Ne iloa ne Iakopo me ko Ieova tokotasi fua e ‵tau o tapuaki ki ei, faitalia e seki ai se tulafono ke fakatapu te ifo ki tupua. (Eso 20:3-5) Tela la, mai tua o te faiatuga a Ieova ki a Iakopo ke foki ki Peteli, ne fakatonu atu a Iakopo ki tino katoa kolā ne olo fakatasi mo ia ke fakaseai a atua fakaa‵tea. Tenā ne ‵pei ei kea‵tea ne Iakopo a tupua, e aofia i ei a ligi mo mea fakagaligali kolā e pei ne latou ke mafai o manuia latou. (Ken 35:1-4) E mautinoa eiloa me ne fiafia a Ieova ki te mea ne fai ne Iakopo.

I ‵tou aso nei, e mafai pefea o tuku ne tatou ki a Ieova a te tapuakiga telā e ‵tau fua o maua ne ia tokotasi? Te mea tāua e ‵tau o fai ko te kalo kea‵tea mai so se mea telā e isi sena sokoga ki tupua io me ko te faivailakau. E aofia i te mea tenei ko te fakaseaiga o so se mea telā e isi sena sokoga ki te faivailakau, kae ke iloilo faka‵lei foki ne tatou a ‵tou fakafiafiaga. E pelā me se fakaakoakoga, ke fesili ifo ki a koe: ‘E mata, e fiafia sāle au ki tusi io me ko ata vitio kolā e fakaasi mai ei a mea pelā me ne agaga ‵kai tino io me ne tino ‵mate ko toe‵tu? E mata e fakaata mai ne tusi mo ata vitio kolā e fiafia au ki ei i mea fakataulaitu, faivailakau ne mea fa‵kata fua kae seai se lotou fakamaseiga ki a au?’ E ‵tau mo tatou o faka‵mao kea‵tea mai so se mea telā e takalialia ki ei a Ieova.—Sal 97:10.

KE ONOONO KI TE VITIO KO TE “‵TEKE ATU TE TIAPOLO,” KA OTI KO TALI EI A FESILI KONEI:

• Se a te fakalavelave ne fepaki mo se tino akoga ki te Tusi Tapu e igoa ki a Palesa?

• Kaia e ‵lei ei ke ‵sala ki te fesoasoani o toeaina māfai se fakalavelave e aofia i ei a te faivailakau?

• Ne a mea e ‵tau o ‵kalo katoatoa kea‵tea mai ei a tino kolā e ma‵nako ki se puipuiga mai i a Ieova?

• Se a te faifaiga poto ne fai ne Palesa?

• I te koga e nofo i ei koe, ne a nisi auala e mafai o kalo keatea koe mai fakamalosiga a temoni?