A te alofa e pelā me se kulū telā e faka‵piki ne ia se kāiga ke tasi. E aunoa mo te alofa, ka faigata ki se kāiga ke fakatumau te ‵kaufakatasi mo te fakatau fesoasoani. E mafai pefea ne tāgata mo fāfine a‵vaga penā foki mātua o fakaasi atu te alofa i te kāiga?

A te tagata avaga alofa e fakatāua ne ia a manakoga, kilokiloga mo lagonaga o tena avaga. (Efe 5:28, 29) Ka tausi atu a ia ki tena kāiga i te feitu faka-te-foitino mo te feitu faka-te-agaga, e aofia i ei a te faiga faeloa o se Tapuakiga a Kāiga i se afiafi. (1Ti 5:8) A te fafine avaga alofa ka fakalogo kae “āva malosi” ki tena avaga (Efe 5:22, 33; 1Pe 3:1-6) Ka fakatau fakaasi atu ne lāua a te loto fakamagalo. (Efe 4:32) A mātua a‵lofa e ‵saga tonu atu ki manakoga olotou tama‵liki taki tokotasi kae akoako latou ke a‵lofa ki a Ieova. (Teu 6:6, 7; Efe 6:4) Ne a fakalavelave e fe‵paki mo olotou tama‵liki i te akoga? E kufaki pefea latou i fakamalosiga mai taugasoa? Kafai e isi se alofa i loto i te kāiga, ka maua faeloa ne latou te tokagamalie mo se puipuiga.

ONOONO KI TE VITIO FAKAASI ATU TE ALOFA E SE GATA I TE KĀIGA, KAE TALI A FESILI KONEI:

• I te auala fea e fagai kae fakatāua ne se tagata alofa a tena avaga?

• I te auala fea e fakaasi atu ne se fafine avaga alofa a te āva malosi ki tena avaga?

• I te auala fea e faka‵goto ei ne mātua a‵lofa a te Muna a te Atua ki loto o olotou tamaliki?