fakamoemoega o te toetuga e pelā mo Maleta? A te mea muamua e ‵tau o fai ko te mauaga o te iloa tonu e uiga ki te fuafuaga a te Atua mō tino. (Ioane 17:3; 1 Timoteo 2:4) E mafai o maua te fakatuanaki mai i te iloa tenā. Kaia e se fesili atu ei ki Molimau a Ieova ke fakaasi atu ne latou a mea e akoako mai i te Tusi Tapu e uiga ki te mataupu tenei? Ka fia‵fia eiloa latou ke sau‵tala mo koe e uiga ki te fakamoemoega fakaofoofogia o te toetuga.