Ne fanau au i se tamā fa‵kai i Polani, e se ‵mao mai i te tuakoi ki Siamani. Ona ko te ‵nofo atu i koga e tausi i ei a lafu manu mo togavao, ne maua eiloa ne au se olaga filemu. Ne fakamalosi mai oku matua ke ola au i se olaga ‵lei, kae ke taumafai ki se galuega ‵togi ‵lei.

Ne kamata eiloa oku fakalavelave i te taimi ne fanatu ei au o akoga i mea tau tulafono i se iunivesiti i te fa‵kai o Wrocław. I te nofo ‵mao atu mai i oku matua, ne filifili aka ne au a taugasoa fakama‵taku. Ne fiafia faeloa au ki te futipolo, kae mai i fakamalosiga a oku taugasoa ‵fou, ne kamata ei o momea aka toku fakavalevale ki ei. A te tīmu telā e fiafia malosi au ki ei ko te tīmu mai Warsaw, kae i fakaotiga o vaiaso ne fanatu faeloa au ki so se koga ne ta‵fao ei latou. Ne aofia i malaga konā a te inu malosi, te fakaaogaga o vailakau tapu, mo te ‵fusu sāle i nisi taimi mo tino kolā e ‵kau ki te suā tīmu. Ne kilo atu au ki ei e pelā me se auala ke fakamāmā aka a mea kolā e manavase ki ei i te olaga i aso katoa, faitalia me e iloa ne au me kafai ko puke au ne pulisimani, e mafai o fakamasei ei toku kausaki atu ki taku taulotoga i mea tau tulafono.

E fia‵fia matou mo oku taugasoa o olo atu ki koga inu mo fale tuisi. I konā, ne masani o aofia matou i fusuga i auala. Ne puke au ne pulisimani i taimi e uke, kae ne mafai faeloa o ‵kalo keatea mai i te taia malosi i te tulafono—i nisi taimi e auala i te tuku atu o se ‵togi fakakolekole. Ne mafaufau au me ne fiafia katoatoa au i toku olaga. Kae i toku ‵kanoloto tonu eiloa, ne iloa ‵lei ne au me e ‵se a mea kolā e fai ne au. Ne fanatu au ki lotu i Aso Sa katoa i te taumafai ke tai faka‵lei aka toku loto lagona.

I te 2004, ne tukituki mai se avā Molimau i toku mataloa, kae ne talia ne au ke sau‵tala matou ki te Tusi Tapu. I te taimi ne tauloto ei ne au a mea e uke atu ki te uiga o te fai mo fai se Kelisiano tonu, ne kamata o fakalavelave mai toku loto lagona. Ne iloa ne au me e ‵tau o taofi taku inu malosi, te fakaaogaga o vailakau tapu, mo te kau atu ki tino kolā e se ola e ‵tusa mo tulaga faka-te-Tusi Tapu. Ne iloa foki ne au me e ‵tau o ‵fuli toku uiga kaitaua kae saua. E tiga eiloa ne iloa ne au a mea ne ‵tau o fai ne au, ne tumau eiloa toku fanatu i te auala ‵se.

Ne kamata au o ‵fuli i te taimi ne fusu ei au ki tāgata e tokovalu. Ne masaua ne au te taimi ne takato ei au i te auala, kae fusufusu kae tapatapa toku ulu. Ona ko te mafaufau me ko pili atu au ki te mate, ne ‵talo atu au: “Fakatoese atu au, e Ieova, mō te sē fakatāua malosi ne au tau Muna. Kafai e sao atu au, e tauto atu au me ka sukesuke eiloa au ki te Tusi Tapu mo  Molimau kae ‵fuli toku olaga.” Ne ofo au me ne sao au. Ne tausi eiloa ne au taku tautoga ke sukesuke ki te Tusi Tapu.

I te 2006, ne fanatu au ki Egelani. Ne fakamoemoe au ke ‵teu ne aku tupe e uke kae toe foki atu ki Polani ke toe taumafai ki se tikulī tai maluga atu i mea tau tulafono. I te taimi ne tumau ei au i taku sukesukega ki te Tusi Tapu, ne lasi eiloa te fakamalosiga a te tusi siki e tasi ki a au. Ne tusi mai a te apositolo ko Paulo: “E mafaufau foki au me ko se aoga a mea katoa ona ko te sili atu o te aoga o toku iloa e uiga ki a Keliso Iesu, toku Aliki. Ona ko ia ko talia ei ne au ke ‵galo atu a mea katoa kae ke kilo atu foki ki ei e pelā me ne kaiga ko oko eiloa i te uke, ko te mea ke maua ne au a Keliso.” (Filipi 3:8) E pelā mo au, ne maua ne te apositolo ko Paulo a akoakoga i mea tau tulafono—kae ne fai foki a ia mo fai se tagata amio fakasaua. (Galuega 8:3) Kae ne lavea ne ia me e isi foki se auala e tai ‵lei atu: ko te tavini atu ki te Atua mo te faiga o te ‵toe mea e mafai ne ia ke fakaakoako atu ki a Iesu. Kafai e mafau‵fau ‵loto au ki te fakaakoakoga a Paulo, ne iloa ne au me i te mauaga o se galuega ‵togi ‵lei mo amioga fakasaua e se ko kī ki te fiafia. Ne kamata o maua ne au te loto talitonu me kafai ne mafai o ‵fuli a Paulo, e mafai foki o ‵fuli au. Tela la, ne fakaiku aka ne au ke nofo loa i Egelani kae fakapuli atu toku kausaki ki se tikulī tai maluga i mea tau tulafono.

Ko te momea aka o taku taulotoga ki a Ieova, ko te momea aka foki o toku pili atu ki a ia. Ne otia toku loto i tena folafolaga ke fakamagalo ne ia a latou kolā e ma‵nako tonu ke fai a ‵fuliga. (Galuega 2:38) Kae i te taimi ne mafaufau ‵loto ei au ki te 1 Ioane 4:16, telā e fai mai me i te “Atua ko te alofa eiloa,” ne kamata ei o malamalama au i te pogai e takalialia ei a te Atua ki amioga fakasaua.

Ne ofo foki au i amioga ‵lei a te kau Molimau. Ne iloa ‵lei ne au me ne taumafai latou o ola e ‵tusa mo tulaga ma‵luga i te Tusi Tapu i mea tau amioga. Ne manako au ke fai mo fai se vaega o te kautaina fiafia telā e maua ne latou. Mai tua o nisi taumafaiga e uke mo fakamafulifuliga i toku olaga, ne papatiso ei au e pelā me se Molimau a Ieova i te 2008.

Ko oti eiloa au ne ‵fuli ne te Tusi Tapu mai i se tino uiga fakataufai, fakasaua, fakaaoga ‵se o vailakau tapu, inu malosi, kae fakavalevale ki te futipolo, ki se tavini a te Atua telā ko akoako atu ne ia a nisi tino e uiga ki te Tusi Tapu. Koi onoono eiloa au ki te futipolo, kae ne fakaiku aka ne au ke fakatumau eiloa a vaegā fakafiafiaga penā i tena tulaga tonu.

Ko avaga nei au mo te fiafia ki a Esther, se tino tapuaki matagali a Ieova. E maua ne māua te fiafia tonu i te akoako atu o te Tusi Tapu ki tino kolā e fai‵pati i te ‵gana Polani i te feitu ki matū-togala o Egelani. Ne fatoa maua ne au a te lotomalie tonu mō te taimi muamua eiloa. Ko ‵ma toku loto lagona kae ko maua foki ne au se olaga fiafia kae aoga.