E seki leva kae aofia au i vaegā tafaoga fakamalosi foitino mo te sausau mea ‵mafa. Mai tua malie ifo, kae ne fakatu aka saku fale fakamalosi foitino i San Leandro, California, U.S.A., kae ne ga‵lue tasi ei au mo tino sausau mea ‵mafa, e aofia i a latou se tokotasi telā ne sili i se fakatau‵faiga ne fai i te Iunaite Sitete telā ne fano mo ia te tulaga muamua kae ne taku ei a ia ko te Mr. America. A te mauaga o se foitino tupu malosilosi kae mafi, ne seki tuku mai ne ia ki au te fiafia tonu telā ne manako au ki ei.

E isi soku taugasoa ne vau sāle ki toku fale fakamalosi foitino, ne iloa ne ia toku fia malamalama i te Tusi Tapu, telā ne fakamalosi mai ne ia ke fetaui au mo se tino telā ne iloa ne ia. I te suā aso, ne asi mai ki toku fale se Molimau a Ieova. Kae ne tali ‵tonu mai eiloa ne ia aku fesili mai te Tusi Tapu i se fa itula. Ne toe fakamolemole atu au ki a ia ke toe foki mai i te afiafi tenā, telā ne sau‵tala ei matou ki te Tusi Tapu ke oko eiloa ki te valuapo. Ne fiafia au ki aku mea ne tauloto mai te Tusi Tapu, telā ne fakamolemole atu me mafai o olo māua i te suā aso ke lavea ne au te auala e fai ei ne ia a te galuega talai. Ne ofo masei au i te auala ne fakaaoga ei ne ia tena Tusi Tapu ke tali atu ki fesili a tino. Ne fakaiku aka ne au me tenā eiloa te mea e manako au o fai!

Ne tiakina ne au taku pisinisi kae ne fakaaoga ne au oku taimi e uke ke ga‵lue fakatasi mo te paenia tenei, ko te igoa telā e tuku atu ki tino talai tumau o Molimau a Ieova. I a Me 1948, ne papatiso ei au i se fono i Cow Palace, se Fale fai tafaoga i San Francisco, i Kalefonia. Fakamuli ifo i te tausaga foki eiloa tenā, ne fai ei au mo fai se paenia.

I te taimi foki eiloa tenā, ne fakamolemole ei au ki Molimau ke asi atu ki toku matua. Ne talia ne ia kae ne fai ei a ia fakamuli mo fai se Molimau a Ieova. Faitalia eiloa a ‵tekemaiga mai ana kāiga, ne tumau eiloa tou fafine i te fakamaoni ki te Atua ke oko eiloa ki te taimi ne mate atu ei a ia i te fia o tausaga mai tua ifo. Ne seai aka foki eiloa ne tino i te motou kāiga ne fai mo fai ne Molimau.

I te 1950, ne fanatu ei au ki Grand Junction, i Colorado telā ne fetaui ei au mo Billie. Ne fanau tou fafine i te 1928 kae ne tupu aka a ia i taimi o Fakalavelave Faiga‵ta i Mea Tau Tupe i te Iunaite Sitete. Ne faitau sāle atu ne tena matua ko Minnie a te Tusi Tapu i po katoa mai te fakaaogaga o se mōlī kalasini. I te taimi ko fa ei ana tausaga, ne mafai ei ne Billie o faitau, kae ne iloa ‵lei eiloa ne ia a tala e uke i te Tusi Tapu. I tausaga talu mai i te 1940, ne iloa ne tena matua mai i ana sukesukega ki te Tusi Tapu mo Molimau me i seoli, e sē se koga o puapuaga kae ko te tanuga masani o tino. (Failauga 9:5, 10) Ne fai a Minnie mo tena avaga mo fai ne Molimau.

 I te 1949 ne foki mai a Billie i te kolisi i Boston kae ne kamata o saga faka‵lei atu ki tena sukesukega ki te Tusi Tapu. Ne fakaiku aka ne tou fafine ke tuku atu tena olaga ki te Atua i lô te fai mo fai se faiakoga. Ne papatiso eiloa tou fafine i te fono o atufenua a Molimau a Ieova i Yankee Stadium i Niu Ioki i te 1950. E seki leva kae ne fetaui mâua, avaga kae ne kamata o ga‵lue fakatasi mâua i te taviniga tumau.

