“Tenā, tuku ei ne te Aliki te Atua te tagata ke nofo i te Fatoaga o Etena, o galue te laukele i ei kae tausi faka‵lei. Muna a te Atua ki te tagata, ‘E mafai ne koe o kai a fuaga o so se lakau i loto i te fatoaga, kae tapu koe e kai ki fuaga o te lakau telā e fai ne ia te tino ke iloa te ‵lei mo te masei. E se ‵tau eiloa mo koe o kai ki fuaga o te lakau tenā, me kafai e kai koe ki ei, a koe e mate eiloa i te taimi tenā.’”—Kenese 2:15-17.

Ne tuku atu ne te Atua te tagata muamua ko Atamu ki loto i te fatoaga ko Etena, se lalolagi palataiso telā e ‵fonu i vaegā manu mo lakau ‵gali kese‵kese. E uke a lakau kaina kolā e mafai o kai ki ei Atamu. Kae ne fakatonu atu a Ieova te Atua ki a Atamu ke tapu e kai a ia ki te lakau telā ne fakatapu i ei, me kafai e kai a Atamu ki ei ko ia ka mate.

E mata, ne malamalama o Atamu i te fakatapuga tenei? E iloa ne tou tagata a te uiga o te mate; ne lavea ne ia a manu e ‵mate. Moi ne fai ne faite ne te Atua a Atamu ke mafai o mate, ko tena uiga e seai se aoga o te fakamasauaga telā ne tuku atu ne te Atua. Kae tigā te feitu tenā, ne iloa ne Atamu me kafai e fakalogo a ia ki te Atua mai i te se kai ki te lakau tenā, ka ola eiloa a ia ki te se-gata-mai—kae se mafai o mate.

E isi ne nisi tino e mafau‵fau me e fakatusa eiloa te lakau tenā ki faifaiga fakatauavaga, kae e se mafai eiloa o fakauiga ki te mea tenā. I te otiga o mea katoa, ne manako a Ieova ko Atamu mo tena avaga ko Eva, ke fakatokouke a lā “tamaliki ko te mea ko otou fanau ke ‵nofo i te lalolagi kae pule i ei.” (Kenese 1:28) E fakasino atu eiloa a te fakatapuga tenā ki se lakau tonu eiloa. Ne taku ne Ieova ki te “lakau o te ola mo te lakau telā e iloa ei te mea ‵lei mo te mea masei,” me e sui mai ne te lakau tenā a te aia o Ieova, telā e iloa ei te mea ‵lei mo te mea masei mō tino. Moi se kai Atamu ki te fuaga o te lakau tenā, ko fakaasi atu ei ne ia tena fakalogo mo tena loto fiafia ki te Tino ne faite kae fakamanuia atu ki a ia.

“Kae ne fai atu te Aliki te Atua ki te tagata penei, ‘A koe ne . . . kai ki te fuagālakau telā ne fakatapu ne au, . . . koe ka galue malosi kae tau‵ta, kae faatoa maua ne au meakai mai te laukele, ke oko eiloa ki te taimi e toe foki ei koe ki te laukele telā ne mafua mai ei koe. A koe ne faite mai te laukele kae ka toe foki eiloa koe ki te laukele.’”—Kenese 3:17, 19.

 Ne kai Atamu ki te lakau telā ne fakatapu a ia i ei. Ne ‵mafa ‵ki te tulaga se fakalogo telā ne oko ki ei tou tagata. Ko ‵teke tonu atu eiloa tou tagata, se fakaasiga o te se amanaia ki mea ‵lei katoa ne fai ne Ieova mō ia. Mai i te kai ki te fuagālakau tenā, ne ‵teke tonu atu eiloa a Atamu ki a Ieova, mai te fili aka ke tu tokotasi a ia mai te Atua, telā se ma‵tugā fakalavelave lasi eiloa ne iku mai ei.

