E pelā loa mo nisi fakatasiga, a fakatasiga mō te galuega talai se fakatokaga mai i a Ieova telā e fai ei ke fakatau fakamalosi aka ne tatou a te alofa mo galuega ‵lei. (Epe 10:24, 25) E ‵tau o nofo ki se lima ki te fitu minute te leva, telā e aofia i ei a te fakatokaga o potukau, te filiga o koga talai, mo te faiga o te ‵talo. (Kafai e isi se fakatasiga e fai mai tua o te fakatasiga tenā, ko tena uiga e ‵tau o tai fakatoetoe ifo.) E ‵tau mo te taina e takitaki ne ia te fakatasiga o fakatoka se mataupu telā e faigofie kae magoi ke fakaaoga ne tino e ‵kau atu ki te galuega talai i te aso tenā. E pelā me se fakaakoakoga, kafai a te tokoukega o tino ne ‵kau atu i te Aso Ono ne seki ‵kau atu ki te galuega talai i te fakaotiga o te vaiaso ko teka, kāti e ‵lei atu ke sau‵tala fua ki pati ke fai atu ki te tino i te fale. Ne a nisi mataupu kolā e ‵lei ma sau‵tala ki ei?

• Se manatu fesoasoani mō sau‵talaga mai te ‵Tou Olaga Kelisiano mo te Galuega Talai—Tusi mō Fakatasiga

• Te aulala ke fakaaoga se mea ne fatoa tupu io me se tala ke kamata ki ei te sau‵talaga

• Te auala ke fakafesagai atu ki se manatu ‵teke masani

• Te auala ke fakafesagai atu ki se tino telā e se talitonu ki te Atua, se tino e talitonu ki te evolusione, se tino e faipati ki se ‵gana fakaa‵tea, io me se tino e kau ki se lotu telā e se lauiloa i tau koga talai

• Te auala ke fakaaoga a vaega i luga i te fakatuatusi ko te jw.org, te JW Library^® app, io me ko te Tusi Tapu

• Te auala ke fakaaoga se mea faigaluega mai te Pusa o Mea Faigaluega mō Fai Akoakoga

• Te auala ke kau atu ki se vaega o te galuega talai e pelā mo te talai i telefoni, tusi a tusi, talai i koga e tokouke a tino i ei, toe asiga, io me ko akoga faka-te-Tusi Tapu

• Fakamasauaga ki te puipuiga o ‵tou ola, fulifuli ‵tou mea e fai e ‵tusa mo fakanofonofoga, amioga ke ‵lei, se kilokiloga tonu, io me se mea tai ‵pau penā

• Se mataupu io me se vitio mai te polosiua Ke Atamai i te Faitau mo te Akoako Atu

• Te auala ke fakamalosi kae fesoasoani ki tou soa i te galuega talai

• Se tusi faitau telā e fetaui ‵lei ki te galuega talai io me se tala fakamalosi mai te galuega talai