“Mai tua o te fanaifoga o te malosi o te tupe i te motou fenua, ne gasolo aka o ‵togi ‵mafa kae mu‵tana a meakai,” ko pati a Paul, se avaga kae se tamana o tama‵liki e tokolua. “E ‵tu atu matou i te laina loa mō se fia o itula, kae e masani sāle o palele atu a meakai māfai ko oko atu matou ki mua i te laina. Ko pā‵ka fakaatea a tino ona ko te fia‵kai, kae mata‵po a nisi tino i te auala. Ko fanaka loa ki luga mai te fia miliona ki te fia piliona a te ‵togi o mea e manakogina mō te olaga. Fakamuli loa, ne seki toe aoga te tupe a matou. Ne fakaseai atu ei toku akauni i te pagike, i te kamupane fakaleoleo, mo taku tupe maua i masina katoa.”

Ne iloa ne Paul me e ‵tau o fakagalue faka‵lei ne ia a te “poto mo te atamai” ko te mea ke mafai o tausi atu ki tena kāiga. (Faataoto 3:21) Ne fakamatala mai tou tagata: “Ne galue fakafeagaiga au i mea tau iti, kae ne fai ne au so se galuega telā e mafai o maua ne au, i se ‵togi telā e sili atu te malalo i lō te ‵togi masani. E ‵togi ne nisi tino au ki meakai io me ko meāfale. Kafai ne ‵togi au ki potu sopu e fa, e fakaaoga ne au e lua kae ‵togi atu e lua ki nisi tino. Fakamuli loa, ne maua ne au a moa e 40. I te taimi ko ‵lasi ei, ne ‵togi atu ne au kae toe ‵togi mai a nisi moa e 300. Fakamuli ifo, ne sui ne au a moa e 50 ki taga saito e lua kolā e 110 pauni (50 ‵kilo). Mai taga konā, ne fagai ei ne au toku kāiga mo nisi kāiga mō se taimi leva ‵ki.”

Ne iloa foki ne Paul me i te ‵toe mea ‵lei e mafai ne so se tino o fai ko te talitonu ki te Atua. Kafai e fai ne tatou a mea e fakatonu mai ne te Atua, e fesoasoani mai a ia ki a tatou. Ne fai mai a Iesu e uiga ki te tausiga o te olaga: “Fakagata foki te sona manava‵se, me . . . e iloa ne te otou Tamana me e ‵tau o maua ne koutou a mea konei.”—Luka 12:29-31.

Se mea fakafanoanoa, me ne fakaloiloi ne te fili sili o te Atua, ko Satani a te tokoukega o tino i te lalolagi ke fakavae olotou olaga ki te manavase ki mea faka-te-foitino. E manava‵se malosi a tino e uiga ki mea e ‵tau o maua, mea e manakogina mo mea e mafau‵fau fua ki ei, kae taumafai mo te manavase ke maua a mea kolā e se manakogina tonu ne latou. E fai ne tino e tokouke a kaitalafu e uke, kae tauloto latou i te auala faigata ki te manatu me “kafai e kaitalafu ne koe ne tupe mai i se tino, ko tena uiga a  koe ko pologa i te tino ne kaitalafu koe i ei.”—Faataoto 22:7.

E fai ne nisi tino a fakaikuga fakalogo‵mae. E fai mai a Paul: “E tiakina ne tuakoi e tokouke olotou kāiga mo olotou taugasoa ke olo atu o ‘‵sala manuia’ i fenua ‵lasi. E olo atu a nisi tino e aunoa mo te fai faka‵leiga o olotou pepa oloolo malaga kae ne seki mafai o ga‵lue latou. Ne iku atu ki te ‵muni sāle o latou mai i pulisimani kae ‵moe foki i auala. Ne seki tuku atu ne latou se avanoaga ki te Atua ke fesoasoani atu ki a latou. Kae ko oti ne fakaiku aka ne matou ke fakafesagai fakatasi atu matou ki fakalavelave i mea tau tupe e pelā me se kāiga, mo te fesoasoani foki o te Atua.”

Ne toe fai mai a Paul: “Ne fai mai a Iesu: ‘ke mo a e manava‵se koutou ki te aso ma taeao, me e manavase loa te aso ma taeao ki ana mea. Me e tofu eiloa te aso mo ana fakalavelave.’ Tela la, a te mea faigofie telā e ‵talo atu ki ei i aso katoa ko te Atua ke ‘tuku mai omotou meakai e ‵tau mō te aso nei’ ko te mea ke mafai o ola matou. Kae ne fesoasoani mai eiloa a ia, e pelā eiloa mo te folafolaga a Iesu. Ne seki maua faeloa ne matou a te mea muamua ne ma‵nako matou ki ei. I te taimi e tasi, ne tu atu au i te laina i te sitoa e aunoa mo te iloa atu me ne a mea e ‵togi i ei. I te taimi ne oko atu au ki te koga i mua, ne lavea ne au a yogurt. E se fiafia au ki te yogurt. Kae se meakai, telā ne ‵kai matou ki ei i te po tenā. Ne lasi ‵ki toku loto fakafetai ki te Atua i te vaitaimi kātoa tenā, me ne seki ‵moe fia‵kai aka eiloa toku kāiga.” *

“Ko gasolo o feoloolo matou i mea tau tupe i te vaitaimi tenei. Kae ne tauloto ne matou a te ‵toe faka‵leiga tāua ki te manavase i te motou olaga, ko te talitonu ki te Atua. Ka fesoasoani mai faeloa a Ieova * ki a tatou māfai e tumau tatou i te taumafai ke fai tena loto. Ko oti ne lavea ne matou a te ‵tonu o te Salamo 34:8: ‘Mafaufau ake la koe ki te lasi o te aga‵lei o te Aliki. Amutia latou kolā e faka‵lafi atu ki a ia.’ Ne iku atu ei ki te sē toe ma‵taku o matou i te fakafesagai atu ki tulaga faiga‵ta i mea tau tupe.

“Ko malamalama ‵lei nei matou me i te mea telā e manakogina ke ‵sao a tino, e se ko te galuega ‵togi io me ko tupe, kae ko meakai. E faka‵tali eiloa matou mo te olioli ki te taimi ka fakataunu ei te folafolaga a te Atua: ‘Ke fakamaumea te fenua i saito.’ I te vaitaimi tenei, ‘kafai ko maua a ‵tou meakai mo ‵tou gatu, ke lotoma‵lie eiloa tatou i ei.’ E maua ne tatou a fakamalosiga mai i pati i te Tusi Tapu: ‘Ke ‵kalo keatea mai te fakavale‵vale ki tupe i otou olaga kae ke lotoma‵lie ki mea ko maua ne koutou. Me ko oti ne fai mai a ia: “Ka se tiaki lele ne au a koutou kae ka se tuku tiaki lele ne au a koutou.” Ko te mea ke loto ‵toa tatou o fai aka penei: “A Ieova ko toku fesoasoani, ka se mataku lele au.”’” *

E manakogina a te fakatuanaki tonu ke ‘‵nofo fakatasi mo te Atua’ e pelā mo mea ne fai ne Paul mo tena kāiga. (Kenese 6:9) Faitalia me ko fe‵paki nei tatou mo se fakalavelave i mea tau tupe io me i aso mai mua nei, e tuku mai eiloa ne te fakaakoakoga o te fakatuanaki mo te poto aoga o Paul a akoakoga tāua mō tatou.

Kae e a māfai e fai ne fakalavelave i te kāiga ke manava‵se tatou?