Ne folafola ne Iesu a “te tala ‵lei o te Malo o te Atua.” (Luk 4:43) Ne akoako foki ne ia a tino ke ‵talo mō te Malo tenā. (Mat 6:9, 10) I a Novema, ka taumafai malosi tatou ke folafola atu a te Malo o te Atua. (Mat 24:14) Fai sau fakatokaga ke mafai ne koe o kau katoatoa atu ki te galuega fakapito tenei. A latou kolā e paenia lagolago, e mafai o filifili ki se 30 io me se 50 itula i te masina tenei.

Fakaasi atu se tusi faitau e uiga ki te Malo o te Atua ki so se tino i tau koga talai. Kafai e filifili koe ki se tusi faitau, mafaufau me se a te lotu a tau tino fakalogologo. Kafai ne fakaasi atu ne se tino a te fiafia i te sau‵talaga muamua, tuku atu ki ei se ‵kopi o Te Faleleoleo Maluga Napa 2 2020. Asi fakavave atu ki te tino fiafia kae taumafai ke kamata se akoga faka-te-Tusi Tapu mai te fakaaogaga o se tusi mai te ‵tou Pusa o Mea Faigaluega mo Fai Akoakoga. Ko toetoe fua nei te taimi mai mua o fakaseai ne te Malo o te Atua a malo katoa kolā e ‵teke atu ki a ia. (Tan 2:44; 1Ko 15:24, 25) Tela la ke fakaaoga faka‵lei ne tatou a te avanoaga tenei ke fakaasi atu ei te ‵tou fakamaoni ki a Ieova mo tena Malo!