Ne kamata o ga‵lue māua i Eugene, i Oregon kae ne uke ma taugasoa ne maua. I te 1953 ne olo māua o fesoasoani ki se tamā fakapotopotoga i Grants Pass, i Oregon. I te fakaotiga o te tausaga tenā, ne ‵kami māua ke aofia i te vasega 23 o Kiliata, se akoga fakamasani a Molimau mō misionale, telā ne tu pili ki South Lansing, i Niu Ioki, kāti i se 250 maila (400 km) i te feitu ki mātū o te fa‵kai o Niu Ioki.

I se lima masina mai tua o te taimi ne oti ei māua mai i Kiliata, i a Tesema i te 1954, ne olo atu māua mo Billie i se tamā vakalele ki Pasili. I se itula mai tua ifo, ne masei te masini e tasi kae ne tu faka‵lei ifo eiloa te motou vakalele i Bermuda. Mai tua o te suā fakalavelave ke tu fakavave te motou vakalele i Cuba mo te 36 itula ne faima‵laga atu ei mai konā, ne oko atu ei māua ki te ofisa lagolago o Molimau a Ieova i Rio de Janeiro, i Pasili.

Mai tua malie o te ‵nofoga i konā, ne toe olo atu māua mo Billlie ki Bauru, São Paulo, fakatasi mo nisi misionale e tokolua o ‵tala te fale misionale fou i ei. E nofo ki se 50,000 te aofaki o tino i konā kae ko matou, ko Molimau muamua ke oko atu ki ei.

Ne kamata o asi atu matou ki tino i olotou fale, kae i te taimi e tasi ne kamata o ‵teke mai ki te motou galuega a te faifeau o te Lotu Katolika i konā. Ne tautali sāle mai a ia i omotou tua o fai ki tino ke se faka‵logo mai ki a matou. I se fia fua o vaiaso, ne talia ne se kāiga lasi, telā ne suke‵suke fakatasi mo matou, a te munatonu mai te Tusi Tapu kae ne papatiso fakamuli ei latou. E seki leva, kae ne kamata foki o suke‵suke a nisi tino.

E isi se tagata e kāiga mo te kāiga telā ne papatiso, kae ko ia ko te pelesitene o se kalapu lauiloa. Ne fai ne au ne fakatokaga ke fakaaoga te lotou koga ta‵fao ke fai ei se fono. Ne fakatonu atu te faifeau i te koga tenā ke taofi, kae ko te pelesitene o te kalapu tenā ne fai atu ki te lotou potukau penei: “Kafai e taofi ne koutou, ko au ka lisaina!” Tenā, ne talia eiloa ke fai te motou fono.

I te tausaga mai tua i ei, i te 1956 ne ‵kami māua ke ‵kau atu ki te fono o te atufenua telā ne fai i Santos, i São Paulo. Toeitiiti kae kātoa te 40 o tino mai te motou fakapotopotoga ne olo atu i te tuleini ki konā. I te ‵toe ‵fokiatuga o māua ki Bauru, ne maua ne au se tusi i te meli e uiga ki toku ‵tofi aka mo fai se ovasia faimalaga ke asi atu ki fakapotopotoga o Molimau a Ieova. Ne kamata ei o ga‵lue māua i Pasili i tausaga toeititi kae kātoa te 25, kae fai‵malaga atu ki te ukega o koga i te fenua lasi tenā.

Ne tai faigata eiloa te faimalaga i aso konā. Kāti ne soko i a māua a te fenua kātoa e auala i te faimalaga atu i pasi, tuleini, kā kolā e ‵taki, pasika-ta-ki-vae mo te sa‵sale foki. A te fakai muamua ne asi māua ki ei ko Jaú, i São Paulo. Ne ‵teke mai a te faifeau ki a māua i konā.

“E se mafai ne koulua o talai ki ‘aku mamoe!’” ne fakatonu mai a ia.

Ne tali atu maua: “E se i a koe a mamoe, kae i a te Atua.”

