Ne fanau au i Paddington, se kogā koga i Lonitona, i Egelani, telā e tokouke ‵ki a tino e ‵nofo i ei. Ne ‵nofo au mo toku mātua mo oku taina ma‵tua e tokotolu. Ne galogalo sāle te motou tamana i omotou olaga ona ko tena inu kava.

I taku folikiga, ne akoako au ne toku mātua ke ‵talo atu i po katoa. E isi saku tamā Tusi Tapu, telā ne aofia fua i ei a te tusi o Salamo, kae ne ‵fatu ne au a pese ki ei ko te mea ke mafai o usu atu ne au. E masaua ne au se fuaiupu ne faitau ne au i se tusi e tasi, telā ne ‵piki ‵mau i toku mafaufau: “I se aso e tasi, ka se toe ai se aso ma taeao.” A pati konā ne fai sāle ei ke alaala au i po kae mafaufau e uiga ki te olaga i aso mai mua. Ne mafaufau ifo au: ‘E mautinoa me e ‵tau eiloa o isi se aoga o te olaga. Kaia e nofo ei au i konei?’ Au se fia mate!

Ne fia iloa ne au a mea e uiga ki faifaiga faivailakau. Ne taumafai au o faipati atu ki tino ‵mate kae āsi atu mo oku taugasoa i te akoga ki tanuga, kae onoono foki matou ki ata agaga. Ne mafau‵fau matou me e gali kae fakamataku foki.

Ne kamata o maua ne au a uiga fui fai i te taimi ko sefulu fua ei oku tausaga. Ne kamata o ‵pusi puatolo au, kae ne umiti fakavave foki au ki ei. Fakamuli ifo, ne gasolo aka au ki te ‵pusi maluana. Kae i te taimi ko 11 ei oku tausaga, ne tofotofo au o inu ki meainu ma‵losi. Faitalia toku sē fiafia ki ei, kae ne gali ki a au māfai ko konā. Ne fiafia malosi au ki pese mo te saka. Ne fanatu sāle au ki pa‵tī mo tuisi i so se taimi ne mafai ne au. Ne masani o tele muni atu au i te po kae foki fakavave atu a koi tuai o ao. I te suā aso, ona ko toku fi‵ta, ko se fano ei au ki te akoga. Kafai ko kau atu au ki ei, ne inu sāle au ki meainu ma‵losi i va o aku mataupu i te akoga.

Ne ma‵sei ‵ki oku kai i aku mataupu i toku toe tausaga i te akoga. Ona ko te mea ne seki iloa ne toku mātua oku uiga fui fai, ne fanoanoa kae kaitaua malosi a ia. Ne kinau sāle māua kae ne sola keatea atu ei au mai te fale. Ne ‵nofo māua mo taku famau ko Tony, mō se vaitaimi, telā se Rastafarian, se potukau fakalotu. Ne aofia malosi a ia i tamā amioga solitulafono, te ‵togiatuga o vailakau tapu, kae ne lauiloa foki a ia i ana uiga fakasaua. E seki leva kae ne faitama au, kae i te taimi ko 16 ei oku tausaga, ne fanau ne au te mā tamaliki tagata.

Ne fetaui muamua au mo Molimau a Ieova i te taimi ne nofo atu au i se koga mō mātua taka mo olotou pepe. Ne talia ne te malo ke maua soku potu i ei. Ne āsi sāle mai a fāfine Molimau e tokolua ki nisi mātua talavou. I te aso e tasi, ne kau atu au ki te lotou sau‵talaga. Ne manako au ke fakamaoni aka te ‵se o te kau Molimau. Kae ne tali faka‵lei mai ne lāua aku fesili takitasi kolā e uke ‵ki, i se auala filemu kae manino mai te Tusi Tapu. Ne atafai kae agamalu lāua, telā ne gali ‵ki ki a au. Tela la, ne fiafia foki au ke fai ne lāua taku akoga faka-te-Tusi Tapu.

E seki leva kae ne tauloto ne au se mea mai te Tusi Tapu telā ne ‵fuli ei toku olaga. Talu mai taku folikiga, ne mataku au i te mate. Kae nei la, ko iloa ne au a akoakoga a Iesu e uiga ki te toe‵tuga! (Ioane 5:28, 29) Ne tauloto foki ne au me e atafai mai te Atua ki a au. (1 Petelu 5:7) Ne otia malosi toku loto i pati i te Ielemia 29:11, telā e fai mai penei: “‘Me iloa ‵lei ne au a mafaufauga e mafaufau ne au e uiga ki a koutou,’ ko te folafolaga a Ieova, ‘ko mafaufauga o te filemu, kae e se ko fakalavelave, ke tuku atu ki a koutou a aso mai mua mo se fakamoemoega.’” Ne kamata o talitonu au me e mafai o maua ne au te fakamoemoega ke ola ki te se-gata-mai i te lalolagi Palataiso.—Salamo 37:29.

