E mata, se mea ‵lei ke fakamoemoe a Tavita ke saga fakavave atu te Atua ki a ia? E mata, e saga tonu atu te Atua ki a koe? E faigata ki tino e tokouke ke tali‵tonu me e fia saga atu te Atua malosi katoatoa ki a latou. Kaia?

A te pogai e tasi me e maluga fakafia atu a te Atua i lō tino. Mai tena tulaga maluga, a fenua katoa e fai pelā me “se motiga o te vai; a fenua ‵mao e pelā mo te ‵pefu i te māmā.” (Isaia 40:15) Ne fakaiku aka ne se tino tusitala kae ‵teke ki lotu i aso nei, me ona ko te “uiga fakamatamata, ne fai ei a tino ke tali‵tonu me i te Atua e kilokilo kae saga fakavave mai ki ‵tou mea e fai.”

I te suā feitu la, e mafau‵fau a nisi tino me e se ‵tau o saga atu te Atua ki a latou ona ko olotou amioga eiloa. E pelā mo Jim, se tagata telā e seki matua malosi, ne fai mai: “Ne ‵talo atu faeloa au mō te filemu mo te loto pulea, kae e seki leva io me se taimi mai tua ifo, ne fokifoki mai faeloa toku kaitaua. I te fakaotiga loa, ne fakaiku aka ne au me i a au ko tō masei kae ko se mafai ne te Atua o fesoasoani mai ki a au.”

E mata, ko ‵mao te Atua mai i tino telā ko se fia saga mai ei a ia ki a tatou? Ne a ana lagonaga ‵tonu e uiga ki ana tino sē ‵lei katoatoa? E aunoa mo te fakamatala mai ne te Atua a mea e uiga ki a ia, e seai eiloa se tino e ‵tau o faipati mai o sui te Atua ke tali aka ei a fesili konā. Kae ko te fekau fakaosofia mai te Atua ki tino—te Tusi Tapu—e fakatalitonu mai me i a ia e sē se Atua telā e ‵mao kae e se fia saga mai ki tino. “Kafai e ‵sala malosi latou ki a ia,” e fai mai te Tusi Tapu, “me i a ia e se ‵mao mai i a tatou taki tokotasi.” (Galuega 17:27) I mataupu e fa kolā e ‵soko mai, ka mafau‵fau tatou ki pati a te Atua e uiga ki tena saga tonu mai mo te auala ne saga tonu atu ei a ia ki tino ‵tonu e pelā mo koe.