Mafaufau me ko fanatu koe ki se fenua fou mō te taimi muamua. Ka fetaui eiloa koe mo tino, tuu mo aganuu, mea‵kai, mo tupe kolā e se masani koe ki ei. E mafai eiloa o fanoanoa koe.

Ka penā foki eiloa ou lagonaga māfai ko faitau koe ki te Tusi Tapu i te taimi muamua. Ko pelā eiloa me nofo atu koe i se lalolagi i aso mua telā e fou ‵ki ki a koe. I konā, ka fetaui koe mo tino Filisitia, ko faifaiga ki te ‘saesaega o gatu,’ io me tauloto koe ki te meakai e igoa ki te manai mo te tupe siliva telā e taku foki ki te drachma. (Esoto 16:31; Iosua 13:2; 2 Samuelu 3:31; Luka 15:9) E mafai eiloa o faka‵numi atu a mea katoa konei. E pelā mo te fanatu o koe ki se fenua fou, e mata e se fiafia koe ke maua se fesoasoani mai se tino telā e mafai o fakamatala atu a mea ki a koe?

Talu mai te taimi ne tusi ei a tusitusiga tapu i te 16 senitenali T.L.M., ne maua eiloa se fesoasoani mō tino ke malamalama i tusitusiga konā. E pelā mo Mose, te takitaki muamua o te fenua ko Isalaelu, ne ‘kamata o akoako’ atu ne ia a tusitusiga konā.—Teutelonome 1:5.

I te sefulu senitenali mai tua ifo, koi ola eiloa a nisi faiakoga ‵poto i te Tusi Tapu. I te 455 T.L.M., e tokouke a tino Iutaia ne maopoopo fakatasi mo olotou tama‵liki i se koga fai fono i te fa‵kai o Ielusalema. Ne ‵nofo atu i konā a faiakoga o te Tusi Tapu kae ne ‘faitau atu ne latou a te tusi [eiloa tenā].’ Kae ne uke atu olotou mea ne fai. Ne “fakamalamalama atu foki [ne] latou ke malama‵lama” i mea ne faitau.—Neemia 8:1-8.

I te lima senitenali mai tua ifo, ne aofia a Iesu i se vaegā galuega penā i te faiga o akoakoga. A te ‵tonuga loa, ne lauiloa eiloa a ia i tino e pelā me se faiakoga. (Ioane 13:13) Ne akoako atu ne ia a vaitino e tokouke penā foki mo tino taki tokotasi. I se taimi e tasi, ne faipati atu a ia ki se vaitino tokouke, mai te faiatuga o tena Lāuga takutakua i luga i te Mauga, kae “ne ofo masei te vaitino i ana akoakoga.” (Mataio 5:1, 2; 7:28) I te tau e ‵somo aka ei a lau o lakau i te 33 T.A., ne faipati atu a Iesu ki ana soko e tokolua i te taimi ne sa‵sale atu ei latou i te auala ki se fa‵kai e pili atu ki Ielusalema, kae “ne fakamaina faka‵lei [atu] ei ne ia a Tusitusiga Tapu” ki a lāua.—Luka 24:13-15, 27, 32.

Ne fai foki a soko o Iesu mo fai ne faiakoga o te Muna a te Atua. I se taimi e tasi, ne faitau se ofisa Aitiope ki se tusi i te Tusi Tapu. Ne fanatu se soko e igoa ki a Filipo kae fesili atu: “E malamalama koe i au mea e faitau?” Ne tali atu te Aitiope: “E mafai pefea o malamalama au, māfai e seai se tino e fesoasoani mai ki a au?” Ne fakamatala atu ei ne Filipo a te uiga o te tusi tenā ki a ia.—Galuega 8:27-35.

E pelā mo faiakoga mo tino fakatonutonu o te Tusi Tapu i aso mua, e fai ne Molimau a Ieova i aso nei a te galuega ko te faiga o akoakoga faka-te-Tusi Tapu i fenua e 239 i te lalolagi kātoa. (Mataio 28:19, 20) I vaiaso takitasi, e fesoasoani atu latou ki tino taki tokotasi kolā e silia atu i te iva miliona ke malamalama i te Tusi Tapu. E tokouke mai i tino konā e seki ‵tupu aka e pelā me ne Kelisiano. E seai se ‵togi o akoga konei kae e mafai o fai i te fale o te tino io me se koga telā e ‵lei ki a ia. E isi foki ne tino e fia‵fia ke fai olotou akoga i luga i telefoni io me e auala i polokalame sē ‵togi i te itaneti, te fakaaoga o se komupiuta io me se selefoni.

Fakamolemole ke fesokotaki atu ki se tokotasi o Molimau a Ieova ke maua a fakamatalaga ki te auala e mafai o aoga ki a koe te fakatokaga tenei. Ka mafai o iloa ne koe me i te Tusi Tapu se tusi telā e mafai o malamalama i ei, kae “aoga ki te akoako atu, ki te faiga o polopolokiga, ki te fakatonutonuga o mea ‵se, mo te faiga o polopolokiga i te amiotonu,” ko te mea ke maua ne koe ‘te poto ‵lei, kae toka ‵lei mō te faiga o galuega ‵lei katoa.’—2 Timoteo 3:16, 17.