A fakalavelave o te natula ko gasolo aka eiloa o uke atu i aso nei. Kafai ko tupu se fakalavelave o te natula, e manakogina ke fakatoka faka‵lei a galuega fesoasoani kolā e manakogina. Ona ko te pogai tenā, ne fakatoka ei ne te Potukau Pule a te Matagaluega mō Galuega Fesoasoani i ofisa lagolago katoa.

Kafai ko ‵logo a taina i te matagaluega tenā e uiga ki se fakalavelave tupu, e fesokotaki fakavave atu latou ki toeaina ke iloa aka a te fesoasoani telā e manakogina ne tino talai. Kafai e lasi ‵ki te fakamaseiga telā ko se mafai o faka‵lei aka ne tino talai i a latou eiloa, ka ‵tofi aka ne te ofisa lagolago ne taina kolā e fetaui ‵lei ke takitaki ne latou te galuega fesoasoani tenā. Kāti ka ‵sala a taina konā ki ne volenitia io me ki mea e manakogina mai mea ne fakameaalofa atu io me e mafai o ‵togi ne latou kae tufatufa atu ki taina mo tuagane i koga konā.

E uke a feitu ‵lei ke fai a galuega i te auala tenei. E fai ei ke ‵kalo kea‵tea mai te fai fakalua o te galuega, te ‵numi valevale, mo te fakamaumauga o tupe mo kope, kolā e mafai eiloa o ‵tupu māfai e ave ne taina a olotou meaalofa i a latou eiloa.

E fakaiku aka ne taina kolā ne ‵tofi aka ne te ofisa lagolago a te aofaki o tupe mo volenitia kolā ka manakogina i te galuega fesoasoani. E ‵tau foki o fesokotaki faka‵lei tatou mo tino pule‵pule o fakai konā, kolā e mafai o fakava‵vave ne latou a te ‵tou galuega fesoasoani. Tela la, e se ‵tau mo tino taki tokotasi o ga‵sue muamua o ‵sala a tupe, lafo atu a fesoasoani kolā e manakogina, io me malaga atu ki te koga telā e pokotia, vaganā ne fakamolemole atu ke fai penā.

Kae kafai ko ‵tupu a fakalavelave penā, e ma‵nako eiloa tatou o fesoasoani atu. (Epe 13:16) E a‵lofa tatou ki ‵tou taina! Ne a mea e mafai ne tatou o fai? Te ‵toe mea tāua, e mafai o ‵talo atu tatou mō latou kolā e pokotia i fakalavelave o te natula mo latou kolā e aofia i galuega fesoasoani. E mafai foki o fai ‵tou meaalofa tupe e auala i te galuega i te lalolagi kātoa. Mai lalo o te takitakiga a te Potukau Pule, ka fakaiku aka ne ofisa lagolago a te ‵toe auala ‵lei ka fakaaoga i ei a meaalofa tupe konā. Kae kafai e ma‵nako eiloa tatou takitokotasi ke aofia i ei, e mafai o fakailoa atu me e avanoa eiloa tatou mai te faka‵fonu aka a te pepa ko te Local Design/Construction Volunteer Application (DC-50).

ONOONO KI TE VITIO SE LOFIAGA LASI I BRAZIL, KAE TALI AKA FESILI MAI LALO:

Se a te mea e gali ki a koe e uiga ki galuega fesoasoani a Molimau a Ieova mai tua o te lofiaga i Brazil i te 2020?