Ne tavae atu ne Paulo mo Sila a te Atua ki pese i te taimi ne ‵nofo atu i te falepuipui. (Ga 16:25) I aso nei, ne usu atu ne taina tali‵tonu a pese o te Malo i te ‵nofoga i te falepuipui fakasaua i Sachsenhausen a te kau Nasi i Siamani mo te taimi ne ave fakapagota ei ki Saipelia. E fakaasi mai i tala konei a te ‵mana o pese ke ati aka ei te loto malosi i Kelisiano kolā e fe‵paki mo tofotofoga faiga‵ta.

Ko pili o maua ne nisi ‵gana fakaopoopo a te pese fou ko te “Usu Pese mo te Fia‵fia” ki a Ieova. I te taimi e maua ei ‵tou ‵kopi, e mafai o faka‵mautakitaki a pati i ‵tou mafaufau mai te fakaakoako ki pese i tapuakiga a kāiga. (Efe 5:19) Ka mafai ei o fesoasoani mai te agaga tapu ke masaua ne tatou a pese i taimi e ‵sae aka ei a tofotofoga. E mafai o fesoasoani mai a pese o te Malo ke ‵saga tonu atu tatou ki ‵tou fakamoemoega. E mafai o fakamalosi aka i ei tatou māfai ko fe‵paki mo tofotofoga faiga‵ta. Kae kafai foki e fia‵fia tatou, a pati fakamalosi i ei e mafai o fai ei tatou ke ‘usu pese mo te fia‵fia’ ona ko te tulaga ‵lei o ‵tou loto. (1No 15:16; Sal 33:1-3) Ke na fakaakoako faka‵lei ki ‵tou pese o te Malo!

ONOONO KI TE VITIO SE PESE TELĀ NE FAKAMALOSI ATU KI TINO NE FAKAGALUE ‵MAFA. KA OTI KO TALI MAI EI A FESILI KONEI:

• Ne a fakanofonofoga ne iku atu ei ki te ‵fatuga ne te Taina ko Frost se pese?

• Ne fakamalosi aka pefea ne te pese a taina i te falepuipui fakasaua i Sachsenhausen?

• Ne a fakanofonofoga i aso katoa e mafai o fakamalosi aka ei koe ne pese o te Malo?

• Ne a pese o te Malo e fia tauloto koe ki pati i ei?