Ne fai se motou fakatokaga ke fakaasi atu se tamunei e uiga ki te faiga o te motou galuega talai i te lalolagi kātoa telā e fakaulutala penei, The New World Society in Action, kae ko te faifeau ne fakatu aka ne ia se potukau o tino ke taua mai ki a matou. Ne fakailoa fakavave atu ne matou te mea tenā ki pulisimani. I te taimi ne oko atu ei a te faifeau mo tena potukau ki te koga e pei ei te ata, ne fetaui latou mo pulisimani e ‵tu atu mo fana. Ne fiafia ‵ki a tino maimoa ki te ata.

Toeitiiti ko koga katoa ne ga‵lue māua i ei, ne ‵pau  eiloa te takalialia mo te ‵teke mai o lotu. E pelā mo Brusque, telā e pili ki Blumenau, i Santa Catarina, ne fetaui māua mo paenia e tokolua, kolā ne tavini atu i konā mai lalo i ‵tekemaiga faiga‵ta. Kae ne fakamanuiagina malosi eiloa te kufaki mo te loto mau o lāua. I se 50 tupu tausaga fakamuli nei, ko silia atu nei i te 60 o fakapotopotoga i te koga tenā fakatasi foki mo se fale fai Fono gali i se fakai pili mai i Itajaí!

A toe taimi ‵gali i te ma galuega faima‵laga ko taimi kolā e fakamāumāu fakatasi mo Molimau ke fai a fakatokatokaga mō fono ‵lasi. I tausaga talu mai te 1970, ne maua ne au se tauliaga ke fai mo ovasia o te fono i te Koga Fai Tafaoga i Morumbi. Ne fakamolemole atu ki fakapotopotoga takitasi e nofo ki te selau i koga tai ‵pili mai, ke tuku mai aka ne tino e toko sefulu ke fesoasoani i te ‵fuluga o te koga fai tafaoga tenā i te po mai mua o te fono.

I te taimi ne tiakina ei ne tino tafao te koga tenā, ne lagona ne matou a nisi tino mai i a latou ne fakatauemu mai, “‵Kilo atu la ki tamā fafine mo olotou teu mo mopu.” Kae i te valuapo tenā, ne ‵ma pakipaki ei te koga tafao! Ne fai mai penei mo te ofo a te pule o te koga tafao tenā, “E nofo loa ki se vaiaso kātoa a te leva e mafai ei o fai ne taku kau ga‵lue a mea kolā ne fai ne koutou Molimau i nāi itula!”

Ne mate atu toku tamana i te 1980, kae seki leva foki kae olo atu māua ki te Iunaite Sitete o tausi toku matua, i Fremont, i Kalefonia. Ne ga‵lue māua i te ‵fuluga o fale ‵lasi i po, kae ne tumau māua i te paenia o fesoasoani atu ki tino Potukale i te kogā koga tenā. Fakamuli ifo, ne olo atu māua ki se koga pili mai i San Joaquin Valley, kae ne ‵sala atu māua ki tino e fai‵pati i te ‵gana Potukale mai i Sacramento ke oko ki Bakersfield. Nei la, ko nofo loa ki se sefulu o fakapotopotoga e fai‵pati ki te ‵gana Potukale i Kalefonia.

Mai tua o te matega a toku matua i te 1995, ne olo atu māua ki Florida o tausi te tamana o Billie ke oko loa ki te taimi ne mate i ei. Ne mate tena matua i te 1975. I te 2000, ne olo atu māua ki se fenua telā e ‵tu ana koga lavaki i se koga maluga kae e tu i te feitu ki saute o Colorado, kae ne ga‵lue eiloa māua i te taviniga tumau o talai atu ki tino muamua o Amelika i kogā koga o te Navajo mo Ute. Se mea fakafanoanoa me ne mate atu a Billie i a Fepuali, 2014.

Ko oko eiloa i toku fiafia me ne fetaui au mo se tokotasi o Molimai a Ieova i se 65 tausaga ko ‵teka, telā ne tali ‵tonu mai ne ia aku fesili mai te Tusi Tapu! Ne fiafia malosi foki au me ne taumafai au o fakamautinoa aka me i ana pati e fakavae eiloa ki mea kolā e akoako mai ne te Tusi Tapu. Ne iku atu eiloa ki te mauaga ne au se olaga manuia i te taviniga ki te Atua.