E ola tatou i se lalolagi telā e fai a te ‵lei e pelā me se mea masei kae ko te masei e pelā me se mea ‵lei. (Isa 5:20) Kae se mea fakafanoanoa me fai ne nisi tino a mea kolā e se fiafia ki ei a Ieova, e aofia i ei a faifaiga sē ‵tau i te vā o te tagata mo te suā tagata, mo te fafine ki te suā fafine. E mafai o fakaosooso ne taugasoa i te akoga io me ko nisi tino a ‵tou tamaliki ke tau‵tali i olotou auala. E mafai pefea o fakatoka ne koe au tama‵liki ke manumalo i te mea tenei mo tofotofoga e tai ‵pau penā?

Akoako au tamaliki ki te iloaga e uiga ki tulaga o Ieova. (Lev 18:3) Akoako malielie latou ki mea e fakaasi mai i te Tusi Tapu e uiga ki te ‵moe fakatauavaga, a mea e fakaasi atu ne koe e ‵tau o fetaui mo te lotou malamalama. (Teu 6:7) Ke fesili ifo: ‘E mata, kai akoako ne au aku tama‵liki ki auala ‵tau e fakaasi atu ei a faifaiga fakafamau, te tāua ke pei a gatu kolā e mata ‵tau, kae ke iloa ne nisi tino o fakaasi atu te āva ki mea totino kolā e se ‵tau o iloa ne latou? E mata, e iloa ne aku tama‵liki a mea e ‵tau o fai ne latou, māfai e taumafai se tino o fakaasi atu a ata ma‵sei io me fai atu ke fai ne latou se mea telā e se fiafia ki ei a Ieova?’ A te mauaga o te iloaga ka fesoasoani ki a latou ke ‵kalo kea‵tea mai fakalavelave. (Fat 27:12; Fai 7:12) A te akoako o au tama‵liki e fakaasi atu ne koe a te alofa ki te meaalofa tāua ne tuku atu ne Ieova.—Sal 127:3.

KE ONOONO KI TE VITIO FAITE SE FALE TELĀ KA TUMAU—PUIPUI AU TAMA‵LIKI “MAI TE MEA MASEI,” KAE TALI A FESILI KONEI:

• Kaia e se ma‵nako a nisi tino ke akoako olotou tama‵liki e uiga ki faifaiga fakatauavaga?

• Kaia e ‵tau ei mo mātua o akoako olotou tamaliki “i polopolokiga mo fakatakitakiga a Ieova”?—Efe 6:4

• Ne a mea ne tuku mai i te fakapotopotoga a Ieova ke fesoasoani ki mātua ke akoako olotou tama‵liki e uiga ki faifaiga fakatauavaga?—w19.05 12, pokisi

• Kaia e ‵tau o fai‵pati faeloa koe mo au tama‵liki mai mua o ‵tupu a fakalavelave?