TE POGAI E TĀUA EI: A te tusi ko te 1 Kolinito se tasi mai te 14 o tusi ne tusigina ne te apositolo ko Paulo ke fakamalosi atu ana taina Kelisiano. I te taimi e tusi ei ne se tino se tusi, e ‵tau o filifili faka‵lei ne ia a pati ke tusi ki te tusi, ko te mea ke fiafia te tino telā e faitau faeloa ki tena tusi. A te tusi atu o se tusi se tasi o auala ‵lei ke talai atu ki ‵tou kāiga io me ko taugasoa. Se auala magoi foki ke talai atu ki tino kolā e faigata o maua ne tatou se avanoaga ke fai‵pati ki a latou. E pelā me se fakaakoakoga, se tino fiafia kae faigata ke maua atu i tena fale. E faigata ke fetaui tatou mo nisi tino i ‵tou koga talai, me e ‵nofo eiloa latou i vaegā fale kolā e fakatapu i ei a tino valevale kae leoleogina olotou ‵pui, se fakai e ‵pui katoa, io me ko kogā koga ‵mao. Ne a mea e ‵tau o masaua ne tatou, maise loa māfai e tusi atu koe ki se tino telā e se masani koulua?

TE AUALA KE FAI EI:

• Fai atu a pati kolā e manako koe o fai moi ne fetaui tonu koulua. Fakamatala atu a mea e uiga ki a koe i te kamataga o te tusi, kae fakamaina faka‵lei atu te pogai e tusi atu ei koe. Ke fakasae aka se fesili ke mafaufau ki ei te tino tenā, kae fakasino atu ki a ia te ‵tou fakatuatusi. Ko fakaasi atu ei ki a ia a te Online Bible Study Lessons, io me fakamatala malie atu ki ei a ‵tou polokalame e uiga ki ‵tou sukesukega ki te Tusi Tapu, io me siki atu ki ei a nisi mataupu i nisi tusi kolā e fai i ei ‵tou akoga faka-te-Tusi Tapu. E mafai o avatu foki a nisi tusi e pelā mo te pepa ki te ‵tou fakatuatusi, se pepa ‵kami, io me se tamā pepa

• Ke fakatoetoe. Ke fakatoetoe fua tau tusi i te mea ma fi‵ta ei te tino i te faitauga ki ei.—Ke onoono ki te tusi fakaakoako i te itulau e 8

• Toe faitau kae onoono faka‵lei ki ei ke seai ne mea ‵se i ei. Fakamautinoa aka me e ‵ma kae faigofie ke faitau, kae ke ‵tagi ‵lei e pelā me se tusi ki tou taugasoa, kae fakamalosi loto. Ke lava te aofaki o sitamupa e faka‵piki i te teutusi.