Ne akoako mai a Iesu: “Ne maua ne koutou a mea konei e aunoa mo se ‵togi.” (Mat 10:8) E faka‵logo faka‵lei tatou ki te fakatonuga manino tenā mai te sē ‵togi o ‵tou Tusi Tapu io me ko tusi faka-te Tusi Tapu. (2Ko 2:17) E tiga eiloa te feitu tenā, e maua i loto i tusi konei a muna‵tonu tāua mai te Muna te Atua. E uke a taumafaiga lasi mo tupe ne fakamāumāu ke ‵lomi kae avatu a tusi konā ki fakapotopotoga i te lalolagi kātoa. Tela la, e ‵tau mo tatou o puke a aofaki o tusi e manakogina kae e lava mō tatou.

Fakaaoga te atamai i te taimi e tuku atu ei ne tatou a tusi ki nisi tino, ke oko foki ki tino e talai ki ei tatou i koga e tokouke a tino i ei. (Mat 7:6) I lō te tuku atu fua o tusi ki so se tino, e taumafai tatou ke sau‵tala mo latou ke fakamautinoa aka me e fia‵fia tonu io me ikai. E mata, e mafai o tali atu tatou ao ki se fesili i te pokisi? Kafai e se matea atu te fiafia tonu i se tino, se mea ‵lei ke tuku atu se tamā pepa. Kae kafai e manako ki se mekesini io me se tusi, e fia‵fia tatou o tuku atu ki ei.—Fat 3:27, 28.