Ko pili fua nei o gata atu a te kufaki o Ieova ki te lalolagi tenei. Ka fakaseai atu a lotu ‵se, ka oso mai a atufenua ‵kau fakatasi ki tino o te Atua, kae ka fakaseai atu ne Ieova a tino ma‵sei i a Amaketo. Ka olioli eiloa a Kelisiano ki mea ‵tupu tāua kae fakafia‵fia konei.

E tonu, e se iloa ne tatou a fakamatalaga liki‵liki katoa e uiga ki te fakalavelave lasi. E pelā me se fakaakoakoga, e se iloa tonu ne tatou te taimi ka kamata i ei. E se iloa ne tatou a pogai ka fakaaoga ne malo fakapolitiki ke ‵pulu aka ei a te lotou oso atu ki lotu. E se iloa ne tatou me ka pefea te leva o te osoatuga a atufenua ki tino o te Atua io me ne a mea ka aofia i ei. E se iloa foki ne tatou a te auala mautinoa ka fakaaoga ne Ieova ke fakaseai atu a tino ma‵sei i a Amaketo.

Kae tiga te feitu tenā, e tuku mai i te Tusi Tapu a fakamatalaga katoa e manakogina ne tatou ke mafai o fakafesagai atu ki aso mai mua mo te tali‵tonu mo te loto malosi. E pelā me se fakaakoakoga, e iloa ne tatou me ko ola tatou i te fakaotiotiga o “aso fakaoti.” (2Ti 3:1) E iloa ne tatou i aso o te osoatuga ki lotu ka “fakamu‵tana” fua, ke mo a ma fakaseai atu a te lotu tonu. (Mat 24:22) E iloa ne tatou me ka faka‵sao ne Ieova ana tino. (2Pe 2:9) Kae e iloa ne tatou me i te Tino telā ne filifili ne Ieova ke fakaseai ne ia a tino ma‵sei kae faka‵sao atu a te vaitino tokouke i a Amaketo, e amiotonu kae ‵mana.—Fks 19:11, 15, 16.

E mautinoa eiloa me ka fai ne mea ‵tupu i aso mai mua ke “mata‵po a tino ona ko te ma‵taku.” Kae ko te fai‵tau kae mafaufau ‵loto ki faifaiga faka‵sao tino a Ieova i aso mua mo mea kolā ne fakaasi mai ne ia e uiga ki aso mai mua, e mafai o fai ei ko tatou ke “‵tu faka‵lei kae ‵kilo ki luga,” mo te loto tali‵tonu me ko pili mai te ‵tou faka‵saoga.—Luk 21:26, 28.