Ne fakaasi mai ne Molimau a Ieova a te alofa tonu ki a au. I te taimi muamua ne kau atu au ki se fakatasiga a latou, ne lagona ne au a te alofa mo te gali—ne mata fia‵fia a tino katoa! (Ioane 13:34, 35) Ko oko loa te ‵kese o te mea tenā mai faifaiga ne maua ne au i se lotu e tasi i te kogā koga tenā. Ne tali ‵lei au ne te kau Molimau faitalia oku fakanofonofoga. Ne fia‵fia latou o fakamāumau olotou taimi ki a au, ne atafai mai, kae ‵saga tonu mai, e pelā foki mo te fesoasoani mai i auala aoga e uke. Ne lagona ne au me ko fai au mo fai se vaega o se kāiga lasi kae a‵lofa.

Mai i aku sukesukega ki te Tusi Tapu, ne iloa aka ne au me e ‵tau o fai ne au a ‵fuliga i toku olaga ke fakafetaui ki tulaga ma‵luga o te Atua i mea tau amioga. Ne seki faigofie ki a au ke fakagata aka taku ‵pusi puatolo. Kae ne iloa foki ne au me e isi ne vaegā pese kolā e fakamalosi aka i ei toku manakoga ke ‵pusi maluana, telā ne ‵fuli ne au a pese e fakalogologo au ki ei. Ona ko te mea ne manako au ke tumau i te ‵lei o toku mafaufau, ne fakagata ne au toku fanatu ki pa‵tī mo tuisi, ko koga kolā e fakaosoosogina ei au ke inu ke konā. Kae ne ‵sala au ki taugasoa ‵fou kolā e mafai o fakamalosi mai i se auala ‵lei kae fesoasoani mai ke tumau i toku olaga fou.—Faataoto 13:20.

I te taimi foki tenā, ne fai foki ne Tony tena akoga faka-te-Tusi Tapu mo Molimau a Ieova. I te taimi ne tali atu ei ne te kau Molimau ana fesili mai te Tusi Tapu, ne kamata foki o talitonu a ia me tenei te munatonu. Ne fai ne ia a ‵fuliga ‵lasi i tena olaga; ne ‵kalo keatea mai i ana taugasoa mua kolā e uiga fakasaua, ne fakagata ana tamā faifaiga solitulafono kae fakagata foki tena ‵pusi maluana. Ko te mea ke mafai o fakafiafia katoatoa atu ki a Ieova, ne lavea foki ne māua me e ‵tau o fai a nisi fakama‵fuliga ki te mā olaga kae fakamalosi aka foki a fakanofonofoga ‵lei mō te mā tamaliki tagata. Ne avaga māua i te 1982.

E masaua ne au a taimi ne ‵sala atu au ki mataupu i mekesini ko te Faleleoleo Maluga mo te Ala Mai! * ki tala o tino kolā ne manumalo i te faiga o ‵fuliga kolā e manako au ki ei. Ne fakamalosi mai ki a au olotou fakaakoakoga ‵lei. Ne lagona ne au te malosi ke tumau i te taumafai kae ke se ‵fiu vave! Ne tumau toku ‵talo atu ki a Ieova ke mo a ma ‵fiu i a au. Ne papatiso māua mo Tony e pelā me ne Molimau a Ieova i a Iulai i te 1982.

A te atiakaga o se va taugasoa mo Ieova te Atua ne fakasao ei toku ola. Ne lagona foki ne māua mo Tony a te fesoasoani o Ieova i taimi faiga‵ta. Ne fakamasani foki māua ke fakalagolago ki te Atua i taimi faiga‵ta. Kae ne lagona ne māua me ne fesoasoani mai faeloa a ia kae ‵lago mai ki te motou kāiga.—Salamo 55:22.

Ne fiafia malosi au ke fesoasoani atu ki te mā tama tagata mo te mā tama fafine ke iloa ne lāua a Ieova pelā mo au. Ko lagona foki ne au a te fiafia ke lavea atu me ko ‵tupu aka lā tama‵liki i te iloaga e uiga ki te Atua.

Ko se toe alaala au i po kae manavase ki aso mai mua io me ko te mate. Ko ‵kau katoatoa atu māua mo Tony ki te āsi atu ki fakapotopotoga kese‵kese o Molimau a Ieova i vaiaso takitasi ke fakamalosi atu ki a latou. E ‵kau atu māua ki a latou i te akoakoga o nisi tino me kafai e fakatuanaki ki a Iesu e mafai foki o maua ne latou a te ola se-gata-mai.