Ko fia nei tausaga koi nofo fakatalitali koe ke oko mai te Malo o te Atua? E mata, ne kufaki faeloa koe i te uke o fakalavelave ne fe‵paki mo koe? (Lom 8:25) Nisi Kelisiano ne fakafesagai atu ki te takalialia, fakasauaga, falepuipuigina io me fakamatakutaku ke tamate. Kae e tokouke atu e pokotia i ma‵saki matagā mo te tulaga matua.

Ne a mea e fesoasoani mai ke ‵nofo fakatali‵tali faeloa tatou faitalia te uke o fakalavelave? E ‵tau mo tatou o fagai ‵tou fakatuanaki i aso katoa mai te fai‵tau ki te Tusi Tapu mo te mafau‵fau loto ki mea kolā e faitau ne tatou. E ‵tau o saga malosi atu ki te ‵tou fakamoemoega. (2Ko 4:16-18; Epe 12:2) E ‵tau o ‵talo atu tatou ki a Ieova kae akai atu ki tena agaga tapu ke fakamalosi mai. (Luk 11:10, 13; Epe 5:7) E fesoasoani mai eiloa te ‵tou Tamana alofa māfai e “katoatoa te [‵tou] fa‵ki fakatasi mo te kufaki mo te fia‵fia.”—Ko 1:11.

PEI TE VITIO E ‵TAU MO TATOU O “‵TELE MO TE KUFAKI”—KE TALITONU KI TE MAUAGA O TE FAILOGA, KAE TALI AKA A FESILI MAI LALO:

• Ne a “fakalavelave mo mea ‵tupu fakafuasei” e mafai o ‵tupu i te olaga? (Fai 9:11)

• E mafai pefea o fesoasoani mai a ‵talo māfai e fakafesagai tatou mo fakalavelave?

• Kafai ko sē mafai o fai ne tatou a mea e uke i te taviniga ki a Ieova e pelā mo taimi mua, kae kaia e ‵tau o ‵saga atu ki mea kolā koi mafai o fai nei ne tatou?

• Ne a mea e mafai o fesoasoani mai ke tumau faeloa koe i te talitonu ki te mauaga o te failoga?