E pelā mo te mea ne folafola mai ne Ieova, ne mate eiloa a Atamu. Ne faite ne te Atua a Atamu “mai i te laukele” kae fai atu me ka ‘toe foki atu eiloa a ia ki te laukele.’ Ne seki toe ola a Atamu i se tulaga io me se koga fakaa‵tea. I te matega, ne oti atu foki eiloa i ei tena ola e pelā eiloa mo te ‵pefu telā ne faite tou tagata mai i ei.—Kenese 2:7; Failauga 9:5, 10.

“Ne oko mai ei te agasala ki te lalolagi e auala i te tagata e tokotasi, a ko te mate e auala i te agasala, kae ne faka‵solo atu a te mate ki tino katoa me ko agasala a latou katoa.”—Loma 5:12.

A te sē fakalogo o Atamu—io me ko te agasala—e uke ‵ki ana pokotiaga. I te agasala tenā, ne galo atu ei te ola i a Atamu, e se ko te ola masani telā ko te 70 io me ko te 80 tausaga, kae ko te ola ki te se-gata-mai. E se gata i ei, i te taimi ne agasala ei a Atamu, ne galo atu i a ia te tulaga ‵lei katoatoa kae tuku mai fua ki ana tama a te tulaga se ‵lei katoatoa.

A tatou katoa ne ‵mai i te gafa o Atamu. E auala i a ia, ne seki mafai ei o fai se filifiliga i a tatou eiloa, kae na ko te tau‵tali atu fua o tataou i te foitino se ‵lei katoatoa telā e iku atu ki te agasala mo te mate. Ne fakamatala faka‵lei mai ne Paulo a ‵tou tulaga se ‵lei tenei. Ne tusi mai a ia: “A ko au se tagata faka-te-foitino, telā ne fakatau atu mo fai te pologa a te agasala. Ko oko eiloa i toku fakaalofa! Ko oi la ka fakasao ne ia au mai te foitino telā e takitaki ne ia au ki te mate tenei?” Ne toe tali mai eiloa ne Paulo a tena fesili: “Fakafetai ki te Atua e auala i a Iesu Keliso te ‵tou Aliki!”—Loma 7:14, 24, 25.

“Ne uga mai ne te Atua tena Tama ke fai mo fai te Fakaola o te lalolagi.”—1 Ioane 4:14.

 Ne fakatoka ne Ieova te Atua se faka‵leiga ki ikuga se ‵lei o te agasala kae fakasaoloto foki a tatou mai te ‵nofo pologa ki te mate. E pefea la? Ne uga mai ne ia tena Tama fakagasele mai te lagi ke fanau mai e pelā me se tino ‵lei katoatoa e pelā mo Atamu. Kae e ‵kese mai i a Atamu, a Iesu e “seai sena agasala ne fai.” (1 Petelu 2:22) Ona ko ia se tino ‵lei katoatoa, ne seki aofia a ia i lalo i te nofo pologa ki te mate kae ne mafai foki eiloa o ola a ia e pelā me se tino ‵lei katoatoa ki te se-gata-mai.

Kae tiga te feitu tenā, ne talia ne Ieova ke tamate a Iesu ne ana fili. I te tolu aso mai tua, ne toe fakatu aka ne Ieova a tou tagata ki se foitino faka-te-agaga ko te mea ke mafai o toe foki atu ki luga i te lagi i te taimi tonu. I konā, ne tuku atu ei ne Iesu a te tulaga o tena foitino ‵lei katoatoa e pelā me se mea e ‵togi ki ei a te ola ‵lei katoatoa, telā ne galo atu i a Atamu mo ana tama‵liki. Ne talia ne Ieova te taulaga tenā, ke tuku atu ei a te ola se-gata-mai ki so se tino telā e fakatuanaki ki a Iesu.—Loma 3:23, 24; 1 Ioane 2:2.

Ne toe ‵togi mai ne Iesu a te mea telā ne galo i a Atamu. Ne mate tigaina a ia ko te mea ke mafai o ola tatou ki te se-gata-mai. E fai mai te Tusi Tapu me i a Iesu ne logo‵mae i te “mate, ko te mea ke tami a ia ki te mate mō tino katoa e auala i te alofa tauanoa o te Atua.”—Epelu 2:9.

