KE OLA E PELĀ ME NE KELISIANO
A Ieova e Fesoasoani Mai ki a Tatou ke Kufaki i ‵Tou Fakalavelave
I aso fakaoti konei, e fe‵paki tatou mo mea faiga‵ta e uke. I nisi taimi, kāti e mafau‵fau tatou me e se mafai o kufaki ne tatou a fakalavelave e uke. Kae kafai e tumau tatou i te fakapili‵pili atu ki a Ieova, ka fesoasoani mai a ia ke kufaki tatou i toe fakalavelave fakalogo‵mae. (Isa 43:2, 4) E mafai pefea o fakapili‵pili atu tatou ki a Ieova māfai e fe‵paki mo fakalavelave?
‵Talo. Kafai e ‵ligi atu ‵tou loto ki a Ieova, e tuku mai ne ia te filemu mo te malosi i mea tau lagonaga ke kufaki tatou.—Fpi 4:6, 7; 1Te 5:17.
Fakatasiga. Ko sili atu nei a te manakogina ke maopoopo fakatasi tatou kae maua a mea‵kai faka-te-agaga kolā e tuku mai ne Ieova i ‵tou fakatasiga. (Epe 10:24, 25) Kafai e fakatoka, ‵kau atu kae fai ‵tou tusaga i fakatasiga a te fakapotopotoga, e maua katoatoa eiloa ne tatou a te fesoasoani o te agaga o Ieova.—Fks 2:29.
Galuega Talai. Ka faigofie ki a tatou ke ‵saga tonu atu ki mea ‵lei māfai e fai ne tatou a mea katoa e mafai o fai ke tumau i te ga‵lue malosi i te galuega talai. Ka fakamalosi aka foki ei te ‵tou va fakataugasoa mo Ieova mo ‵tou taina kolā e ga‵lue tasi mo tatou.—1Ko 3:5-10.
ONOONO KI TE VITIO A IEOVA KA PUKE NE IA KOE, KAE KE TALI AKA A FESILI KONEI MAI LALO:
-
Se a te mea ne fesoasoani atu ki a Malu ke fakapilipili atu ki a Ieova i taimi o ana fakalavelave?
-
E pelā mo Malu, e mafai pefea o maua ne tatou a fakamafanafanaga mai pati i te Salamo 34:18 i taimi o fakalavelave?
-
E fakaasi mai pefea i mea ne ‵tupu ki a Malu me e tuku mai ne Ieova ki a tatou a te “malosi telā e sili atu i te malosi masani” māfai ko fe‵paki tatou mo fakalavelave?—2Ko 4:7
