TE POGAI E FAKALOTOLOTOLUA EI A NISI TINO: E mafau‵fau a tino e tokouke me e kilo mai fua te Atua ki tino e pelā me ne tino agasala—e se ‵ma kae e se ‵tau o saga tonu atu a ia ki ei. A Kendra, telā ne logo‵mae i te loto mafatia, ne ma‵sei ‵ki ana lagonaga me ne seki mafai o fakafetaui aka tena olaga i se auala ‵lei katoatoa ki te mea e manako ki ei te Atua. Ona ko te mea tenā, ne fai mai tou fafine: “Ne fakagata toku ‵talo atu.”

FAKAMATALAGA MAI TE TUSI TAPU: E iloa ‵lei ne Ieova a koe telā e se fia saga atu ei a ia ki tou tulaga sē ‵lei katoatoa. “E iloa ne ia a te mea ne faite ki ei tatou,” e fai mai te Tusi Tapu, “e manatua foki ne ia i a tatou ne ‵pefu.” E sili atu i ei, e se taui mai ne ia “‵tou agasala,” kae e fakamagalo ne ia tatou mo te alofa fakamagalo māfai e sala‵mo tatou.—Salamo 103:13, 14.

Mafaufau ki a Tavita, te tupu Isalaelu telā ne taku mai i te mataupu muamua o te fakasologa tenei o mataupu. I tena ‵talo ki te Atua, ne fai atu a Tavita: “Ne matea mai au ne koe ka koi tuai au o fanau. A aso katoa kolā ne fakatoka mo toku olaga, ko oti ne fakamau i tau tusi . . . Te Atua, sukesuke mai au, ke iloa ne koe oku mafaufauga.” (Salamo 139:16, 23) Ao, ne talitonu a Tavita me faitalia eiloa me ne agasala malosi a ia i nisi taimi—ne lavea ‵lei ne Ieova tena loto salamō.

E iloa ‵lei atu ne Ieova a koe i lō so se tino. “A te tagata e kilo ki te gali o te feitu ki tua,” ko muna a te Tusi Tapu, “ka ko au e kilo ki te loto o te tino.” (1 Samuelu 16:7) E iloa ‵lei ne te Atua a te pogai e fai ei koe penā—ko mea ne tuku fakasolo atu, te auala ne tupu aka ei koe, ou fakanofonofoga, mo ou uiga katoa e fesoasoani katoa ki te atiakaga o ou uiga konā. E lavea ne ia kae fakatāua ne ia a tou taumafai malosi, faitalia me e fai ne koe a mea ‵se.

Kae e fakaaoga la pefea ne te Atua a te iloa ‵lei ne ia ‘a koe’ ke fakamafanafana atu?