I te fakatokaga tenei, e fakaasi mai ei a mea e uke e uiga ki a Ieova. A te maluga o tena tulaga amiotonu ne fai ei ke faigata ki tino se ‵lei katoatoa o fakasaoloto a latou eiloa. Kae ona ko tena alofa mo te loto fakamagalo, ne gasuesue ei a Ia o fakataunu tena manakoga mai te fakatokaga o se ‵togi lasi ‵ki— telā ko te tukumaiga o tena Tama ke ‵togi ki ei te mea telā ne galo.—Loma 5:6-8.

“Ne toe fakatu aka a Keliso mai te mate, ko te fuataga muamua o latou kolā ko oti ne ‵moe i te mate. Me ona ko te mate ne oko mai e auala i se tagata e tokotasi, ne oko mai foki a te toetu e auala i se tagata e tokotasi. Me e pelā eiloa mo te ‵mate o tino katoa i a Atamu, e penā foki te ‵toe fakaola mai o tino katoa e auala i te Keliso.”—1 Kolinito 15:20-22.

E mautinoa eiloa me i a Iesu ne ola kae mate, kae se a te fakamaoniga me ne toe fakatu aka a ia mai te mate? E aofia i fakamaoniga konā e uiga ki te toetu o Iesu, ko te fakasaeatuga o tou tagata ki tino e tokouke, i fakanofonofoga mo koga kese‵kese. Ne fakasae atu a ia ki tino e silia atu mo te 500. Ne tusi mai te apositolo ko Paulo i tena tusi ki te kau Kolinito, ne fakaasi mai ne ia me e isi ne tino kolā ne molimau ki te mea tenei koi ola, kae e mafai ne latou o molimau atu e uiga ki mea ne lavea kae lagona ne latou i te taimi tenā.—1 Kolinito 15:3-8.

Se mea tāua ‵ki me ne tusi mai a Paulo me i a Iesu ko te “fuataga muamua” o latou kolā ne toe faka‵tu aka, e fakaasi mai ei me ka toe faka‵tu mai foki a nisi tino. E fai mai a Iesu me e isi se taimi a “tino katoa kolā e i loto i tanuga” ka “ulu mai ki tua.”—Ioane 5:28, 29.

“Ona ko te lasi o te alofa o te Atua ki te lalolagi ne tuku mai ei ne ia tena Tama fagasele e tokotasi, ko te mea ke se fakaseai atu so se tino e fakatuanaki ki a ia kae ke maua ne ia te ola se-gata-mai.”—Ioane 3:16.

 A itulau muamua o te Tusi Tapu e fakamatala mai ei te kamataga o isi se mate mo te galoatuga o te Palataiso. Kae ko itulau fakaoti, e fakamatala mai ei te taimi ka fakaseai atu te mate mo te ‵toe fakafokimaiga ne te Atua a te lalolagi Palataiso ki te lalolagi nei. Ka mafai ei o ola fiafia a tino katoa ki te se-gata-mai. E fai mai te Fakaasiga 21:4: “Ka se toe ai se mate.” Ke fakamautinoa aka a pati i te tautoga tenā, e toe fai mai te fuaiupu e 5: “E fakamaoni kae ‵tonu a pati konei.” So se mea telā ne tauto mai ki ei a Ieova, ka taunu eiloa.

E mata, e talitonu koe me e “fakamaoni kae ‵tonu” a pati konei ne tusi ki lalo? Ke tauloto ki mea e uke atu e uiga ki a Iesu Keliso kae ke fakatuanaki ki a ia. Kafai e fai koe penā, ka maua ei ne koe a te taliaga a Ieova. Ka se maua fua ne koe a tena fakamanuiaga nei, kae ka maua foki ne koe a te fakamoemoega ke ola ki te se-gata-mai i te lalolagi Palataiso, telā ka se toe ai se “mate i ei, ka se toe ai foki se fanoanoa, se tagi io me se ‵mae. Ko palele atu a mea mua.”